Monday, November 16, 2026

tulasi mokka daggarunchakudani vastuvulu - తులసి మొక్క దగ్గరఉంచకూడని వస్తువులు

తులసి మొక్క దగ్గరఉంచకూడని వస్తువులు

సనాతన ధర్మంలో తులసి మొక్కను దైవంతో సమానంగా పూజిస్తారు. ముఖ్యంగా వివాహం అయిన స్త్రీలు తులసిని పూజించడం వల్ల వారి దాంపత్య జీవితం సజావుగా సాగుతుందని, సుమంగళిగా ఉంటారని అంటారు.

కార్తీక మాసంలో దీపారాధన, శివుడి దర్శనం, విష్టువాలయ దర్శనం, జపం, దానం, ఉపవాసం మొదలైన వాటికి చాలా ప్రాధాన్యత ఉంటుంది. తులసి దగ్గర దీపారాధన, తులసి పూజకు కూడా అంతే ప్రాధాన్యత ఉంది. తులసి మొక్కలో సాక్షాత్తు ఆ లక్ష్మీదేవి నివాసం ఉంటుందని అంటారు.

తులసి మొక్క దగ్గర ఉంచకూడనివి ఏంటో తెలుసుకుందాం..!!
తులసి మొక్క దగ్గర కానీ తులసి ఉన్న ప్రాంగణంలో కానీ పాద రక్షలు అయిన చెప్పులు, బూట్లు వంటివి ఉండకూడదు. 

ఇవి తులసి మొక్కకు దగ్గరగా ఉంటే ఆ ఇంట్లో ఆర్థిక సమస్యలు ఏర్పడతాయట. 

లక్ష్మీదేవి ఆ ఇల్లు వదిలి వెల్లిపోతుందట. ఈ కారణంగా ఆర్థిక సమస్యలు ఏర్పడతాయని అంటున్నారు. 

అందుకే తులసి మొక్క ఉన్న ప్రాంతంలో కానీ, తులసి మొక్క దగ్గర కానీ పాదరక్షలు విడవకండి.

చాలామంది ఇంటి ప్రాంగణంలో డస్ట్ బిన్ ఉంచుతుంటారు. కొంచెం ఇరుకైన ఇళ్లలో తులసి మొక్క పక్కనే డస్ట్ బిన్ కూడా పెడుతుంటారు. ఇలా చేయడం చాలా తప్పు. 

తులసి ఉన్న ప్రదేశంలో ఎప్పుడూ శుభ్రత ఉండాలి. శుభ్రత ఉన్న చోటే లక్ష్మీ దేవి కూడా నివాసం ఉంటుంది. 

కాబట్టి తులసి మొక్క దగ్గర డస్ట్ బిన్ ఉంచడం, చెత్త పోగు చేయడం వంటివి చేయరాదు.

తులసి మొక్క ఉన్న దగ్గర శివలింగాన్ని ఉంచడం నిషేదం అంటున్నారు. తులసి మొక్క దగ్గర శివలింగం ఉంచితే ఆ ఇంట్లో అశాంతి ఏర్పడుతుందట. 

అంతేకాదు శివలింగానికి తులసిని సమర్పించకూడదని కూడా అంటున్నారు.

ఇటువంటి పనులు చేసేవారు ఇక మీదట అయినా వాటిని చేయడం మానెయ్యడం మంచిది, లేకపోతే ఆ ఇంటికి అరిష్టమని, ఆ ఇంట్లో అశాంతి, ఆర్థిక సమస్యలు ఏర్పడతాయని పండితులు అంటున్నారు.

కార్తిక పురాణము

Karthika Masam - Nagula Chavithi - కార్తీక మాసం - నాగుల చవితి

కార్తీక మాసం - నాగుల చవితి

ఆశ్లేష, ఆరుద్ర, మూల, పూర్వాభాద్ర, పూర్వాషాడ అను ఈ ఐదు నక్షత్రములు సర్ప నక్షత్రములు. 

సర్పము అనగా కదిలేది, పాకేది. నాగములో ‘న’ అనగా ఎప్పుడూ కదులుతూ ఉండేదని అర్థం. క్షణం కూడా ఆగకుండా అతివేగంగా వెళ్ళేదాన్ని ‘నాగము’ అంటారు. 

అన్నింటికంటే వేగంగా వెళ్ళేది ‘కాలము’ కావున నాగమునకు మరో అర్థం కాలం. అందుకే ‘కాలనాగము’ లేదా ‘కాలనాగు’ అని అంటారు.

కార్తీక శుద్ధ చతుర్థికి నాగుల చవితి అని పేరు. ఈనాడు నాగేంద్రుని శివభావముతో అర్చిస్తే సర్వరోగాలు పోయి సౌభాగ్యవంతులవుతారని విశ్వాసం. 

మానవ శరీరమనే పుట్టకు తొమ్మిది రంధ్రాలు ఉంటాయి. వాటినే నవరంధ్రాలు అంటూ ఉంటారు. మానవ శరీరంలో నాడులతో నిండి వున్న వెన్నెముకను ' వెన్నుపాము' అని అంటారు. 

అందులో కుండలినీశక్తి మూలాధారచక్రంలో 'పాము' ఆకారంలో వుంటుందని యోగశాస్త్రం' చెబుతోంది.

పాములకు ప్రాణదానం చేసిన ఆస్తీకుడి కథ భారతంలో ఉంది. ఇతడు జరత్కారువు అనే నాగజాతి స్త్రీకి జన్మిస్తాడు. జనకుడి పేరు జరత్కారుడు. చిన్నతనంలోనే సకల విద్యలూ నేర్చుకున్న ఆస్తీకుడు గొప్ప జ్ఞాని అవుతాడు !.

