శ్రీ త్రిపుర సుందరి మానసపుజా స్తోత్త్రం
(శంకరాచార్య కృతం)
శ్రీః
మమ న భజనశక్తి పాదయోస్తే న భక్తి-
ర్నచ విషయవిరక్తిర్ధ్యానయోగే న సక్తిః ।
ఇతి మనసి సదాహం చింతయన్నాద్యశక్తే
రుచిరవచనపుప్పైరర్చనం సంచినోమి ॥ 01 ॥
వ్యాప్తం హాటకవిగ్రహైర్ణలచరైరారూఢదేవవ్రజైః
పోతైరాకులితాంతరం మణిధరైర్భూమీధరైర్భూషితమ్ ।
ఆరక్తామృతసింధుముద్దురచలద్వీచీచయవ్యాకుల -
వ్యోమానం పరిచింత్య సంతతమహో చేతః కృతార్థీభవ ॥ 02 ॥
తస్మిన్నుజ్జ్వలరత్నజాలవిలసత్కాంతిచ్చటాభీః స్ఫుటం
కుర్వాణం వియదింద్రచాపనిచయైరాచ్చాదితం సర్వతః ।
ఉచ్చైఃశృంగనిషణ్ణదివ్యవనితాబ్బందానన ప్రోల్లస -
ద్గీతాకర్ణననిశ్చలాఖిలమృగం ద్వీపం నమస్కుర్మహే ॥ 03 ॥
జాతీచమ్పకపాటలాదిసుమనఃసౌరభ్యసంభావితం
హ్రీంకారధ్వనికంఠకోకిలకుహూప్రోల్లాసిచూతద్రుమమ్ ।
ఆవిర్భూతసుగంధిచందనవనం దృష్టిప్రియం నందనం
చంచచ్చంచలచంచరికచటులం చేతశ్చిరం చింతయ ॥ 04 ॥
పరిపతితపరాగైః పాటలక్షోణిభాగో
వికసితకుసుమోచ్చైః పీతచంద్రార్కరశ్మిః ।
అలిశుకపికరాజీకూజితైః శ్రోత్రహారీ
స్ఫురతు హృది మదీయే నూనముద్యానరాజః ॥ 05 ॥
రమ్యద్వారపురప్రచారతమసాం సంహారకారిప్రభ
స్ఫూర్జత్తోరణభారహారకమహావిస్తారహారద్యుతే ।
క్షోణీమండల హేమహారవిలసత్సంసారపారప్రద
ప్రోద్యద్భక్తమనోవిహార కనకప్రాకార తుభ్యం నమః ॥ 06 ॥
ఉద్యత్కాంతికలాపకల్పితనభఃస్ఫూర్జద్వితాన ప్రభ
సత్కృష్ణాగరుధూపవాసితవియత్కాష్థాంతరే విశ్రుతః ।
సేవాయాతసమస్తదైవతగణైరాసేవ్యమానోఽనిశం
సోఽయం శ్రీమణిమండపోఽనవరతం మచ్చేతసి ద్యోతతామ్ ॥ 07 ॥
క్వాపి ప్రోద్భటపద్మరాగకిరణవ్రాతేన సంధ్యాయితం
కుత్రాపి స్ఫుటవిస్ఫురన్మరకతద్యుత్యా తమిస్రాయితమ్ ।
మధ్యాలంబివిశాలమౌక్తికరుచా జ్యోత్స్నాయితం కుత్రచి-న్మాతః శ్రీమణిమందిరం తవ సదా వందామహే సుందరం ॥ 08 ॥
ఉత్తుంగాలయవిస్ఫురన్మరకతప్రోద్యత్ప్రభామండలా
న్యాలోక్యాంకురితోత్సవైర్నవతృణాకీర్ణస్థలీశంకయా ।
నీతో వాజిభిరుత్పథం బత రథః సూతేన తిగ్మద్యుతే
ర్వల్గావల్గిగతహస్తమస్తశిఖరం కష్టైరితః ప్రాప్యతే ॥ 09 ॥
మణిసదన సముద్యత్కాంతిధారానురక్తే
వియతి చరమసంధ్యాశంకినో భానురథ్యాః ।
శిధిలితగతకుప్యత్సూతహుంకారనాదైః
కథమపి మణిగేహాదుచ్చకైరుచ్చలంతి ॥ 10 ॥
భక్త్యా కిం ను సమర్పితాని బహుధా రత్నాని పాథోధినా
కింవా రోహణపర్వతేన సదనం యైర్విశ్వకర్మాకరోత్ ।
ఆ జ్ఞాతం గిరిజే కటాక్షకలయా నూనం త్వయా తోషితే
శంభౌ నృత్యతి నాగరాజఫణినా కీర్ణా మణిశ్రేణయః ॥ 11 ॥
విదూరముక్తవాహనైర్వినమమౌలిమండలై
ర్నిబద్ధహస్తసంపుటైః ప్రయత్నసంయతేంద్రియైః ।
విరించివిష్ణుశంకరాదిభీర్ముదా తవాంబికే
ప్రతీక్ష్యమాణనిర్గమో విభాతి రత్నమండపః ॥ 12 ॥
ధ్వనన్మృదంగకాహలః ప్రగీతకింనరీగణః
ప్రనృత్తదివ్యకన్యకః ప్రవృత్తమంగళక్రమః ।
ప్రకృష్టసేవకవ్రజః ప్రహృష్టభక్తమండలో
ముదే మమాస్తు సంతతం త్వదీయరత్నమండపః ॥ 13 ॥
ప్రవేశనిర్గమాకులైః స్వకృత్యరక్తమానసై-
ర్భహిఃస్థితామరావలీవిధీయమానభక్తిభిః ।
విచిత్రవస్త్రభూషణైరు పేతమంగనాజనైః
సదా కరోతు మంగళం మమేహ రత్నమండపః ॥ 14 ॥
సువర్ణరత్నభూషితైర్విచిత్రవస్త్రధారిభి -
ర్గృహీతహేమయష్టిభిర్నిరుద్ధసర్వదైవతైః ।
