శ్రీగణేశాయ నమః ॥
ధ్యానం
ఓం చంచన్మౌక్తికహేమమండనయుతా మాతాఽతిరక్తాంబరా
తన్వంగీ నయనత్రయాతిరుచిరా బాలార్కవద్భాసురా ।
యా దివ్యాంకుశపాశభూషితకరా దేవీ సదా భీతిహా
చిత్తస్థా భువనేశ్వరీ భవతు నః సేయం ముదః సర్వదా ॥
కర్ణస్వర్ణవిలోలకుడలధరామాపీనవక్షోరుహాం
ముక్తాహారవిభూషణాం పరిలసద్ధమ్మిల్లసన్మల్లికాం ।
లీలాలోలితలోచనాం శశిముఖీమాబద్ధకాంచీస్రజం
దీవ్యంతీం భువనేశ్వరీమనుదినం వందామహే మాతరం ॥
ఐందవ్యా కలయావతంసితశిరోవిస్తారినాదాత్మకం
తద్రూపం జనని స్మరామి పరమం సన్మాత్రమేకం తవ ।
యత్రోదేతి పరాభిధా భగవతీ భాసాం హి తాసాం పదం
పశ్యంతీ తనుమధ్యమా విహరతి స్వైరం చ సా వైఖరీ ॥ 01 ॥
ఆదిక్షాంతవిలాసలాలసతయా తాసాం తురీయా తు యా
క్రోడీకృత్య జగత్త్రయం విజయతే వేదాదివిద్యామయీ ।
తాం వాచం మయి సంప్రసాదయ సుధాకల్లోలకోలాహల-
క్రీడాకర్ణనవర్ణనీయకవితాసామ్రాజ్యసిద్ధిప్రదాం ॥ 02 ॥
కల్పాదౌ కమలాసనోఽ పి కలయా విద్ధః కయాచిత్కిల
త్వాం ధ్యాత్వాంకురయాంచకార చతురో వేదాంశ్చ విద్యాశ్చ తాః ।
తన్మాతర్లలితే ప్రసీద సరలం సారస్వతం దేహి మే
యస్యామోదముదీరయంతి పులకైరంతర్గతా దేవతాః ॥ 03 ॥
మాతర్దేహభృతామహో ధృతిమయీ నాదైకరేఖామయీ
సా త్వం ప్రాణమయీ హుతాశనమయీ బిందుప్రతిష్టామయీ ।
తేన త్వాం భువనేశ్వరీం విజయినీం ధ్యాయామి జాయాం విభో-
స్త్వత్కారుణ్యవికాశిపుణ్యమతయః ఖేలంతు మే సూక్తయః ॥ 04 ॥
త్వామశ్వత్థదలానుకారమధురామాధారబద్దోదరాం
సంసేవే భువనేశ్వరీమనుదినం వాగ్దేవతామేవ తాం ।
తన్మే శారదకౌముదీపరిచయోదంచత్సుధాసాగర-
స్వైరోజ్జాగరవీచివిభ్రమజితో దీవ్యంతు దివ్యా గిరః ॥ 05 ॥
లేఖప్రస్తుతవేద్యవస్తుసురభిశ్రీపుస్తకోత్తంసితో
మాతః స్వస్తికృదస్తు మే తవ కరో వామోఽభిరామః శ్రియా ।
సద్యో విద్రుమకందలీసరలతాసందోహసాంద్రాంగులిర్ముద్రాం
బోధమయీం దధత్తదపరోఽప్యాస్తామపాస్తభ్రమః ॥ 06 ॥
మాతః పాతకజాలమూలదలనక్రీడాకఠోరా దృశః
కారుణ్యామృతకోమలాస్తవ మయి స్ఫూర్జంతు సిద్ధ్యర్జితాః ।
ఆభిః స్వాభిమతప్రబంధలహరీసాకూతకౌతూహలాఽ -
ఽచాంతస్వాంతచతుర్ముఖోచితగుణోద్గారాం కరిష్యే గిరం ॥ 07 ॥
త్వామాధారచతుర్దలాంబుజగతాం వాగ్బీజగర్భే యజే