పరీక్షిత్తు పాముకాటు వల్ల మరణిస్తాడు. ఇందుకు ఆగ్రహించిన అతడి పుత్రుడు జనమేజయుడు సర్వ సర్ప జాతీ నాశనం కావాలని సర్పయాగం ప్రారంభిస్తాడు. 

ఎక్కడెక్కడి నుంచో పాములు వచ్చి యాగాగ్నిలో పడి మాడిపోతాయి. మిగిలిన సర్పాలు తమను రక్షించాలని జరత్కారువును ప్రార్థిస్తాయి. 

రాజును ఒప్పించి సర్పయాగం ఆపించాలని ఆమె తన కుమారుడు ఆస్తీకుణ్ని కోరుతుంది. అతడు జనమేజయుడి వద్దకు వెళ్తాడు. 

అతడి విద్యానైపుణ్యాన్ని చూసిన జనమేజయుడు సత్కరించడానికి సిద్ధపడతాడు.

‘సర్ప హింస మంచిది కాదు. నీవు ఈ యాగం మాని, వాటిని రక్షిస్తే చాలు. అదే నాకు పెద్ద సత్కారం’ అంటాడు ఆస్తీకుడు. 

జనమేజయుడు అందుకు అంగీకరించి, సర్పయాగాన్ని విరమిస్తాడు. నాగుల చవితినాడు ఈ కథ వింటే, నాగ దోషాల నుంచి విముక్తి కలుగుతుందని పలువురి నమ్మకం.

పంట పొలాలకు శత్రువులు ఎలుకలు, వాటిని నిర్మూలించేవి పాములు. అవి క్రమంగా కనుమరుగైతే, మానవాళి మనుగడకే ప్రమాదం. 

ఈ నాగుల చవితి నాడు నాగేంద్రుడు శివునికి వాసుకిగా, విష్ణువుకు ఆది శేషుడుగా తోడు ఉంటాడు కాబట్టి ఈ చవితి రోజు విశ్వాసం గల భక్తుల పూజ నైవేద్యాలను సమర్పిస్తే సర్వరోగాలు పోయి సౌభాగ్యవంతులవుతారని భారతీయుల నమ్మకం.

నాగులకు పాలు పోయడంలోని అంతరార్థం
పాలు స్వచ్ఛతకు ప్రతీక. ఈ పాలను వేడి చేసి చల్లపరచి దానికి కొద్దిగా చల్లను చేరిస్తే పెరుగవుతుంది. ఆ పెరుగును చిలుకగా వచ్చిన చల్లలో నుంచి వచ్చే వెన్నను కాయగా నెయ్యి అవుతుంది. దీనిని మనం యజ్ఞంలో హవిస్సుగా ఉపయోగిస్తాం. 

అలాగే మన బ్రతుకనే పాలను జ్ఞానమనే వేడితో కాచి వివేకమనే చల్ల కలిపితే సుఖమనే పెరుగు తయారవుతుంది. ఈ పెరుగును ఔదార్యమనే కవ్వంతో చిలుకగా శాంతి అనే చల్ల లభిస్తుంది. ఆ చల్లను సత్యం, శివం, సుందరం అనే మూడు వేళ్ళతో కాస్త వంచి తీస్తే సమాజ సహకారం అనే వెన్న బయటకు వస్తుంది. ఆ వెన్నకు భగవంతుని ఆరాధన అనే జ్ఞానాన్ని జోడిస్తే త్యాగము, యోగము, భోగమనే మూడు రకముల నెయ్యి ఆవిర్భవిస్తుంది. 

ఇదే సకల వేదాలసారం, సకల జీవనసారం అయిన పాలను జీవనమునకు ప్రతీక అయిన నాగులకు అర్పించడంలోని అంతరార్థం.

"దేవా: చక్షుషా భుంజానాః భక్తాన్ పాలయంతి" అనేది ప్రమాణ వాక్యం, అనగా దేవతలు ప్రసాదాన్ని చూపులతోనే ఆరగిస్తారని అర్థం. 

పాములు పాలు తాగవనే అపోహతో పాలు పోయడం మానకుండా కొద్దిగా పాలను పుట్టలో పోసి మిగిలిన పాలను నైవేద్యంగా స్వీకరించాలి.

అనేక సర్పదేవతలు ఉన్నప్పటికీ 12 మందిని మాత్రం నాగులు చవితి పూజా సమయంలో కొలుస్తారు. 

అవి అనంత, వాసుకి, శేష, పద్మ, కంబాల, కర్కోటకం, ఆశ్వతార, ధృతరాష్ట్ర, శంఖపాల, కలియా, తక్షక, పింగళ

నాగుల చవితి మంత్రం
పాము పుట్టలో పాలు పోసేటప్పుడు ఇలా చెప్పాలి మరియు పిల్లలు చేత చెప్పించాలి.

నడుము తొక్కితే నావాడు అనుకో
పడగ తొక్కితే పగవాడు కాదు అనుకో
తోక తొక్కితే తోటి వాడు అనుకో
నా కంట నువ్వుపడకు 
నీకంట నేను పడకుండా చూడు తండ్రీ 

అని చెప్పాలి.

మనలను ఇబ్బంది పెట్టినవారిని, కష్టపెట్టేవారిని క్షమించాలి అని తెలుపుట ఇలాంటివి నేర్పుట ఉద్దేశము. 

నాగుల చవితిరోజు పుట్టలో పాలుపోసిన తరువాత. బియ్యం, రవ్వ లేదా పిండిని చుట్టూ జల్లుతారు. ఎందుకంటే మన చుట్టూ వుండే చిన్న చిన్న జీవులకు ఆహారంను పెట్టటం అన్నమాట. 