అసంఖ్యసుందరీజనైః పురస్థితైరధిష్ఠితో
మదీయమేతు మానసం త్వదీయతుంగతోరణః ॥ 15 ॥
ఇంద్రాదీంశ్చ దిగీశ్వరాన్సహపరీవారానథో సాయుధా-
న్యోషిద్రూపధరాన్స్వదిక్షు నిహితాన్సంచింత్య హృత్పంకజే ।
శంఖే శ్రీవసుధారయా వసుమతీయుక్తం చ పద్మం స్మర-
న్కామం నౌమి రతిప్రియం సహచరం ప్రీత్యా వసంతం భజే ॥ 16 ॥
గాయంతీః కలవీణయాతిమధురం హుంకారమాతన్వతీ
ర్వారాభ్యాసకృతస్థితీరిహ సరస్వత్యాదికాః పూజయన్ ।
ర్ద్వారే నౌమి మదోన్మదం సురగణాధీశం మదేనోన్మదాం
మాతంగీమసితాంబరాం పరిలసన్ముక్తావిభూషాం భజే ॥ 17 ॥
కస్తూరికాశ్యామలకోమలాంగీం కాదంబరీపానమదాలసాంగీమ్ ।
వామస్తనాలింగితరత్నవీణాం మాతంగకన్యాం మనసా స్మరామి ॥ 18 ॥
వికీర్ణచికురోత్కరే విగలితాంబరాడంబరే
మదాకులితలోచనే విమలభూషణోద్భాసిని ।
తిరస్కరిణి తావకం చరణపంకజం చింతయ
న్కరోమి పశుమండలీమలికమోహదుగ్ధాశయామ్ ॥ 19 ॥
ప్రమత్తవారుణీర సైర్విఘూర్ణమానలోచనాః
ప్రచండదైత్యసూదనాః ప్రవిష్టభక్తమానసాః ।
ఉపోఢకజ్జలచ్చవిచ్చటావిరాజివిగ్రహాః
కపాలశూలధారిణీః స్తువే త్వదీయదూతికాః ॥ 20 ॥
స్ఫూర్జన్నవ్యయవాంకురోపలసితాభోగైః పురః స్థాపితై
ర్ధీపోద్భాసిశరావశోభితముఖైః కుంభైర్నవైః శోభినా ।
స్వర్ణాబద్ధవిచిత్రరత్నపటలీచంచత్కపాట శ్రియా
యుక్తం ద్వారచతుష్టయేన గిరిజే వందే మణీ మందిరమ్ ॥ 21॥
ఆస్తీర్ణారుణకంబలాసనయుతం పుష్పోపహారాన్వితం
దీప్తానేకమణిప్రదీపసుభగం రాజద్వితానోత్తమమ్ ।
ధూపోద్గారిసుగంధిసంభ్రమమిలద్బృంగావలీగుంజితం
కళ్యాణం వితనోతు మేఽనవరతం శ్రీమండపాభ్యంతరమ్ ॥ 22 ॥
కనకరచితే పంచప్రేతాసనేన విరాజితే
మణిగణచితే రక్తశ్వేతాంబరాస్తరణోత్తమే ।
కుసుమసురభౌ తల్పే దివ్యోపధానసుఖావహే
హృదయకమలే ప్రాదుర్భూతాం భజే పరదేవతామ్ ॥ 238 ॥
సర్వాంగస్థితిరమ్యరూపరుచిరాం ప్రాతః సమభ్యుత్ధితాం
జృంభామంజుముఖాంబుజాం మధుమదవ్యాఘూర్ణదక్షిత్రయామ్ ।
సేవాయాతసమస్తసంనిధిసఖీః సంమానయంతీం దృశా
సంపశ్యన్పరదేవతాం పరమహో మన్యే కృతార్థం జనుః ॥ 24॥
ఉచ్చైస్తోరణవర్తివాద్యనివహధ్వానే సముజ్జృంభితే
భక్తైర్భూమివిలగ్నమౌలిఖీరలం దండప్రణామే కృతే ।
నానారత్నసమూహనద్ధకథనస్థాలీసముద్భాసితాం
ప్రాతస్తే పరికల్పయామి గిరిజే నీరాజనాముజ్జ్వలామ్ ॥ 25 ॥
పాద్యం తే పరికల్పయామి పదయోరర్ఘ్యం తథా హస్తయోః
సౌధీభిర్మధుపర్మమంబ మధురం ధారాభిరాస్వాదయ ।
తోయేనాచమనం విధేహి శుచినా గాంగేన మత్కల్పితం
సాష్టాంగం ప్రణిపాతమీశదయితే దృష్ట్యా కృతార్ధీ కురు ॥ 26 ॥
మాతః పశ్య ముఖాంబుజం సువిమలే దత్తే మయా దర్పణే
దేవి స్వీకురు దంతధావనమిదం గంగాజలేనాన్వితమ్ ।
సుప్రక్షాలితమాననం విరచయన్న్సిగ్ధాంబరప్రోంఛనం
ద్రాగంగీకురు తత్త్వమంబ మధురం తాంబూలమాస్వాదయ ॥ 27॥
నిధేహి మణిపాదుకోపరి పదాంబుజం మజ్జనా
లయం వ్రజ శనైః సఖీకృతకరాంబుజాలంబనమ్ ।
మహేశి కరుణానిధే తవ దృగంతపాతోత్సుకా
న్విలోకయ మనాగమూనుభయసంస్థితాందైవతాన్ ॥ 28॥
హేమరత్నవరణేన వేష్టితం విస్తృతారుణవితానశోభితమ్ ।
సజ్జసర్వపరిచారికాజనం పశ్య మజ్జనగృహం మనో మమ ॥ 29॥
కనకకలశజాలస్ఫాటికస్నానపీఠా ద్యుపకరణవిశాలం గంధమత్తాలిమాలమ్ ।
స్ఫురదరుణవితానం మంజుగంధర్వగానం పరమశివమహేలే మజ్జనాగారమేహి ॥ 30॥
