ఈశ్వర ఉవాచ:
మాతర్జగద్రచననాటకసూత్రధార-
-స్త్వద్రూపమాకలయితుం పరమార్థతోఽయమ్ ।
ఈశోఽప్యమీశ్వరపదం సముపైతి తాదృక్
కోన్యః స్తవం కిమివ తావకమాదధాతు ॥ 01 ॥
నామాని కింతు గృణతస్తవ లోకతుండే
నాడంబరం స్పృశతి దండధరస్య దండః ।
తల్లేశలంఘితభవాంబునిధీ యతోఽయం
త్వన్నామసంస్మృతిరియం న పునః స్తుతిస్తే ॥ 02 ॥
త్వచ్చింతనాదరసముల్లసదప్రమేయా-
-ఽఽనందోదయాత్సముదితః స్ఫుటరోమహర్షః ।
మాతర్నమామి సుదినాని సదేత్యముం త్వా-
-మభ్యర్థయేర్థమితి పూరయతాద్దయాలో ॥ 03 ॥
ఇంద్రేందుమౌలివిధికేశవమౌలిరత్న-
-రోచిశ్చయోజ్జ్వలితపాదసరోజయుగ్మే ।
చేతో నతౌ మమ సదా ప్రతిబింబితా త్వం
భూయో భవాని భవనాశిని భావయే త్వామ్ ॥ 04 ॥
లీలోద్ధృతక్షితితలస్య వరాహమూర్తే-
-ర్వారాహమూర్తిరఖిలార్థకరీ త్వమేవ ।
ప్రాలేయరశ్మిసుకలోల్లసితావతంసా
త్వం దేవి వామతనుభాగహరా హరస్య ॥ 05 ॥
త్వామంబ తప్తకనకోజ్జ్వలకాంతిమంత-
-ర్యే చింతయంతి యువతీతనుమం గలాంతామ్ ।
చక్రాయుధాం త్రినయనాం వరపోత్రివక్త్రాం
తేషాం పదాంబుజయుగం ప్రణమంతి దేవాః ॥ 06 ॥
త్వత్సేవనస్ఖలితపాపచయస్య మాత-
-ర్మోక్షోఽపి యస్య న సతో గణనాముపైతి ।
దేవాసురోరగనృపూజితపాదపీఠః
కస్యాః శ్రియః స ఖలు భాజనతాం న ధత్తే ॥ 07 ॥
కిం దుష్కరం త్వయి మనోవిషయం గతాయాం
కిం దుర్లభం త్వయి విధానువదర్చితాయామ్ ।
కిం దుర్భరం త్వయి సకృత్స్మృతిమాగతాయాం
కిం దుర్జయం త్వయి కృతస్తుతివాదపుంసామ్ ॥ 08 ॥
No comments:
Post a Comment