ప్రత్యావృత్తిభిరాదిభీః కుసుమితాం మాయాలతామున్నతాం ।
చూడామూలపవిత్రపత్రకమలప్రేంఖోలఖేలత్యుధా-
కల్లోలాసు కుచక్రచంక్రమచమత్కారైకలోకోత్తరాం ॥ 08 ॥
సోఽహం త్వత్కరుణాకటాక్షశరణ: పంచాధ్వసంచారతః
ప్రత్యాహృత్య మనో వసామి రసనాలింగం మమాలింగతు ।
శ్రీ సర్వజ్ఞవిభూషణీకృతకలానిఃస్యంద్రమానామృత-
స్వచ్చందస్ఫటికాద్రిసాంద్రితపయః శోభావతీ భారతీ ॥ 09 ॥
మాతర్మాతృకయా విదర్భితమిదం గర్భీకృతానాహత-
స్వచ్చంద్రధ్వనిపేయమధ్వనిరతం చంద్రార్కనిద్రాగిరౌ ।
సంసేవే విపరీతరీతిరచనోచ్చారాదకారావధి-
స్వాధీనామృతసింధుబంధురమహో మాయామయం తే మహః ॥ 10 ॥
తస్మాన్నందనచారుచందనతరుచ్చాయాసు పుప్పాసవ-
స్వైరాస్వాదనమోదమానమనసాముద్దామవామభ్రువాం ।
వీణాసంగితరంగితస్వరచమత్కారోఽపి సారోజితో
యేన స్యాదిహ దేహి మే తదభితః సంచారి సారస్వతం ॥ 11 ॥
ఆధారే హృదయే శిఖాపరిసరే సంధాయ మేధామయీం
త్రేధాభీజతనూమనూనకరుణాపీయూషకల్లోలినీం ।
త్వాం మాతర్జపతో నిరంకుశనిజాద్వైతామృతాస్వాదన -
ప్రజ్ఞాంభశ్చులుకైః స్ఫురంతు పులకైరంగాని తుంగాని మే ॥ 12 ॥
వాణీబీజమిదం జపామి పరమం తత్కామరాజాభిధం
మాతః సాంతపరం విసర్గసహితౌకారోత్తరం తేన మే ।
దీర్ఘాందోలితమౌలికీలితమణిప్రారబ్ధనీరాజనైధీరైః
పీతరసా నిరంతరమసౌ వాగ్జృభతామద్భుతా ॥ 13 ॥
చూడాచంద్రకలానిరతరగలత్పీయూషబిందుశ్రియా
సందేహోచితమక్షసూత్రవలయం యా బిభ్రతీ నిర్భరం ।
అంతర్మంత్రమయం స్వమేవ జపసి ప్రత్యక్షవృత్త్యక్షరం
సా త్వం దక్షిణపాణినాంబ వితర శ్రేయాంసి భూయాంసి మే ॥ 14 ॥
బద్ద్వా స్వస్తికమాసనం సితరుచిచ్చేదావదాతచ్చవి-
శ్రేణిశ్రీసుభగం భవిష్ణుసతతవ్యాజృంభమాణేఽమ్చుజే ।
దీవ్యంతీమధివామజాను రుచిరన్యస్తేన హస్తేన తాం
నిత్యం పుస్తకధారణప్రణయినీం సేవే గిరామీశ్వరీం ॥ 15 ॥
తన్మే విశ్వపథీనపీనవిలసన్నిఃసీమసారస్వత-
స్రోతోవీచివిచిత్రభంగిసుభగా విభ్రాజతాం భారతీ ।
యామాకర్ణ్య విఘూర్ణమానమనసః ప్రేంఖోలితైమీలిభి-
ర్మీలద్భిర్నయనాంచలైః సుమనసో నిందేయురిందోః కలాం ॥ 16 ॥
ఆదౌ వాగ్భవమిందుబిందుమధురం ఝాంతే చ కామాత్మకం
యోగాంతే కషయోస్తృతీయమితి తే బీజత్రయం ధ్యాయతాం ।
సార్ధం మాతృకయా విలోమవిషమం సంధాయ బంధచ్చిదా