పీనోత్తుంగపయోధరాః పరిలసత్సంపూర్ణచంద్రాననా
రత్నస్వర్ణవినిర్మితాః పరిలసత్సూక్ష్మాంబరప్రావృతాః ।
హేమస్నానఘటీస్తథా మృదుపటిరుద్వర్తనం కౌసుమం
తైలం కంకతికాం కరేషు దధతీర్వందేఽ౦బ తే దాసికాః ॥ 31॥
తత్ర స్ఫాటికపీఠమేత్య శనకైరుత్తారితాలంకృతి
ర్నీచైరుజితకంచుకోపరిహితారక్తోత్తరీయాంబరా ।
వేణీబంధమపాస్య కంకతికయా కేశప్రసాదం మనా
క్కుర్వాణా పరదేవతా భగవతీ చిత్తే మమ ద్యోతతామ్ ॥ 32॥
అభ్యంగం గిరిజే గృహాణ మృదునా తైలేన సంపాదితం
కాశ్మీరైరగరుద్రవైర్మలయజైరుద్వర్తనం కారయ ।
గీతే కింనరకామినీభిరభితో వాద్యే ముదా వాదితే
నృత్యంతీమిహ పశ్య దేవి పురతో దివ్యాంగనామండలీమ్ ॥ 33॥
కృతపరికరబంధాస్తుంగపీనస్తనాఢ్యా
మణినివహనిబద్దా హేమకుంభీర్దధానాః ।
సురభిసలిలనిర్యద్గంధలుబ్దాలిమాలాః
సవినయముపతస్థుః సర్వతః స్నానదాస్యః ॥ 34॥
ఉద్గంధైరగరుద్రవైః సురభిణా కస్తూరికావారిణా
స్ఫూర్జత్సౌరభయక్షకర్థమజలైః కాశ్మీరనీరైరపి ।
పుష్పాంభోభిరశేషతీర్థసలిలైః కర్పూరపాథోభరైః
స్నానం తే పరికల్పయామి గిరిజే భక్త్యా తదంగీకురు ॥ 35 ॥
ప్రత్యంగం పరిమార్జయామి శుచినా వస్త్రేణ సంప్రోంఛనం
కుర్వే కేశకలాపమాయతతరం ధూపోత్తమైర్దూపితమ్ ।
ఆలీబ్బందవినిర్మితాం యవనికామాస్థాప్యరత్నప్రభం
భక్తత్రాణపరే మహేశగృహిణి స్నానాంబరం ముచ్యతామ్ ॥ 36 ॥
పీతం తే పరికల్పయామి నిబిడం చండాతకం చండికే
సూక్ష్మం స్నిగ్ధమురీకురుష్వ వసనం సిందూరపూరప్రభమ్ ।
ముక్తారత్నవిచిత్రహేమరచనాచారుప్రభాభాస్వరం
నీలం కంచుకమర్పయామి గిరిశప్రాణప్రియే సుందరి ॥ 37 ॥
విలులితచికురేణ చ్చాదితాంసప్రదేశే
మణినికరవిరాజత్పాదుకాన్యస్తపాదే ।
సులలితమవలంబ్య ద్రాక్సఖీమంసదేశే
గిరిశగృహిణి భూషామంటపాయ ప్రయాహి ॥ 38 ॥
లసత్కనకకుట్టిమస్ఫురదమందముక్తావలీ -
సముల్లసితకాంతిభిః కలితశక్రచాపవ్రజే ।
మహాభరణమండపే నిహితహేమసింహాసనం
సఖీజనసమావృతం సమధితిష్ఠ కాత్యాయని ॥ 39 ॥
స్నిగ్ధం కంకతికాముఖేన శనకైః సంశోధ్య కేశోత్కరం
సీమంతం విరచయ్య చారు విమలం సిందూరరేఖాన్వితమ్ ।
ముక్తాభిర్గ్రథితాలకాం మణిచితైః సౌవర్ణసూతైః స్ఫుటం
ప్రాంతే మౌక్తికగుచ్చకోపలతికాం గ్రథ్నామి వేణీమిమామ్ ॥ 40॥
విలంబివేణీభుజగోత్తమాంగ స్ఫురన్మణిభ్రాంతిముపానయంతమ్ ।
స్వరోచిషోల్లాసితకేశపాశం మహేశి చూడామణిమర్పయామి ॥ 41 ॥
త్వామాశ్రయద్బిః కబరీతమిస్రై ర్భందీకృతం ద్రాగివ భానుబింబమ్ ।
మృడాని చూడామణిమాదధానం వందామహే తావతముత్తమాంగమ్ ॥ 42 ॥
స్వమధ్యనద్ధహాటకస్ఫురన్మణిప్రభాకులం
విలంబిమౌక్తికచ్చటావిరాజితం సమంతతః ।
నిబద్ధలక్షచక్షుషా భవేన భూరి భావితం
సమర్పయామి భాస్వరం భవాని ఫాలభూషణమ్ ॥ 43 ॥
మీనాంభోరుహఖంజరీటసుషమావిస్తారవిస్మారకే
కుర్వాణే కిల కామవైరిమనసః కందర్పబాణప్రభామ్ ।
మాధ్వీపానమదారుణేఽతిచపలే దీర్ఘే దృగంభోరుహే
దేవి స్వర్ణశలాకయోర్జితమిదం దివ్యాంజనం దీయతామ్ ॥ 44॥
మధ్యస్థారుణరత్నకాంతిరుచిరాం ముక్తాముగోద్భాసితాం
దైవాద్భార్గవజీవమధ్యగరవేర్లక్ష్మీమధః కుర్వతీమ్ ।
ఉత్సిక్తాధరబింబకాంతివిసరైర్బౌమీభవన్మౌక్తికాం
మద్దత్తామురరీకురుష్వ గిరిజే నాసావిభూషామిమామ్ ॥ 45 ॥
ఉడుకృతపరివేషస్సర్థయా శీతభానో-