ఉదాహరణకు చీమలకు ఆహారంగా పెడుతున్నాం. పుట్ట నుండి మట్టి తీసుకొని ఆ మన్నును చేవులకు పెడతారు. ఎందుకంటే చెవికి సంభందించిన ఇబ్బందులు రాకూడదని.



కార్తిక పురాణము

Karthika Month - Dhana Deepam - కార్తీక మాసం - ధనదీపం

కార్తీక మాసం - ధనదీపం

శివకేశవులిద్దరికీ పరమ పవిత్రమైన, ప్రీతిపాత్రమైన కార్తీక మాసం ఆధ్యాత్మిక సాధనకు, మోక్షసాధనకు విశిష్టమైనది. 

ఈ మాసంలో స్నానం, దానం, జపం, ఉపవాసం, దీపారాధన, దీప దానం వంటి వాటికి ఎక్కువ ప్రాధాన్యం ఇస్తారు. 

ఈ క్రమంలోనే అందరూ శివాలయాలు, వైష్ణవాలయాల్లో, ఇంటి గుమ్మం ముందు రకరకాల దీపాలు వెలిగిస్తుంటారు. 

అలాకాకుండా కార్తీక మాసంలో ధనదీపం పేరుతో ఒక ప్రత్యేకమైన దీపం వెలిగిస్తే లక్ష్మీదేవి అనుగ్రహంతో ఆర్థిక ఇబ్బందులన్నీ తొలగిపోయి.. అష్టైశ్వర్యాలు సిద్ధిస్తాయంటున్నారు పెద్దలు.

పరమపవిత్రమైన కార్తీక మాసంలో దీపారాధనకు ఎంత ప్రాముఖ్యత ఉంటుందో మనందరికీ తెలిసిన విషయమే. 

అయితే, అందులో భాగంగా ఈ మాసంలో ఏ రోజు అయినా సరే "ధనదీపం" పేరుతో ఇంట్లో ఒక ప్రత్యేకమైన దీపం వెలిగిస్తే మీ గృహంలో లక్ష్మీదేవి ఆనందతాండవం చేస్తుందంటున్నారు. 

ఈ ధన దీపాన్నే "లక్ష్మీదీపం" అనే పేరుతో కూడా పిలుస్తుంటారని చెబుతున్నారు.

ఈ దీపాన్ని ఎలా వెలిగింలి ??

ముందుగా పూజాగదిని శుభ్రం చేసుకోవాలి. తర్వాత శ్రీ మహాలక్ష్మీదేవి చిత్రపటాన్ని గంధం, కుంకుమ బొట్లతో అలంకరించుకోవాలి. 

అనంతరం అమ్మవారి చిత్రపటం ముందు శుభ్రంగా ఉన్న పూజకు సంబంధించి ఒక పీటను ఏర్పాటు చేసుకోవాలి. తర్వాత ఆ పీటకు పసుపు రాసి కుంకుమ బొట్లు పెట్టి దాని మీద ఒక రాగి లేదా ఇత్తడి పళ్లెంను ఏర్పాటు చేసుకోవాలి. 

ఆ పళ్లెంకు గంధం, కుంకుమ బొట్లు పెట్టాలి. ఆపై ఆ పళ్లెంలో గుప్పెడు బియ్యం పోసుకోవాలి. అందులో కొద్దిగా పసుపు, కుంకుమ వేయాలి. అలాగే అందులో ఒక గులాబీ పువ్వును ఉంచాలి.

ఆ తర్వాత రెండు చిన్న మట్టి ప్రమిదలను తీసుకొని వాటికి పూర్తిగా పసుపు రాసి కుంకుమ బొట్లు పెట్టి సిద్ధం చేసుకోవాలి. 

ఇప్పుడు రాగి లేదా ఇత్తడి పళ్లెంలో ఉన్న బియ్యంలో ఒక మట్టి ప్రమిదను ఉంచాలి. ఆపై ఆ ప్రమిదలో మూడు చొప్పున యాలకులు, లవంగాలు, కొద్దిగా రాళ్లు ఉప్పు వేసుకోవాలి. ఆ తర్వాత రెండో మట్టి ప్రమిదను తీసుకొని మొదటి ప్రమిద మీద ఉంచాలి. 

ఆపై ఆ ప్రమిదలో ఆవు నెయ్యి లేదా నువ్వుల నూనె పోసుకోవాలి. అనంతరం అందులో రెండు లేదా మూడు వత్తులను కలిపి ఒక వత్తిగా చేసి వేసుకోవాలి. అనంతరం దాన్ని ఏక హారతి లేదా ఆగరుబత్తితో వెలిగించుకోవాలి. దీన్నే "ధనదీపం లేదా లక్ష్మీదీపం" పేరుతో పిలుస్తారు.

ఈ దీపాన్ని కార్తీకమాసంలో ఏ రోజు అయినా వెలిగించుకోవచ్చు. అలాకాకుండా "గురు లేదా శుక్రవారం" వెలిగిస్తే ఇంకా అద్భుతమైన ఫలితాలు సిద్ధిస్తాయి. 

అయితే, రెండో మట్టి ప్రమిదలో దీపాన్ని వెలిగించిన తర్వాత జవ్వాది అనే ఒక సుగంధద్రవ్యం వెలుగుతున్న దీపంలో కొద్దిగా వేయాలి. 

ఇక దీపం కొండెక్కిన తర్వాత మొదటి ప్రమిదలో ఉన్నటువంటి యాలకులు, లవంగాలు, రాళ్ల ఉప్పును తీసుకొని ఎవరు తొక్కని చోట చెట్టు మొదట్లో వేయాలి. అలాగే పళ్లెంలో ఉన్నటువంటి గులాబీ పువ్వునూ ఎవరు తొక్కని ప్రదేశంలో వేయాలి.



