శ్రీభువనేశ్వర్యష్టకం
శ్రీదేవ్యువాచ -
ప్రభో శ్రీభైరవశ్రేష్ఠ దయాలో భక్తవత్సల ।
భువనేశీస్తవం బ్రూహి యద్యహంతవ వల్లభా ॥ 01 ॥
ఈశ్వర ఉవాచ -
శృణు దేవి ప్రవక్ష్యామి భువనేశ్యష్టకం శుభం ।
యేన విజ్ఞాతమాత్రేణ త్రైలోక్యమంగలంభవేత్‌ ॥ 02 ॥
ఊం నమామి జగదాధారాం భువనేశీం భవప్రియాం ।
భుక్తిముక్తిప్రదాం రమ్యాం రమణీయాం శుభావహాం ॥ 03 ॥
త్వం స్వాహా త్వం స్వధా దేవి! త్వం యజ్ఞా యజ్ఞనాయికా ।
త్వం నాథా త్వం తమోహర్త్రీ వ్యాప్యవ్యాపకవర్జితా ॥ 04 ॥
త్వమాధారస్త్వమిజ్యా చ జ్ఞానజ్ఞేయం పరం పదం ।
త్వం శివస్త్వం స్వయం విష్ణుస్త్వమాత్మా పరమోஉవ్యయః ॥ 05 ॥
త్వం కారణంచ కార్యంచ లక్ష్మీస్త్వంచ హుతాశనః ।
త్వం సోమస్త్వం రవిః కాలస్త్వం ధాతా త్వంచ మారుతః ॥ 06 ॥
గాయత్రీ త్వం చ సావిత్రీ త్వం మాయా త్వం హరిప్రియా ।
త్వమేవైకా పరాశక్తిస్త్వమేవ గురురూపధృక్‌ ॥ 07 ॥
త్వం కాలా త్వం కలాஉతీతా త్వమేవ జగతాంశ్రియః ।
త్వం సర్వకార్యం సర్వస్య కారణం కరుణామయి ॥ 08 ॥
ఇదమష్టకమాద్యాయా భువనేశ్యా వరాననే ।
త్రిసంధ్యం శ్రద్ధయా మర్త్యో యః పఠేత్‌ ప్రీతమానసః ॥ 09 ॥
సిద్ధయో వశగాస్తస్య సంపదో వశగా గృహే ।
రాజానో వశమాయాంతి స్తోత్రస్యాஉస్య ప్రభావతః ॥ 10 ॥
భూత ప్రేతపిశాచాద్యా నేక్షంతే తాం దిశం గ్రహాః ।
యం యం కామం ప్రవాంఛేత సాధకః ప్రీతమానసః ॥ 11 ॥
తం తమాప్నోతి కృపయా భువనేశ్యా వరాననే ।
అనేన సదృశం స్తోత్రం న సమం భువనత్రయే ॥ 12 ॥
సర్వసంపత్ప్రదమిదం పావనానాంచ పావనం ।
అనేన స్తోత్రవర్యేణ సాధితేన వరాననే ।
సమప్దో వశమాయాంతి భువనేశ్యాః ప్రసాదతః ॥ 13 ॥
॥ ఇతి శ్రీరుద్రయామలే తంత్రే శ్రీభువనేశ్వర్యష్టకం సంపూర్ణం ॥
No comments:
Post a Comment