రివ విరచితదేహద్వంద్వమాదిత్యబింబమ్ ।
అరుణమణిసముద్యత్ప్రాంతవిభ్రాజిముక్తం
శ్రవసి పరినిధేహి స్వర్ణతాటంకయుగ్మమ్ ॥ 46 ॥
మరకతవరపద్మరాగహీరో త్ధితగులికాత్రితయావనద్ధమధ్యమ్ ।
వితతవిమలమౌక్తికం చ కంఠాభరణమిదం గిరిజే సమర్పయామి ॥ 47 ॥
నానాదేశసముత్ధితైర్మణిగణ ప్రోద్యత్ప్రభామండల
వ్యాపైరాభరణైర్విరాజితగలాం ముక్తాచ్చటాలంకృతామ్ ।
మధ్యస్థారుణరత్నకాంతిరుచిరాం ప్రాంతస్థముక్తాఫల
వ్రాతామంబ చతుష్కికాం పరశివే వక్షఃస్థలే స్థాపయ ॥ 48॥
అన్యోన్యం ప్లావయంతీ సతతపరిచలత్కాంతికల్లోలజాలైః
కుర్వాణా మజ్జదంతఃకరణవిమలతాం శోభితేవ త్రివేణీ ।
ముక్తాభిః పద్మరాగైర్మరకతమణిభిర్నిర్మితా దీప్యమానై-
ర్నిత్యం హారత్రయీ తే పరశివరసికే చేతసి ద్యోతతాం నః ॥ 49॥
కరసరసిజనాలే విస్ఫురత్కాంతిజాలే
విలసదమలశోభే చంచదీశాక్షిలోభే ।
వివిధమణిమయూఖోద్భాసితం దేవి దుర్గే
కనకకటకయుగ్మం బాహుయుగ్మే నిధేహి ॥ 50॥
వ్యాలంబమానసితపట్టకగుచ్చశోభి
స్ఫూర్జన్మణీఘటితహారవిరోచమానమ్ ।
మాతర్మహేశమహిలే తవ బాహుమూలే
కేయూరకద్వయమిదం వినివేశయామి ॥ 51॥
వితతనిజమయూఖైర్నిర్మితామింద్రనీలై
ర్విజితకమలనాలాలీనమత్తాలిమాలామ్ ।
మణిగణఖచితాభ్యాం కంకణాభ్యాముపేతాం
కలయ వలయరాజీం హస్తమూలే మహేశి ॥ 52॥
నీలపట్టమృదుగుచ్చశోభితా బద్ధనైకమణిజాలమంజులామ్ ।
అర్పయామి వలయాత్సురఃసరే విస్ఫురత్కనకతైతృపాలికామ్ ॥ 53॥
ఆలవాలమివ పుష్పధన్వనా బాలవిద్రుమలతాసు నిర్మితమ్ ।
అంగులీషు వినిధీయతాం శనై రంగులీయకమిదం మదర్చితమ్ ॥ 54॥
విజితహరమనోభూమత్తమాతంగకుంభ
స్థలవిలులితకూజత్కింకిణీజాలతుల్యామ్ ।
అవిరతకలనదైరీశచేతో హరంతీం
వివిధమణినిబద్ధాం మేఖలామర్పయామి ॥ 55॥
వ్యాలంబమానవరమౌక్తికగుచ్చశోభి
విభ్రాజిహాటకపుటద్వయరోచమానమ్ ।
హేమ్నా వినిర్మితమనేకమణి ప్రబంధం
నీవీనిబంధనగుణం వినివేదయామి ॥ 56॥
వినిహతనవలాక్షాపంకబాలాతపౌఘే
మరకతమణిరాజీమంజుమంజీరఘోషే ।
అరుణమణిసముద్యత్కాంతిధారావిచిత్ర-
స్తవ చరణసరోజే హంసకః ప్రీతిమేతు ॥ 57॥
నిబద్ధశితిపట్టకప్రవరగుచ్చసంశోభితాం
కలక్వణితమంజులాం గిరిశచిత్తసంమోహనీమ్ ।
అమందమణిమండలీవిమలకాంతికిమ్మీరితాం
నిధేహి పదపంకజే కనకఘుంఘురూమంబికే ॥ 58॥
విస్ఫురత్సహజరాగరంజితే శింజితేన కలితాం సఖీజనైః ।
పద్మరాగమణినూపురద్వయీ మర్పయామి తవ పాదపంకజే ॥ 59॥
పదాంబుజముపాసితుం పరిగతేన శీతాంశునా
కృతాం తనుపరమ్బరామివ దినాంతరాగారుణామ్ ।
మహేశి నవయావకద్రవభరేణ శోణీకృతాం
నమామి నఖమండలీం చరణపంకజస్థాం తవ ॥ 60॥
ఆరక్తశ్వేతపీతస్ఫురదురుకసుమైశ్చిత్రితాం పట్టసూత్రై
ర్దేవస్త్రీభిః ప్రయత్నాదగరుసముదితైర్థూపితాం దివ్యధూపైః ।
ఉద్యద్గంధాంధపుష్పంధయనివహసమారబ్ధఝాంకారగీతాం
చంచత్కహ్లారమాలాం పరశివరసికే కంఠపీఠేఽర్పయామి ॥ 61॥
గృహాణ పరమామృతం కనకపాత్రసంస్థాపితం
సమరయ ముఖాంబుజే విమలవీటికామంబికే ।
విలోకయ ముఖాంబుజం ముకురమండలే నిర్మలే
నిధేహి మణిపాదుకోపరి పదాంబుజం సుందరి ॥ 62॥
ఆలంబ్య స్వసఖీం కరేణ శనకైః సింహాసనాదుత్ధితా
కూజన్మందమరాలమంజులగతిప్రోల్లాసిభూషాంబర ।
ఆనంద ప్రతిపాదకైరుపనిషద్వాక్యైః స్తుతా వేధసా
మచ్చిత్తే స్థిరతాముపైతు గిరిజా యాంతీ సభామండపమ్ ॥ 63 ॥