కార్తిక పురాణము

kaarthika maasamlo darshinchavalasina kshetralu - pancarama kshetralu - కార్తీక మాసంలో దర్శించవలసిన క్షేత్రాలు - పంచారామ క్షేత్రాలు

కార్తీక మాసంలో దర్శించవలసిన క్షేత్రాలు - పంచారామ క్షేత్రాలు

కార్తీక మాసంలో పంచారామ క్షేత్రాలను దర్శించుకుంటే విశేష ఫలితాలు ఉంటాయి.

సనాతన ధర్మంలో కార్తీక మాసానికి ఎంతో విశిష్టమైన స్థానం ఉంది. ఈ మాసం పరమశివుడికి, శ్రీమహావిష్ణువుకు అత్యంత ప్రీతికరమైనదిగా భక్తులు భావిస్తారు. 

కార్తీక మాసంలో చేసే శివారాధన, దీపారాధన, ఉపవాసం, నదీస్నానం, ఆలయ దర్శనాలకు విశేష ఆధ్యాత్మిక ప్రాముఖ్యత ఉంది.

పంచారామాలు అంటే పరమశివుడికి సంబంధించిన ఐదు ప్రసిద్ధ శివక్షేత్రాలు. 

పురాణ గాథల ప్రకారం, తారకాసురుడి వద్ద ఉన్న శివలింగం కుమారస్వామి చేత ఐదు భాగాలుగా విడిపోయి ఐదు ప్రాంతాల్లో ప్రతిష్ఠించబడింది. ఈ ఐదు క్షేత్రాలనే పంచారామాలుగా పిలుస్తారు.

పంచారామ క్షేత్రాల దర్శనం- ఆధ్యాత్మిక ఫలితాలు

పరమశివుని అనుగ్రహం:
కార్తీక మాసంలో పంచారామాలను దర్శించుకుని శివుడికి అభిషేకాలు, అర్చనలు చేయడం వల్ల పరమశివుని అనుగ్రహం లభిస్తుందని భక్తుల విశ్వాసం. జీవితంలో ఎదురయ్యే సమస్యలను ధైర్యంగా ఎదుర్కొనే ఆత్మవిశ్వాసం కలుగుతుంది.

పాప విముక్తి, పుణ్యఫల ప్రాప్తి:
కార్తీక మాసంలో శివాలయ దర్శనం, దీపారాధన, శివనామ స్మరణ చేయడం వల్ల పాపాలు తొలగి పుణ్యం లభిస్తుందని పురాణ విశ్వాసం. 

పంచారామ క్షేత్రాలను దర్శించుకోవడం ద్వారా ఆధ్యాత్మికంగా ఉన్నత స్థితిని పొందవచ్చని భక్తులు నమ్ముతారు.

కుటుంబంలో సుఖశాంతులు:
పంచారామ క్షేత్రాల్లో పరమశివుడిని, అమ్మవారిని దర్శించుకుని కుటుంబ సభ్యుల క్షేమం కోసం ప్రార్థించడం వల్ల కుటుంబంలో సుఖశాంతులు, ఐకమత్యం కలుగుతాయని విశ్వాసం.

ఆరోగ్య ప్రాప్తి:
శివుడిని మృత్యుంజయుడిగా కొలుస్తారు. కార్తీక మాసంలో శివారాధన, మహామృత్యుంజయ మంత్ర జపం చేస్తూ ఆరోగ్యం, ఆయురారోగ్యం కోసం ప్రార్థించడం ఆధ్యాత్మికంగా విశేషమైనదిగా భావిస్తారు.

మానసిక ప్రశాంతత:
శివాలయాల్లో చేసే ధ్యానం, శివనామ స్మరణ, దీపారాధన మనసుకు ప్రశాంతతను అందిస్తాయి. ఆందోళనలు తగ్గించుకుని భక్తిభావంతో జీవించడానికి ప్రేరణ కలుగుతుంది.

మోక్ష ప్రాప్తికి మార్గం:
శివభక్తి, ధర్మాచరణ, దైవచింతన ద్వారా మోక్షమార్గంలో పయనించవచ్చని హిందూ ఆధ్యాత్మిక సంప్రదాయం తెలియజేస్తుంది.

పంచారామ క్షేత్రాల జాబితా:
1. అమరారామం (అమరావతి)
జిల్లా: పల్నాడు జిల్లా (అమరావతి)
స్వామివారు: శ్రీ అమరలింగేశ్వర స్వామి
అమ్మవారు: బాల చాముండిక

2. క్షీరారామం (పాలకొల్లు)
జిల్లా: పశ్చిమ గోదావరి జిల్లా
స్వామివారు: శ్రీ క్షీర రామలింగేశ్వర స్వామి
అమ్మవారు: పార్వతీ దేవి

3. సోమారామం (భీమవరం)
జిల్లా: పశ్చిమ గోదావరి జిల్లా (గునుపూడి)
స్వామివారు: శ్రీ సోమేశ్వర స్వామి
అమ్మవారు: అన్నపూర్ణా దేవి

4. ద్రాక్షారామం (ద్రాక్షారామం)
జిల్లా: కోనసీమ జిల్లా
స్వామివారు: శ్రీ భీమేశ్వర స్వామి (మాణిక్యాంబ శక్తి పీఠం కూడా ఉంది)
అమ్మవారు: మాణిక్యాంబ

5. కుమారారామం (సామర్లకోట)
జిల్లా: కాకినాడ జిల్లా
స్వామివారు: శ్రీ కుమార భీమేశ్వర స్వామి
అమ్మవారు: బాలాసుందరి దేవి

మన దేవాలయాలు చారిత్రక నగరాలూ

Karthika Masam - Koti Somavaram - కార్తిక మాసం - కోటి సోమవారం

కార్తిక మాసం - కోటి సోమవారం

కోటి సోమవారం అనేది కార్తీక మాసంలో అత్యంత విశిష్టమైన శివారాధనా పర్వదినంగా కొన్ని సంప్రదాయాల్లో భావిస్తారు. 