వాచాంతర్గతయా మహేశ్వరి మయా మాత్రాశతం జప్యతే ॥ 17 ॥
తత్సారస్వతసార్వభౌమపదవీ సద్యో మమ ద్యోతతాం
యత్రాజ్ఞావిహితైర్మహాకవిశతైః స్ఫీతాం గిరం చుంబతాం ।
చైత్రోన్మీలితకేలికోకిలకుహూకారావతారంచిత-
శ్లాఘాసంచితపంచమశ్రుతిసమాహారోఽపి భారోపమః ॥ 18 ॥
వాగ్బీజం భువనేశ్వరీం వద వదేత్యుచ్చార్య వాగ్వాదిని
స్వాహావర్ణవిశీర్ణపాతకభరాం ధ్యాయామి నిత్యాం గిరం ।
వీణాపుస్తకమక్షసూత్రవలయం వ్యాజృంభమంభోరుహం
బిభ్రాణామరుణాశుభీః కరతలైరావిర్భవద్విభ్రమాం ॥ 19 ॥
తం మాతః కృపయా తరంగయతరాం విద్యాధిపత్యం మయి
జ్యోత్స్నాసౌరభచౌరకీర్తికవితాసేవ్యైకసింహాసనం ।
కాలాజ్ఞాదిశివావసానభవనప్రాగ్భారకుక్షింభరి
ప్రజ్ఞాంభఃపరిపాకపీవరపరానందప్రతిష్ఠాస్పదం ॥ 20 ॥
లేఖాభిస్తుహినద్యుతేరివ కృతం వాగ్బీజముచ్చైః స్ఫుర-
త్తారాకారకరాలబిందు పరితో మాయాత్రిధాఽఽవేష్టితం ।
పూర్ణేందోరుదరే తదేతదఖిలం పీయూషగౌరాక్షరం
స్రోతఃసంభ్రమసంభృతం స్మరతి యో జిహ్వాంచలే నిశ్చలః ॥ 21 ॥
తస్య త్వత్కరుణాకటాక్షకణికాసంక్రాంతిమాత్రాదపి
స్వాంతే శాంతిముపైతి దీర్ఘజడతా జాగ్రద్వికారాగ్రణీః ।
తస్మాదాశు జగత్త్రయాద్భుతరసాద్వైతప్రతీతిప్రదం
సౌరభ్యం పరమభ్యుదేతి వ వనాంభోజే గిరాం విభ్రమైః ॥ 22 ॥
అద్యో మౌలిరథాపరో ముఖమిఈ నేత్రే చ కర్ణావుఊ
నాసావంశపుటే ఋౠ తదనుజౌ వర్ణౌ కపోలద్వయం ।
దంతాశ్చోర్ధ్యమధస్తథోష్ఠయుగలం సంధ్యక్షరాణి క్రమా-
జ్జిహ్వామూలముదగ్రబిందురపి చ గ్రీవా విసర్గీ స్వరః ॥ 23 ॥
కాదిర్దక్షిణతో భుజస్తదపరో వర్గశ్చ వామో భుజ-
ష్ఠాదిస్తాదిరనుక్రమేణ చరణౌ కుక్షిద్వయం తే పఫౌ ।
వంశః పృష్ఠభవోఽథ నాభిహృదయే బాదిత్రయం ధాతవో
యాద్యాః సప్త సమీరణశ్చ సపరః క్షః క్రోధ ఇత్యంబికే ॥ 24 ॥
ఏవం వర్ణమయం వపుస్తవ శివే లోకత్రయవ్యాపకం
యోఽహంభావనయా భజత్యవయవేఽప్యారోపితైరక్షరైః ।
మూర్తీభూయ దినావసానకమలాకారైః శిరఃశాయిభిస్తం
విద్యాః సముపాసతే కరతలైర్దృష్టిప్రసాదోత్సుకాః ॥ 25 ॥
యే జానంతి యజంతి సంతతమభిధ్యాయంతి గాయంతి వా
తేషామాస్యముపాస్యతే మృదుపదన్యాసైర్విలాసైర్గిరాం ।
కించ క్రీడతి భూర్భువఃస్వరభితః శ్రీచందనస్యందినీ
కీర్తిః కార్తికరాత్రికైరవసమా సౌభాగ్యశోభాకరీ ॥ 26 ॥