చలంత్యామంబాయాం ప్రచలతి సమస్తే పరిజనే
సవేగం సంయాతే కనకలతికాలంకృతిభరే ।
సమతాదుత్తాలస్ఫురితపదసంపాతజనితై
రణత్కారైస్తారైరణఝ ణితమాసీన్మణిగృహమ్ ॥ 64॥
చంచద్వేత్రకరాభిరంగవిలసద్భూషాంబరాభిః పురో
యాంతీభిః పరిచారికాభిరమరవ్రాతే సముత్సారితే ।
రుద్దే నిర్జరసుందరీభిరభితః కక్షాంతరే నిర్గతం
వందే నందితశంభు నిర్మలచిదానందైకరూపం మహః ॥ 65 ॥
వేధాః పాదతలే పతత్యయమసౌ విష్ణుర్నమత్యగ్రతః
శంభుర్దేహి దృగంచలం సురపతిం దూరస్థమాలోకయ ।
ఇత్యేవం పరిచారికాభిరుదితే సంమాననాం కుర్వతీ
దృగ్ధ్వంద్వేన యథోచితం భగవతీ భూయాద్విభూత్యై మమ ॥ 66 ॥
మందం చారణసుందరీభిరభితో యాంతీభిరుత్కంఠయా
నామోచ్చారణపూర్వకం ప్రతిదిశం ప్రత్యేకమావేదితాన్ ।
వేగాదక్షిపథం గతాన్సురగణానాలోకయంతీ శనై
ర్దిత్సంతీ చరణాంబుజం పథి జగత్పాయాన్మహేశ ప్రియా ॥ 67 ॥
అగ్రే కేచన పార్శ్వయోః కతిపయే పృష్ఠే పరే ప్రస్థితా
ఆకాశే సమవస్థితాః కతిపయే దిక్షు స్థితాశ్చాపరే ।
సంమర్దం శనకైరపాస్య పురతో దండప్రణామాన్ముహుః
కుర్వాణాః కతిచిత్సురా గిరిసుతే దృక్పాతమిచ్చంతి తే ॥ 68 ॥
అగ్రే గాయతి కింనరీ కలపదం గంధర్వకాంతాః శనై
రాతోద్యాని చ వాదయంతి మధురం సవ్యాపసవ్యస్థితాః ।
కూజన్నూపురనాద మంజు పురతో నృత్యంతి దివ్యాంగనా
గచ్చంతః పరితః స్తువంతి నిగమస్తుత్యా విరించ్యాదయః ॥ 69 ॥
కస్మైచిత్సుచిరాదుపాసితమహామంత్రౌఘసిద్ధిం క్రమా-
దేకస్మై భవనిఃస్పృహాయ పరమానందస్వరూపాం గతిమ్ ।
అన్యస్మై విషయానురక్తమనసే దీనాయ దుఃఖాపహం
ద్రవ్యం ద్వారసమాశ్రితాయ దదతీం వందామహే సుందరీమ్ ॥ 70 ॥
నమ్రీభూయ కృతాంజలిప్రకటితప్రేమప్రసన్నాననే
మందం గచ్చతి సంనిధౌ సవినయాత్సోత్కంఠమోఘత్రయే ।
నానామంత్రగణం తదర్ధమఖిలం తత్సాధనం తత్ఫలం
వ్యాచక్షాణముదగ్రకాంతి కలయే యత్కించిదాద్యం మహః ॥ 71 ॥
తవ దహనసదృక్షైరీక్షణైరేవ చక్షు
ర్నిఖిలపశుజనానాం భీషయద్భీషణాస్యమ్ ।
కృతవసతి పరేశప్రేయసి ద్వారి నిత్యం
శరభమిథునముచ్చైర్భక్తియుకో నతోఽస్మి ॥ 72 ॥
కల్పాంతే సరసైకదాసముదితానేకార్కతుల్యప్రభాం
రత్నస్తంభనిబద్ధకాంచనగుణస్ఫూర్జద్వితానోత్తమామ్ ।
కర్పూరాగరుగర్భవర్తికలికాప్రాప్తప్రదీపావలీం
శ్రీచక్రాకృతిముల్లసన్మణిగణాం వందామహే వేదికామ్ ॥ 73 ॥
స్వస్థానస్థితదేవతాగణవృతే బిందౌ ముదా స్థాపితం
నానారత్నవిరాజి హేమవిలసత్కాంతిచ్చటాదుర్దినమ్ ।
చంచత్కౌసుమతూలికాసనయుతం కామేశ్వరాధిష్టితం
నిత్యానందనిదానమంబ సతతం వందే చ సింహాసనమ్ ॥ 74 ॥
వదద్భిరభితో ముదా జయ జయేతి బృందారకైః
కృతాంజలిపరంపరా విదధతి కృతార్ధా దృశా ।
అమందమణిమండలీఖచితహేమసింహాసనం
సఖీజనసమావృతం సమధితిష్ఠ దాక్షాయణి ॥ 75 ॥
కర్పూరాదికవస్తుజాతమఖిలం సౌవర్ణభృంగారకం
తాంబూలస్య కరండకం మణిమయం చైలాంచలం దర్చణమ్ ।
విస్ఫూర్జన్మణిపాదుకే చ దధతీః సింహాసనస్యాభిత
స్తిష్ఠంతీః పరిచారికాస్తవ సదా వందామహే సుందరి ॥ 76 ॥
త్వదమలవపురుద్యత్కాంతికల్లోలజాలైః
స్ఫుటమివ దధతీభిర్భాహువిక్షేపలీలామ్ ।
ముహురపి చ విధూతే చామరగ్రాహిణీభిః
సితకరకరశుభ్రే చామరే చాలయామి ॥ 77 ॥
ప్రాంతస్ఫురద్విమలమౌక్తికగుచ్చజాలం
చంచన్మహామణివిచిత్రితహేమదండమ్ ।
