నిర్వాణషట్కం

మనోబుద్ధ్యహంకారచిత్తాని నాహం

న చ శ్రోత్రజిహ్వే న చ ఘ్రాణనేత్రే

న చ వ్యోమభూమిః న తేజో న వాయుః

చిదానందరూపః శివోఽహం శివోఽహమ్ || ౧ ||

న చ ప్రాణసంజ్ఞో న వై పంచవాయుః

న వా సప్తధాతుర్న వా పంచకోశః

న వాక్ పాణిపాదౌ న చోపస్థపాయూ

చిదానందరూపః శివోఽహం శివోఽహమ్ || ౨ ||

న మే ద్వేషరాగౌ న మే లోభమోహౌ

మదో నైవ మే నైవ మాత్సర్యభావః

న ధర్మో న చార్థో న కామో న మోక్షః

చిదానందరూపః శివోఽహం శివోఽహమ్ || ౩ ||

న పుణ్యం న పాపం న సౌఖ్యం న దుఃఖం

న మంత్రో న తీర్థం న వేదా న యజ్ఞాః

అహం భోజనం నైవ భోజ్యం న భోక్తా

చిదానందరూపః శివోఽహం శివోఽహమ్ || ౪ ||

న మృత్యుర్న శంకా న మే జాతిభేదః

పితా నైవ మే నైవ మాతా న జన్మ

న బంధుర్న మిత్రం గురుర్నైవ శిష్యః

చిదానందరూపః శివోఽహం శివోఽహమ్ || ౫ ||

అహం నిర్వికల్పో నిరాకారరూపో

విభుర్వ్యాప్య సర్వత్ర సర్వేంద్రియాణామ్

సదా మే సమత్వం న ముక్తిర్న బంధః

చిదానందరూపః శివోఽహం శివోఽహమ్ || ౬ ||

Telugu Library