మాయాబీజవిదర్భితం పునరిదం శ్రీకూర్మచక్రోదితం
దీపామ్నాయవిదో జపంతి ఖలు యే తేషాం నరేంద్రాః సదా ।
సేవంతే చరణౌ కిరీటవలభీవిశ్రాంతరత్నాంకుర-
జ్యోత్స్నామేదురమేదినీతలరజోమిశ్రాంగరాగశ్రియః ॥ 27 ॥
శ్రీబీజం సకలాక్షరాదిషు పునః క్రోధాక్షరాంతే భవేదేవం
యో భజతేఽమ్బ తే తనుమిమాం తస్యాగ్రతో జాగ్రతీ ।
లక్ష్మీః సిందురదానగంధలహరీలోలాంధపుష్పంధయ-
శ్రేణీబంధురశృంఖలానియమితేవాపైతి నైవ క్వచిత్‌ ॥ 28 ॥
యస్త్వాం విద్రుమపల్లవద్రవమయీం లేఖామివాలోహితా-
మాత్మానం పరితః స్ఫురత్త్రివలయాం మాయామభీధ్యాయతి ।
తస్మై నిందితవందనేందుకదలీకాంతారహారస్రజో
నిఃశ్వాసభ్రమబాష్పదాహగహనా మూర్ఛంతి తాస్తాః స్త్రియః ॥ 29 ॥
మాతః శ్రీభగమాలినీత్యభిధయా దివ్యాగమోత్తంసితాం
త్వామానందమయీమనుస్మరతి యస్తం నామ వామభ్రువః ।
బాహుస్వస్తికపీడితైః స్తనతటైర్దైన్యాంచితైశ్చాటుభి-
ర్నీరంధ్రైః పులకాంకితైర్ముకులితైర్ధ్యాయంతి నేత్రాంచలైః ॥ 30॥
యస్త్వాం ధ్యాయతి రాగసాగరతరత్సిందూరనౌకాంతర-
స్వైరోజ్జాగరపద్మరాగనలినీపుష్పాసనాధ్యాసినీం ।
బాలాదిత్యసపత్నరత్నరచితప్రత్యంగభూషారుచి -
శ్రేణీసమ్మిలితాంగరాగవసనాస్తస్య స్మరంత్యంగనాః ॥ 31 ॥
కర్పూరం కుముదాకరం కమలినీపత్రం కలాకౌశలం
కూజత్కోకిలకామినీకులకుహూకల్లోలకోలాహలం ।
శంకంతే ప్రలయానలం స్మరమహాపస్మారవేగాతురాః
కంపంతే నిపతంతి హంత న గిరం ముంచంతి శోచంతి చ॥ ॥ 32 ॥
శ్రీమృత్యుంజయనామధేయభగవచ్చైతన్యచంద్రాత్మికే
హ్రీంకారి ప్రథమాతమాంసి దలయ త్వం హంససంజీవిని ।
జీవం ప్రాణవిజృంభమాణహృదయగ్రంథిస్థితం మే కురు
త్వాం సేవే నిజబోధలాభరభసా స్వాహాభుజామీశ్వరీం ॥ 33 ॥
ఏవం త్వామమృతేశ్వరీమనుదినం రాకానిశాకాముకస్యాంతః
సంతతభాసమానవపుషం సాక్షాద్యజంతే తు యే।
తే మృత్యోః కవలీకృతత్రిభువనా భోగస్య మౌలౌ పదం
దత్వా భోగమహోదధౌ నిరవధి క్రీడంతి తైస్తై సుఖైః ॥ 34 ॥
జాగ్రద్వోధసుధామయూఖనిచయైరాప్లావ్య సర్వా దిశో
యస్యాః కాపి కలా కలంకరహితా షట్చక్రమాక్రామతి ।
దైన్యధ్వాంతవిదారణైకచతురా వాచం పరాం తన్వతీ
సా నిత్యా భువనేశ్వరీ విహరతాం హంసీవ మన్మానసే ॥ 35 ॥
త్వం మాతాపితరౌ త్వమేవ సుహృదస్త్వ భ్రాతరస్త్వం సఖా