ఉద్యత్సహస్రకరమండలచారు హేమ
చ్ఛత్రం మహేశమహిలే వినివేశయామి ॥ 78 ॥
ఉద్యత్తావకదేహకాంతిపటలీసిందూరపూర ప్రభా
శోణీభూతముదగ్రలోహితమణిచ్చేదానుకారిచ్చవి ।
దూరాదాదరనిర్మితాంజలిపుటైరాలోకమానం సుర
వ్యూహైః కాంచనమాతపత్రమతులం వందామహే సుందరమ్ ॥ 79 ॥
సంతుష్టాం పరమామృతేన విలసత్కామేశ్వరాంకస్థితాం
పుష్పౌఘైరభిపూజితాం భగవతీం త్వాం వందమానా ముదా ।
స్ఫూర్జత్తావకదేహరశ్మికలనాప్రాప్తస్వరూపాభిదాః
శ్రీచక్రావరణస్థితాః సవినయం వందామహే దేవతాః ॥ 80 ॥
ఆధారశక్త్యాదికమాకలయ్య మధ్యే సమస్తాధికయోగినీం చ।
మిత్రేశనాథాదికమత్ర నాథ చతుష్టయం శైలసుతే నతోఽస్మి ॥ 81 ॥
త్రిపురాసుధార్ణవాసన మారభ్య త్రిపురమాలినీ యావత్ ।
ఆవరణాష్టకసంస్థిత మాసనషట్కం నమామి పరమేశి ॥ 82 ॥
ఈశానే గణపం స్మరామి విచరద్విఘ్నాంధకారచ్చిదం
వాయవ్యే వటుకం చ కజ్జలరుచిం వ్యాలోపవీతాన్వితమ్ ।
నైరృత్యే మహిషాసురప్రమధినీం దుర్గాం చ సంపూజయ
న్నాగ్నేయేఽఖిలభక్తరక్షణపరం క్షేత్రాధినాథం భజే ॥ 83 ॥
ఉడ్యానజాలంధరకామరూప పీఠానిమాన్పూర్ణగిరిప్రసక్తాన్ ।
త్రికోణదక్షాగ్రిమసవ్యభాగ మధ్యస్థితాన్సిద్ధికరాన్నమామి ॥ 84 ॥
లోకేశః పృథివీపతిర్నిగదితో విష్ణుర్జలానాం ప్రభు
స్తేజోనాథ ఉమాపతిశ్చ మరుతామీశస్తథా చేశ్వరః ।
ఆకాశాధిపతిః సదాశివ ఇతి ప్రేతాభిధామాగతా-
నేతాంశ్చక్రబహిఃస్థితాన్సురగణాన్వందామహే సాదరమ్ ॥ 85 ॥
తారానాథకలాప్రవేశనిగమవ్యాజాద్గతాసుప్రథం
తైలోక్యే తిథిషు ప్రవర్తితకలాకాష్ఠాదికాలక్రమమ్ ।
రత్నాలంకృతిచిత్రవస్త్రలలితం కామేశ్వరీపూర్వకం
నిత్యాషోడశకం నమామి లసితం చక్రాత్మనోరంతరే ॥ 86 ॥
హృది భావితదైవతం ప్రయత్నా భ్యుపదేశానుగృహీతభక్తసంఘమ్ ।
స్వగురుక్రమసంజ్ఞచక్రరాజ స్థితమోఘత్రయమానతోఽస్మి మూర్ధ్నా ॥ 87॥
హృదయమథ శిరః శిఖాఖిలాద్యే కవచమథో నయనత్రయం చ దేవి ।
మునిజనపరిచింతితం తథాస్త్రం స్ఫురతు సదా హృదయే షడంగమేతత్ ॥ 88 ॥
త్రైలోక్యమోహనమితి ప్రథితే తు చక్రే చంచద్విభూషణగణత్రిపురాధివాసే ।
రేఖాత్రయే స్థితవతీరణిమాదిసిద్ధీ ర్ముద్రా నమామి సతతం ప్రకటాభిధాస్తా ॥ 89 ॥
సర్వాశాపరిపూరకే వసుదలద్వంద్వేన విభ్రాజితే
విస్ఫూర్జంత్రిపురేశ్వరీనివసతౌ చక్రే స్థితా నిత్యశః ।
కామాకర్షణికాదయో మణిగణభ్రాజిష్ణుదివ్యాంబరా
యోగిన్యః ప్రదిశంతు కాంక్షితఫలం విభఖ్యాతగుప్తాభిధాః ॥ 90 ॥
మహేశి వసుభిర్దలైర్లసతి సర్వసంక్షోభణే
విభూషణగణస్ఫురంత్రిపురసుందరిసద్మని ।
అనంగకుసుమాదయో వివిధభూషణోద్భాసితా
దిశంతు మమ కాంక్షితం తనుతరాశ్చ గుప్తాభిధాః ॥ 91 ॥
లసద్యుగదృశారకే స్ఫురతి సర్వసౌభాగ్యదే
శుభాభరణభూషితత్రిపురవాసినీమందిరే ।
స్థితా దధతు మంగళం సుభగసర్వసంక్షోభిణీ-
ముఖాః సకలసిద్ధయో విదితసంప్రదాయాభిధాః ॥ 92॥
బహిర్దశారే సర్వార్థసాధకే త్రిపురాశ్రయాః ।
కులకౌలాభిధాః పాంతు సర్వసిద్ధిప్రదాయికాః ॥ 93॥
అంతఃశోభిదశారకేఽతిలలితే సర్వాదిరక్షాకరే
మాలిన్యా త్రిపురాద్యయా విరచితావాసే స్థితం నిత్యశః ।
నానారత్నవిభూషణం మణిగణభ్రాజిష్ణు దివ్యాంబరం
సర్వజ్ఞాదికశక్తిబృందమనిశం వందే నిగర్భాభిధమ్ ॥ 94॥
సర్వరోగహరేఽష్టారే త్రిపురాసిద్ధయాన్నితే ।