ఈ రోజున శివుడిని భక్తిశ్రద్ధలతో పూజించడం, అభిషేకాలు చేయడం, దీపారాధన నిర్వహించడం ఎంతో పుణ్యప్రదమని భక్తుల విశ్వాసం.

కార్తీక మాసంలో వచ్చేశ్రవణ నక్షత్రం రోజున కోటి సోమవారంగా పిలుస్తారు. కార్తిక మాసం శివ కేశవులకు అత్యంత ప్రీతికరమైనది. అందులోనూ శ్రవణ నక్షత్రం అంటే ఆధ్యాత్మిక పరంగా ఆ రోజును ఎంతో పవిత్రంగా భావిస్తారు. 

ఈ మాసంలో భక్తులు భక్తి శ్రద్ధలతో అన్ని సోమవారాలు ఉపవాసం ఉండటం ఆనవాయితీ.

ఈ రోజున శుక్ల సప్తమి, శ్రవణ నక్షత్రం, సోమవారం కలిసి రావడం ఈ ప్రత్యేకతకు కారణంగా చెబుతారు. 

ఈ రోజు ఉపవాసం ఉంటే కోటి సోమవారాలు ఉపవాసం ఉన్న ఫలితం దక్కుతుందని పెద్దలు చెబుతుంటారు.

కోటి సోమవారం:
సోమవారం శివుడికి అత్యంత ప్రీతికరమైన రోజుగా హిందూ సంప్రదాయంలో భావిస్తారు. ముఖ్యంగా కార్తీక మాసంలోని సోమవారాలు శివారాధనకు విశేషమైనవిగా చెబుతారు.

కొన్ని సంప్రదాయాల్లో కార్తీక మాసంలో శ్రవణ నక్షత్రం వచ్చే రోజును కోటి సోమవారంగా పరిగణిస్తారు.

ఈ రోజున శివుడిని పూజిస్తే కోటి సోమవారాలు పూజించినంత పుణ్యఫలం లభిస్తుందని భక్తుల విశ్వాసం. అందుకే ఈ రోజుకు కోటి సోమవారం అనే పేరు వచ్చింది.

కార్తిక మాసంలో నది/ సముద్ర స్నానానికి ఎంతో ప్రత్యేకత ఉంది. 

నదీ స్నానం అనంతరం ఉపవాసం ఉండటం, దీపారాధన, దీప దానం, సాలగ్రామ పూజ, వన సమారాధనలు ఈ నెల పొడవునా అచరిస్తారు. 

కార్తిక మాసంలో శ్రీమహా విష్ణువు నదులు, చెరువుల్లో నివసిస్తాడని విశ్వసిస్తారు.

అందుకే ఈ మాసంలో నదీ స్నానానికి అత్యంత ప్రాధాన్యత ఉంది. నదీ స్నానం కుదరనప్పుడు కార్తీక మాసంలో అన్ని రోజుల్లోనూ సూర్యోదయానికి ముందే చన్నీటి స్నానం చేయాలి. 

గంగ, యమున, గోదావరి, కృష్ణ, కావేరి, నర్మద, తపతి, సింధు నదులను స్మరించుకోవాలి.



కార్తిక పురాణము

9va adhyayamu yamaduta sambashanamu, vishnuduthokti ajamilhunivimukti - 9వ అధ్యాయము యమదూత సంభాషణము, విష్ణుదూతోక్తి అజామిళునివిముక్తి

కార్తిక పురాణము (స్కాంద పురాణాం) - 9వ అధ్యాయము 
యమదూత సంభాషణము, విష్ణుదూతోక్తి అజామిళునివిముక్తి 

విష్ణుదూతలడిగిరి. ఓ యమదూతలారా! మీ ప్రభువు మీతో చెప్పిన మాటలేమిటి? మీ యమ దండనకు ఎవ్వడు తగినవాడు? పుణ్యమనగా ఏమి? పాతకమనగా ఏమి? ఈ విషయములన్నిటిని మాకు జెప్పుడు. 

ఇట్లని విష్ణుదూతలడుగగా యమదూతలు లిట్లు పల్కిరి. 

ఓ విష్ణుదూతలారా! సావధానముగా వినుడు, సూర్యుడు, చంద్రుడు, అగ్ని వాయువు, ఆకాశము, గోవులు, సంధ్యలు, పగలు, దిక్కులు, కాలము ఇవి మనుష్యుని పుణ్యపాపములను గురించి సాక్షులు. 

మేము వీరి సాక్ష్యముతో విచారించి పాపములను జేసిన వానిని దండింతుము. వేదమార్గమును వదలి ఇచ్చానుసారముగా తిరుగుచు వేదశాస్త్రములను దూషించుచు సాధుబహిస్కృతుడైన వానిని మేము దండింతుము. 

బ్రాహ్మణుని, గురువును, రోగినిపాదములచేత తన్నువాడును, తల్లిదండ్రులతో కలహించువాడును అయిన వారిని మేము దండింతుము. 

నిత్యము అబద్ధమాడుచు జంతువులను జంపుచు కులాచారమును వదలిన వారిని మేము దండింతుము. 