త్వం విద్యా త్వముదారకీర్తిచరితం త్వం భాగ్యమత్యద్భుతం ।
కిం భూయః సకలం త్వమీహితమితి జ్ఞాత్వా కృపాకోమలే
శ్రీవిశ్వేశ్వరి సంప్రసీద శరణం మాతః పరం నాస్తి మే॥ ॥ 36॥
శ్రీసిద్ధనాథ ఇతి కోఽపి యుగే చతుర్ధే
ప్రాదుర్బభూవ కరుణావరుణాలయోఽస్మిన్‌ ।
శ్రీశంభురిత్యభిధయా స మయి ప్రసన్నం
చేతశ్చకార సకలాగమచక్రవర్తీ ॥ 37 ॥
తస్యాజ్ఞయా పరిణతాన్వయసిద్ధ్వవిద్యా-
భేదాస్పదైః స్తుతిపదైర్వచసాం విలాసైః ।
తస్మాదనేన భువనేశ్వరి వేదగర్భం
సద్యః ప్రసీద వదనే మమ సన్నిధేహి ॥ 38 ॥
యేషాం పరం న కులదైవతమంబికే త్వం
తేషాం గిరా మమ గిరో న భవంతు మిశ్రాః |
తైస్తు క్షణం పరిచితే విషయేఽపి వాసో
మా భూత్కదాచిదితి సంతతమర్థయే త్వాం ॥ 39 ॥
శ్రీశంభునాథ కరుణాకర సిద్ధనాథ
శ్రీసిద్ధనాథ కరుణాకర శంభునాథ ।
సర్వాపరాధమలినేఽపి మయి ప్రసన్నం
చేతః కురుష్వ శరణం మమ నాన్యదస్తి ॥ 40 ॥
ఇత్థం ప్రతిక్షణముదశ్రువిలోచనస్య
పృథ్వీధరస్య పురతః స్ఫుటమావిరాసీత్‌ ।
దత్వా వరం భగవతీ హృదయం ప్రవిష్టా
శాస్త్రైః స్వయం నవనవైశ్చ ముఖేఽవతీర్ణా ॥ 41 ॥
వాక్సిద్ధిమేవమతులామవలోక్య నాథః
శ్రీశంభురస్య మహతీమపి తాం ప్రతిష్ఠాం ।
స్వస్మిన్పదే త్రిభువనాగమవంద్యవిద్యా-
సింహాసనైకరుచిరే సుచిరం చకార ॥ 42 ॥
భూమౌ శయ్యా వచసి నియమః కామినీభ్యో నివృత్తిః
ప్రాతర్జాతీవిటపసమిధా దంతజిహ్వావిశుద్ధిః ।
పత్రావల్యాం మధురమశనం బ్రహ్మవృక్షస్య పుష్పైః
పూజాహోమౌ కుసుమవసనాలేపనాన్యుజ్జ్వలాని ॥ 43 ॥
ఇత్థం మాసత్రయమవికలం యో ప్రతస్థః ప్రభాతే
మధ్యాహ్నే వాఽస్తమితసమయే కీర్తయేదేకచిత్తః ।
తస్యోల్లాసైః సకలభువనాశ్చర్యభూతైః ప్రభూతైర్విద్యాః
సర్వాః సపది వదనే శంభునాథప్రసాదాత్‌ ॥ 44 ॥
వ్రతేన హీనోఽప్యనవాప్తమంత్రః శ్రద్ధావిశుద్దోఽనుదినం జపేద్యః ।
తస్యాపి వర్షాదనవద్యసద్యః కవిత్వహృద్యాః ప్రభవంతి విద్యాః ॥ 45 ॥
కోంఽప్యచింత్యప్రభావోఽస్య స్తోత్రస్య ప్రత్యయావహః ।
శ్రీశంభోరాజ్ఞయా సర్వాః సిద్ధయోఽస్మిన్ప్రతిష్టితాః ॥ 46 ॥
॥ ఇతి శ్రీ సకలాగమాచార్యచక్రవర్తి శ్రీపృథ్వీధరాచార్య విరచితం
వేదగర్భం శ్రీభువనేశ్వరీస్తోత్రం అథవా శ్రీభువనేశ్వరీమహాస్తోత్రం సంపూర్ణం ॥
No comments:
Post a Comment