రహస్యయోగినీర్నిత్యం వశిన్యాద్యా నమామ్యహమ్ ॥ 95 ॥
చూతాశోకవికాసికేతకరజః ప్రోద్భాసినీలాంబుజ
ప్రస్ఫూర్జన్నవమల్లికాసముదితైః పుష్పైః శరాన్నిర్మితాన్ ।
రమ్యం పుష్పశరాసనం సులలితం పాశం తథా చాంకుశం
వందే తావకమాయుధం పరశివే చక్రాంతరాలేస్థితమ్ ॥ 96 ॥
త్రికోణ ఉదితప్రభే జగతి సర్వసిద్ధిప్రదే
యుతే త్రిపురయాంబయా స్థితవతీ చ కామేశ్వరీ ।
తనోతు మమ మంగళం సకలశర్మ వజ్రేశ్వరీ
కరోతు భగమాలినీ స్ఫురతు మామకే చేతసి ॥ 97 ॥
సర్వానందమయే సమస్తజగతామాకాంక్షితే బైందవే
భైరవ్యా త్రిపురాద్యయా విరచితావాసే స్థితా సుందరీ ।
ఆనందోల్లసితేక్షణా మణిగణభ్రాజిష్ణుభూషాంబరా
విస్ఫూర్జద్వదనా పరాపరరహః సా మాం పాతు యోగినీ ॥ 98 ॥
ఉల్లసత్కనకకాంతిభాసురం సౌరభస్ఫురణవాసితాంబరమ్ ।
దూరతః పరిహృతం మధువ్రతై రర్పయామి తవ దేవి చంపకమ్ ॥ 99 ॥
వైరముద్ధతమపాస్య శంభునా మస్తకే వినిహితం కలాచ్చలాత్ ।
గంధలుబ్ధమధుపాశ్రితం సదా కేతకీకుసుమమర్పయామి తే ॥ 100 ॥
చూర్ణీకృతం ద్రాగివ పద్మజేన త్వదాననస్పర్థిసుధాంశుబింబమ్ ।
సమర్పయామి స్ఫుటమంజలిస్థం వికాసిజాతీకుసుమోత్కరం తే ॥ 101 ॥
అగరుబహలధూపాజస్రసౌరభ్యరమ్యాం
మరకతమణిరాజీరాజిహారిస్రగాభామ్ ।
దిశి విదిశి విసర్పద్గంధలుబ్ధాలిమాలాం
వకులకుసుమమాలాం కంఠపీఠేఽర్పయామి ॥ 102 ॥
ఈంకారోద్ధ్వగబిందురాననమధోబిందుద్వయం చ స్తనౌ
త్రైలోక్యే గురుగమ్యమేతదఖిలం హారం చ రేఖాత్మకమ్ ।
ఇత్థం కామకలాత్మికాం భగవతీమంతః సమారాధయ
న్నానందాంబుధిమజ్జనే ప్రలభతామానందథుం సజ్జనః ॥ 103 ॥
ధూపం తేఽగరుసంభవం భగవతి ప్రోల్లాసిగంధోద్దురం
దీపం చైవ నివేదయామి మహసా హార్దాంధకారచ్చిదమ్ ।
రత్నాస్వర్ణవినిర్మితేషు పరితః పాత్రేషు సంస్థాపితం
నైవేద్యం వినివేదయామి పరమానందాత్నికే సుందరి ॥ 104 ॥
జాతీకోరకతుల్యమోదనమిదం సౌవర్ణపాత్రే స్థితం
శుద్ధాన్నం శుచి ముద్గమాషచణకోద్భూతాస్తథా సూపకాః ।
ప్రాజ్యం మాహిషమాజ్యముత్తమమిదం హైయంగవీనం పృథ
క్పాత్రేషు ప్రతిపాదితం పరశివే తత్సర్వమంగీకురు ॥ 105 ॥
శింబీసూరణశాకబింగృహతీకూశ్మాండకోశాతకీ
వృంతాకాని పటోలకాని మృదునా సంసాధితాన్యగ్నినా ।
సంపన్నాని చ వేసవారవిసరైర్దివ్యాని భక్త్యా కృతా
న్యగ్రే తే వినివేదయామి గిరిజే సౌవర్ణపాత్రవ్రజే ॥ 106 ॥
నింబూకార్ద్రకచూతకందకదలీకౌశాతకీ కర్కటీ
ధాత్రీబిల్వకరీరకైర్విరచితాన్యానందచిద్విగ్రహే ।
రాజీభిః కటుతైల సైంధవహరిద్రాభిః స్థితాన్పాతయే
సంధానాని నివేదయామి గిరిజే భూరిప్రకారాణి తే ॥ 107 ॥
సితయాంచితలడ్డుకవ్రజాన్మృదుపూపాన్మృదులాశ్చ పూరికాః ।
పరమాన్నమిదం చ పార్వతి ప్రణయేన ప్రతిపాదయామి తే ॥ 108 ॥
దిగ్ధమేతదనలే సుసాధితం చంద్రమండలనిభం తథా దధి ।
ఫాణితం శిఖరిణీం సితాసితాం సర్వమంబ వినివేదయామి తే ॥ 109 ॥
అగ్రే తే వినివేద్య సర్వమమితం నైవేద్యమంగీకృతం
జ్ఞాత్వా తత్త్వచతుష్టయం ప్రథమతో మన్యే సుతృప్తాం తతః ।
దేవీం త్వాం పరిశిష్టమంబ కనకామత్రేషు సంస్థాపితం
శక్తిభ్యః సముపాహారామి సకలం దేవేశి శంభుప్రియే ॥ 110 ॥
వామేన స్వర్ణపాత్రీమనుపమపరమాన్నేన పూర్ణాం దధానా
మన్యేన స్వర్ణదర్వీం నిజజనహృదయాభీష్టదాం ధారయంతీమ్ ।
సిందూరారక్తవస్త్రాం వివిధమణిలసద్భూషణాం మేచకాంగీం