ఇచ్చిన సొమ్మును తిరిగి తీసుకున్న వానిని, డాంబికుని, దయాశాంతులు లేనివానిని, పాపకర్మలందాసక్తులైన వారిని మేము దండింతుము. 

పరుని భార్యతో క్రీడించువానిని, ద్రవ్యమును గ్రహించి సాక్ష్యమును జెప్పువానిని మేము దండింతుము. 

నేను దాతనని చెప్పుకొనువానిని, మిత్ర ద్రోహిని, ఉపకారమును మరచిన వానిని అపకారమును జేయువానిని మేము దండింతుము. 

వివాహమును చెరుచువానిని, ఇతరుల సంపత్తులను జూచి అసూయపడువానిని మేము దండింతుము. 

పరుల సంతానమును జూచి దుఃఖించువానిని కన్యాశుల్కముల చేత జీవించువానిఇన, వడ్డీతో జీవించువానిని మేము దండింతుము. 

చెరువును,నూతిని, చిన్నకాలువలను నిర్మించు వ్యాపారమును మార్పించు వానిని, నిర్మితములయిన వాటిని చెరుచు వానిని మేము దండింతుము. 

మోహముచేత మాతాపితరుల శ్రాద్ధమును విడచినవానిని, నిత్యకర్మను వదలిన వానిని మేము దండింతుము. 

పరపాకపరిత్యాగిని, పరపాకరతుని, పితృశేషాన్నమును భుజించు వానిని మేము దండింతుము. 

పరపాకపరిత్యాగియనగా తాను వండిన అన్నములో ఇతరులకు యెంత మాత్రమును బెట్టకతానే అంతయు భుజించువాడు. 

పితృశేషాన్నభోక్తయనగా శ్రాద్ధభోక్తలు భుజించిన తరువాత మిగిలిన అన్నమును భుజించువాడు. 

ఇతరుడు దానము చేయుసమయాన ఇవ్వవద్దు అని పలుకువానిని, యాచించిన బ్రాహ్మణునకు ఇవ్వనివానిని, తన్ను శరణుజొచ్చినవానిని చంపు వానిని మేము దండింతుము. 

స్నానమును సంధ్యావందనమును విడుచు వానిని, నిత్యము బ్రాహ్మణనిందకుని, బ్రాహ్మణ హంతకుని, అశ్వహంతకుని, గోహంతకుని మేము దండింతుము. 

ఈమొదలయిన పాతకములను జేయుమానవులు యమలోకమందుండు మాచేత యాతనలను పొందుదురు. 

ఈ అజామిళుడు బ్రాహ్మణుని వంశమందు జన్మించి దాసీసంగ లోలుడై పుట్టినది మొదలు చచ్చువరకు పాపములను చేసినాడు. 

ఇతనిచే చేయబడిన పాపములకు మితి లేదు. ఇట్టి విప్రాధముడు మీ విష్ణులోకమునకు ఎట్లు అర్హుడడగును. 

ఈ ప్రకారముగా పలికిన యమదూతల మాటలు విని విష్ణుదూతలు చిఱునగవుతో వికసించిన ముఖపద్మ ములు గలవారై మేఘసమాన గంభీరధ్వనితో నిట్లనిరి. 

ఏమియాశ్చర్యము. మీరింత మూఢులు, ధర్మమర్యాదను మేము చెప్పెదము, సావధానముగా వినుడు. 

దుస్సంగమును విడుచువాడు, సత్సంగము ఆశ్రయించువాడు, నిత్యము బ్రహ్మచింతనమును జేయువాడు యమదండార్హుడుగాడు. 

స్నానసంధ్యావందనము లాచరించువాడును, జపహోమాదులాచరించువాడును, సర్వభూతములందు దయావంతుడును, యమలోకమును పొందడు. 

సత్యవంతుడై అసూయా దోషరహితుడై జపాగ్ని హోత్రములను జేయుచు కర్మలఫలములను బ్రహ్మయందుంచినవాడు యమదండార్హుడు గాడు. 

కర్త్రుభోక్తృల త్వాదులను సగుణపరమేశ్వరునియందు స్థాపించి ఈశ్వరార్పణబుద్ధితో కర్మలను ఆచరించుటచే తాత్పర్యముగా కలవాడు. యమమందిరానికి వెళ్ళడు. 

అన్నదాన మాచరించువాడును, జలదాతయు, గోదానకర్తయు, వృషోత్సర్గకర్తయు యమలోకమును పొందడు. 

వృషోత్సర్గము = ఆబోతును అచ్చుపోసి వదలుట. 

విద్యను గోరినవారికి విద్యాదాన మాచరించువాడును, పరోపకారమందాసక్తి గలవాడును యమలోకమును పొందడు. 

హరిని బూజించువాడును, హరినామము జపించువాడును, వివాహములను ఉపనయనములను జేయువాడును, యమలోకమును పొందడు. 

మార్గమధ్యమందు మండపములు కట్టించువాడును, క్రీడాస్థానములను గట్టించువాడును, దిక్కులేని శవమునకు మంత్ర సంస్కారమును జేయించువాడును యమలోకమును పొందడు. 

నిత్యము సాలగ్రామార్చనమాచరించి ఆ తీర్థమునుపానముజేసి దానికి వందనమాచరించువాడు యమలోకమును పొందడు. 

తులసీకాష్టమాలికను మెడయందు ధరించి హరిని పూజించువాడును సాలగ్రామమును పూజించువాడును యమలోకమును పొందడు. 

భాగవతమును వ్రాసి గృహమందు పూజించుచున్నను, గృహమందుంచుకొన్నను యమలోకమును పొందడు. 

