అ కల్పశాఖిగణసత్ప్రసూనమధుపానకేలికుతుకభ్రమత్‌
షట్పదారవమనోహరే కనకభూధరే లలితమణ్డపే ।
అత్యుదారమణిపీఠమధ్యవినివాసినీమఖిలమోహినీం
భక్తియోగసులభాం భజే భువనమాతరం త్రిపురసున్దరీమ్‌ ॥ 01 ॥
ఏకకాలసముదీయమానతరుణార్కకోటి సదృశస్ఫుర -
ద్దేహకాన్తిభరధోరణీమిలనలోహితీకృతదిగన్తరామ్‌ ।
వాగధీతవిభవాం విపద్యభయదాయినీమఖిలమోహినీం
ఆగమార్థమణిదీపికామనిశమాశ్రయే త్రిపురసున్దరిమ్‌ ॥ 02 ॥
ఈషదున్మిషదమర్త్యశాఖికుసుమావలీవిమలతారకా-
వృన్దసున్దరసుధాంశుఖణ్డసుభగీకృతాతిగురుకైశికామ్‌ ।
నీలకుఞ్చితఘనాలకాం నిటిలభుషణాయతవిలోచనాం
నీలకణ్ఠసుకృతోన్నతిం సతతమాశ్రయే త్రిపురసున్దరీమ్‌ ॥ 08 ॥
లక్ష్మహీనవిధులక్షనిర్జితవిచక్షణాననసరోరుహాం
ఇక్షుకార్ముకశరాసనోపమితచిల్లికాయుగమతల్లికామ్‌ ।
లక్షయే మనసి సన్తతం సకలదుష్కృతక్షయవిధాయినీం
ఉక్షవాహనతపోవిభూతిమహదక్షరాం త్రిపురసున్దరీమ్‌ ॥ 04 ॥
హ్రీమదప్రమదకామకౌతుకకృపాదిభావపిశునాయత-
స్నిగ్ధముగ్ధవిశదత్రివర్ణవిమలాలసాలసవిలోచనామ్‌ ।
సున్దరాధరమణిప్రభామిలితమన్దహాసనవచన్ద్రికాం
చన్ద్రశేఖరకుటుమ్బినీమనిశమాశ్రయే త్రిపురసున్దరీమ్‌ ॥ 05 ॥
హస్తమృష్టమణిదర్పణోజ్జ్వలమనోజ్ఞదణ్డఫలకద్వయే
బిమ్బితానుపమకుణ్డలస్తబకమణ్డితాననసరోరుహామ్‌ ।
స్వర్ణప్కజదలాన్తరుల్లసితకర్ణికాసదృశనాసికాం
కర్ణవైరిసఖసోదరీమనిశమాశ్రయే త్రిపురసున్దరీమ్‌ ॥ 06 ॥
సన్మరన్దరసమాధురీతులనకర్మఠాక్షరసముల్లస -
న్నర్మపేశలవచోవిలాసపరిభూతనిర్మలసుధారసామ్‌ ।
కమ్రవక్త్రపవనాగ్రహప్రచలదున్మిషద్భ్రమరమణ్డలాం
తుర్మహే మనసి శర్మదామనిశమమ్భికాం త్రిపురసున్దరీమ్‌ ॥ 07 ॥
కమ్రకాన్తిజితతారపూరమణిసూత్రమణ్డలసముల్లసత్‌
కణ్ఠకాణ్డకమనీయతాపహృతకమ్బురాజరుచిడమ్బరామ్‌ ।
కిఞ్చిదానతమనోహరాం సయుగచుమ్బిచారుమణికర్ణికాం
పఞ్చబాణపరిపన్థిపుణ్యలహరీం భజే త్రిపురసున్దరీమ్‌ ॥ 08 ॥
హస్తపద్మలసదిక్షుచాపసృణిపాశపుష్పవిశిఖోజ్జ్వలాం
తప్తహేమరచితాభిరామకటక్గాలీయవలయాదికామ్‌ ।
వృత్తనిస్తులనిరన్తరాలకఠినోన్నతస్తనతృణీభవ -
న్మత్తహస్తివరమస్తకాం మనసి చిన్తయే త్రిపురసున్దరీమ్‌ ॥ 09 ॥
లక్షగాఢపరిరమ్భతుష్టహరహాసగౌరతరలోల్లసత్‌
చారుహారనికరాభిరామకుచభారతాన్తతనుమధ్యమామ్‌ ।
రోమరాజిలలితోదరీమధికనిమ్ననాభిమవలోకయే
కామరాజపరదేవతామనిశమాశ్రయే త్రిపురసున్దరీమ్‌ ॥ 10 ॥
హీరమణ్డలనిరన్తరోల్లసితజాతరూపమయమేఖలా
చారుకాన్తిపరిరమ్భసున్దరసుసూక్ష్మచీనవసనాఞ్చితామ్‌ ।
మారవీరరసచాతురీధృతధురీణత్గుఙ్గజఘనస్థలాం
ధారయే మనసి సన్తతం త్రిదశవన్దితాం ప్రిపురసున్దరీమ్‌ ॥ 11 ॥
సప్తసప్తకిరణానభిజ్ఞపరివర్ధమానకదలీతను
స్పర్థిముగ్ధమధురోరుదణ్డయుగమన్దితేన్దుధరలోచనామ్‌ ।
వృత్తజానుయుగవల్గుభావజితచిత్తసమ్భవసముద్గకాం
నిత్యమేవ పరిశీలయే మనసి ముక్తిదాం త్రిపురసున్దరీమ్‌ ॥ 12 ॥
కణ్ఠకాణ్డరుచికుణ్డతాకరణలీలయా సకలకేకినాం
జఙ్ఘయా తులితకేతకీముకులస్ఘయా భృతముదఞ్చితామ్‌ ।
అమ్బుజోదరవిడమ్బిచారుపదపల్లవాం హృదయదర్చణే
బిమ్బితామివ విలోకయే సతతమమ్బికాం త్రిపురసున్దరీమ్‌ ॥ 13 ॥
లభ్యమానకమలార్చనప్రణతితత్పరైరనిశమాస్థయా
కల్పకోటిశతసఞ్చితేన సుకృతేన కైశ్చన నరోత్తమైః ।
కల్పశాఖిగణకల్ప్వమానకనకాభిషేకసుభగాకృతిం
కల్పయామి హృది చిత్పయోజనవషట్పదీం త్రిపురసున్దరీమ్‌ ॥ 14 ॥
హ్రీమితి ప్రథితమన్త్రమూర్తిరచలాత్మజేత్యుదధికన్యకే
త్యమ్బుజాసనకుటుమ్బినీతి వివిధోపగీతమహిమోదయామ్‌ ।
సేవకాభిమతకామధేనుమఖిలాగమావగమవైభవాం
భావయామి హృది భావితాఖిలచరాచరాం త్రిపురసున్దరీమ్‌ ॥ 15 ॥
స్తోత్రరాజమముమాత్తమోదమహరాగమే ప్రయతమానసో
కీర్తయన్నిహ నరోత్తమో విజితవిత్తపో విపులసమ్పదామ్‌ ।
ప్రార్ధ్యమానపరిరమ్బకేలిరబలాజనైరపగతైషణో
గాత్రమాత్రపతనావధావమృతమక్షరం పదమవాప్నుయాత్‌ ॥ 16 ॥
॥ ఇతి త్రిపురాతిలకస్తోత్రం సమాప్తం ॥
No comments:
Post a Comment