తిష్టంతీమగ్రతస్తే మధుమదముదితామన్నపూర్ణాం నమామి ॥ 111 ॥
పంక్త్యోపవిష్టాన్పరితస్తు చక్రం శక్త్యా స్వయాలింగితవామభాగాన్ ।
సర్వోపచారైః పరిపూజ్య భక్త్యా తవాంబికే పారిషదాన్నమామి ॥ 112 ॥
పరమామృతమత్తసుందరీ గణమధ్యస్థితమర్కభాసురమ్ ।
పరమామృతఘూర్ణితేక్షణం కిమపి జ్యోతిరుపాస్మహే పరమ్ ॥ 113 ॥
దృశ్యతే తవ ముఖాంబుజం శివే
శ్రూయతే స్ఫుటమనాహతధ్వనిః ।
అర్చనే తవ గిరామగోచరే న
ప్రయాతి విషయాంతరం మనః ॥ 114 ॥
త్వన్ముఖాంబుజవిలోకనోల్లస
త్ప్రేమనిశ్చలవిలోచనద్వయీమ్ ।
ఉన్మనీముపగతాం సభామిమాం
భావయామి పరమేశి తావకీమ్ ॥ 115 ॥
చక్షుః పశ్యతు నేహ కించన పరం ఘ్రాణం న వా జిష్రుతు
శ్రోత్రం హంత శ్రుణోతు న త్వగపి న స్పర్శం సమాలంబతామ్ ।
జిహ్వా వేత్తు న వా రసం మమ పరం యుష్మత్స్వరూపామృతే
నిత్యానందవిఘూర్ణమాననయనే నిత్యం మనో మజ్జతు ॥ 116 ॥
యస్త్వాం పశ్యతి పార్వతి ప్రతిదినం ధ్యానేన తేజోమయీం
మన్యే సుందరి తత్త్వమేతదఖిలం వేదేషు నిష్ఠాం గతమ్ ।
యస్తస్మిన్సమయే తవార్చనవిధావానందసాంద్రాశయో
యాతోఽహం తదభిన్నతాం పరశివే సోఽయం ప్రసాదస్తవ ॥ 117 ॥
గణాధినాథం వటుకం చ యోగినీః క్షేత్రాధినాథం చ విదిక్చతుష్టయే ।
సర్వోపచారైః పరిపూజ్య భక్తితో నివేదయామో బలిముక్తయుక్తిభిః ॥ 118 ॥
వీణాముపాంతే ఖలు వాదయంత్యై నివేద్య శేషం ఖలు శేషికాయె ।
సౌవర్ణబృంగారవినిర్గతేన జలేన శుద్ధాచమనం విధేహి ॥ 119 ॥
తాంబూలం వినివేదయామి విలసత్కర్ఫూరకస్తూరికా
జాతీపూగలవంగచూర్ణఖదిరైర్భక్త్యా సముల్లాసితమ్ ।
స్ఫూర్జద్రత్నసముద్గకప్రణిహితం సౌవర్ణపాత్రే స్థితై
ర్దీపైరుజ్జ్వలమాన్నచూర్ణరచితైరారార్తికం గృహ్యతామ్ ॥ 120 ॥
కాచిద్గాయతి కింనరీ కలపదం వాద్యం దధానోర్వశీ
రంభా నృత్యతి కేలిమంజులపదం మాతః పురస్తాత్తవ ।
కృత్యం ప్రోజ్య సురస్త్రియో మధుమదవ్యాఘూర్ణమానేక్షణం
నిత్యానందసుధాంబుధిం తవ ముఖం పశ్యంతి దృశ్యంతి చ ॥ 121 ॥
తాంబూలోద్భాసివక్త్రైస్త్వదమలవదనాలోకనోల్లాసినేత్రై
శ్చక్రస్థైః శక్తిసంఘైః పరిహృతవిషయాసంగమాకర్ణ్యమానమ్ ।
గీతజ్ఞాభిః ప్రకామం మధురసమధురం వాదితం కింనరీభి
ర్వీణాఝంకారనాదం కలయ పరశివానందసంధానహేతోః ॥ 122 ॥
అర్చావిధౌ జ్ఞానలవోఽపి దూరే దూరే తదాపాదకవస్తుజాతమ్ ।
ప్రదక్షిణీకృత్య తతోఽర్చనం తే పంచోపచారాత్మకమర్పయామి ॥ 123 ॥
యథేప్సితమనోగతప్రకటి తోపచారార్చితం
నిజావరణదేవతాగణవృతాం సురేశస్థితామ్ ।
కృతాంజలిపుటో ముహుః కలితభూమిరష్టాంగకై-
ర్నమామి భగవత్యహం త్రిపురసుందరి త్రాహి మామ్ ॥ 124 ॥
విజ్ఞప్తీరవధేహి మే సుమహతా యత్నేన తే సంనిధిం
ప్రాప్తం మామిహ కాందిశీకమధునా మాతర్న దూరీకురు ।
చిత్తం త్వత్పదభావనే వ్యభిచరేద్దృగ్వాక్చ మే జాతు చే
త్తత్సౌమ్యే స్వగుణైర్భధాన న యథా భూయో వినిర్గచ్చతి ॥ 125 ॥
క్వాహం మందమతిః క్వ చేదమఖిలైరేకాంతభకైః స్తుతం
ధ్యాతం దేవి తథాపి తే స్వమనసా శ్రీపాదుకాపూజనమ్ ।
కాదాచిత్కమదీయచింతనవిధౌ సంతుష్టయా శర్మదం
స్తోత్రం దేవతయా తయా ప్రకటితం మన్యే మదీయాననే ॥ 126 ॥
నిత్యార్చమిదం చిత్తే భావ్యమానం సదా మయా ।
నిబద్ధం వివిధైః పద్యైరనుగృహ్ణాతు సుందరీ ॥ 127 ॥