సూర్యుడు మేషతులా మకర సంక్రాంతుల యందుండగా ప్రాతస్నానమాచరించువారు యమలోక మును పొందరు. 

రుద్రాక్షమాలికను ధరించి జపదానహోమాదులను ఆచరించువాడు యమలోకమును పొందడు. 

నిత్యమును అచ్యుత, గోవింద, అనంత, కృష్ణ, నారాయణ, ఓరామయని హరినామసంకీర్తన ఆచరించువాడు యమలోకమును పొందడు. 

కాశియందు మణికర్ణికా ఘట్టమందు హరిస్మరణ చేయుచు మృతినొందిన యెడలవాడు సర్వపాపములు చేసిన వాడయినను యమలోకమును పొందడు. 

దొంగ, కల్లు త్రాగువాడు, మిత్ర హంతకుడు, బ్రాహ్మణ హంత, గురు భార్య రతుడు, స్త్రీ హత్య, రాజ హత్య, గురు హత్య, గో హత్య చేసిన పాపాత్ములు మరణకాలమందు హరిని స్మరించిన యెడల పాపవిముక్తులగుదురు. 

మహిమను తెలిసికొనిగాని, తెలియకగాని మరణకాలమున హరి నామ సంకీర్తన గావించినవారు పాపాత్ములయినను ముక్తులగుదురు. 

పడినప్పుడును, తొట్రుపాటు బొందినప్పుడును, కొట్టబడినప్పుడును, జ్వరాదులచేత పీడింపబడినప్పుడును, సప్తవ్యసనములచేత పీడింపబడునప్పుడును, వశముకానప్పుడును హరి హరీయని అన్న యెడల యమయాతన పొందడు. 

అనేక జన్మలలో సంపాదించబడి ప్రాయశ్చిత్తములు లేక కొండలవలె పెఱిగియున్న పాపములన్నియు భూమియందుగాని స్వర్గమందుగాని హరినామ సంకీర్తనముచేత నశించును. 

మరణావస్థలో ఉన్నవాడు హరి నామస్మరణమును జేసినయెడల వాని పాపములన్నియు అగ్నిలోనుంచిన దూదివలె నశించును. 

విష్ణుదూతలిట్లు యమదూతలతో పలికి అజామిళుని యమదూతల వలన విడిపించిరి. 

తరువాత అజామిళుడు విష్ణుదూతలకు నమస్కారముచేసి మీ దర్శనము వలన నేను తరించితిననెను. 

తరువాత విష్ణుదూతలు వైకుంఠమునకుబోయిరి. తరువాత అజామిళుడు యమదూత విష్ణుదూతల సంవాదమును విని ఆశ్చర్యపడి అయ్యో ఎంతకష్టమాయెను. 

ఆత్మహితము చేసికొనలేక పోతిని గదా. ఛీఛీ! నా బ్రతుకు సజ్జననిందితమాయెనుగదా, పతివ్రతమైన భార్యను వదలివేసి కల్లుద్రాగెడి ఈ దాసిభార్యను స్వీకరించితినిగదా, వృద్ధులు నాకంటే వేరేదిక్కులేని వారును పుణ్యాత్ములయిన మాతా పితరులను నీచుడనై విడిచితినిగదా, 

అయ్యో యెంత కష్టము, ధర్మమును చెఱుచువారు కాముకులు నిరంతరమనుభవించెడి నరకమందిప్పుడు నేను నిశ్చయముగా పడెడివాడను. 

ఇదియేమి ఆశ్చర్యము. ఇది స్వప్నమా ఆ నల్లకత్తులను ధరించిన యమభటులెట్లు పోయిరి? నేను పూర్వజన్మమందు పుణ్యమాచరించిన వాడను ఇదినిజము. 

అట్లు గానిచో దాసీపతినైన నాకు మరణకాలమందు హరిస్మృతి యెట్లుగలుగును? 

నా జిహ్వహరినామమును యెట్లు గ్రహించును? పాపాత్ముడైన నేనెక్కడ అంత్యకాలమందీ స్మృతియెక్కడ? 

సిగ్గు విడిచి బ్రాహ్మణులను జంపునేనెక్కడ, మంగళకరమయిన నారాయణ నామమెక్కడ? 

అజామిళుడిట్లు విచారించి నిశ్చలమైన భక్తినిబొంది జితేంద్రియుడై కొంతకాలముండి సాయుజ్యముక్తిని బొందెను. 

కాబట్టి నారాయణ నామ కీర్తన గావించువారు సమస్తపాపవిముక్తులై వైకుంఠలోకము పొందుదురు. ఇందుకు సందియములేదు.

10వ అధ్యాయము అజామిళ పూర్వజన్మ వృత్తాంతము

8va adhyayamu sukshmadharmanirupanamu, ajamilopakyanamu - 8వ అధ్యాయము సూక్ష్మధర్మనిరూపణము, అజామిళోపాఖ్యానము

కార్తిక పురాణము (స్కాంద పురాణాం) - 8వ అధ్యాయము 
సూక్ష్మధర్మనిరూపణము, అజామిళోపాఖ్యానము

వసిష్టమునీంద్రా! నా మనస్సులో గొప్ప సందేహము గలిగినది.ఆ సందేహమును దెలిపెదను. దానిని నశింపజేయుము. 

మీరు నాకు ధర్మసూక్ష్మమును జెప్పితిరి. పాతకములలో గొప్పవానిని జెప్పినారు. వర్ణసంకర కారకములైన మహాపాపములు చేసిన దుర్దనులు వేదత్రయోక్తములయిన ప్రాయశ్చిత్తములను జేసికొని పరిశుద్దులగుదురని ధర్మశాస్త్రములందు చెప్పబడియుండగా మీరు ధర్మలేశముచేతనే పరిశుద్ధులై విష్ణులోకమును పొందుదురని చెప్పినారే,అదియెట్లు సంభవమగును? 

ఓ మునీశ్వరా! అనంత పాతకములు చేసి ఈ పాపములు గొప్పవనియు వీటికి ప్రాయశ్చిత్తములు చేయించుకొనవలెననియు తెలిసియు అట్లు చేయక దైవవశము చేత సంభవించి కార్తికదీపదానాది పుణ్యముల వలన వైకుంఠమునకు బోవుట ఎట్లు సంభవించును. 

వజ్రపర్వతమును గోటికొన చివరిభాగముచేత చూర్ణముచేయుటకు శక్యమగునా? తాను లోపలనుండి గృహమునకు అగ్నినిముట్టి౦చి మండుచుండగా తెలియనివానివలె ఉండి పుడిసెడు నీల్ళు అనగా చేతికివచ్చినన్ని జలము అగ్నిమీద చల్లినయెడల ఆ అగ్నిచల్లాఱునా? 

మహానదీ ప్రవాహములో స్వయముగా పడికొట్టుకొనిపోవుచు గడ్డిపరకను ఆధారముగాచేసి కొనిన దరికిజేరునా? 

స్వయముగా గొప్ప పర్వతమునెక్కి అక్కడనుండి క్రిందకిపడుతూ మధ్యనున్న చిన్నతీగను పట్టుకున్న యెడల పడకుండునా? 

ఇట్టి దృష్టాంతములనుబట్టి చూడగా అధికములయిన పాపములను జేసి స్వల్పపుణ్యముచేత వాటిని నశింపజేయుట ఎట్లు శక్యమగును? 

నాకీ సంశయమును నశింపజేయుము. నాకే గాదు వినువారికందరికిని ఇది ఆశ్చర్యకరమే. 

కార్తిక మాఘ వైశాఖమాసములందు చేసిన స్వల్ప పుణ్యమే అధిక పాతకములను నశింపజేయునని మీరు చెప్పినారు. అది యెట్లు సిద్ధించును? 

సూతుడిట్లు పల్కెను. ఈ ప్రకారముగా రాజు మాటలను విని వసిష్ఠమునీంద్రుడు చిరునవ్వు నవ్వి కొద్ది పుణ్యముచేత పెద్దపాపములెట్లు నశించునో, అని ఆశ్చర్యముతో ఉన్న రాజుతో ఇట్లనెను. 

ఓ రాజా! వినుము. మంచి విమర్శచేసితివి. నేను గూడ విచారించితిని వేద శాస్త్రపురాణములను విచారించగా ధర్మములలో సూక్ష్మములున్నట్లు తెలిసినది. 

అట్టి సూక్ష్మ ధర్మములు ఎంతపనినైన చేయసమర్థములు. ఒకానొకప్పుడు గొప్పపుణ్యము గూడా స్వల్పమైపోవును. ఒకప్పుడు స్వల్పపుణ్యమే అధికఫలప్రదమగును. 

కనుక ఈ విషయమందు సందేహము పొందకుము. చెప్పెదను సావధానముగా వినుము. 

ధర్మములు, గుణత్రయముతో గూడుకొని స్వల్పాధికములగును. గుణములు, సత్వము, రజస్సు, తమస్సు అనునవిమూడు. ఈ మూడు గుణములును ప్రకృతి వలన గలిగినవి. ప్రకృతియనగా మాయ. 

అందులో సత్వగుణము వలన చేయబడిన ధర్మమును సూక్ష్మమందురు. ప్రాయశ్చిత్తములన్నియు తమస్సు వలన కర్మకాండయంతయు రజోగుణము వలన గలిగినవి. తిరిగి జన్మ ఇచ్చునవి తమోగుణము వలన చేసిన ధర్మము తామసమనబడును. ఇది నిష్పలము. 

ఇందులో సత్వగుణముతో చేయబడిన ధర్మమును సూక్ష్మమని నీకు జెప్పితిని. అది కొంచెమైనను కాలయోగము వలన వృద్ధినొందును. 

దేశ మనగా పుణ్యక్షేత్రము, కాలమనగా పుణ్యకాలము, పాత్రమనగా యోగ్యుడైన బ్రాహ్మణుడు. 

ఈ మూడు విధముల యోగ్యతను విచారించక విధి రహితముగాను, మంత్రరహితముగాను చేయుదానాదికము తామసమనబడును. ఇది ఎంతగొప్పదయినను సర్వపాపనాశన సామర్థ్యము గలది గాదు. 

ఓ జనక మహారాజా! దేశకాల పాత్రములను విచారించి చేసిన ధర్మము అక్షయమై మోక్షహేతువగును. 

ధర్మము అధికమో స్వల్పమో కాలమునుబట్టి విచారించి నిశ్చయించవలెను. కర్మ పద్ధతి జ్ఞేయము అనగా కర్మసరణి ఇట్టిదని నిశ్చయించుటకు వీలులేదని భావము. 

అట్లు దేశకాలవిచారణచేసిన ధర్మము వలన సుఖమును బొందుదురు. కాబట్టి జ్ఞానముచేతగాని, అజ్ఞానముచేతగాని దేశకాలపాత్ర విచారణతో చేసిన శర్మము అక్షయ ఫలము ఇచ్చును. ఇందుకు సందియములేదు. 

పర్వతము యెత్తునకట్టెలను పేర్చి అందులో గురవిందగింజంత అగ్నిని ఉంచిన యెడల ఆ కట్టెలన్నియు బూడిదయగును. 

గృహములోని చీకటిని చిన్నదీపమును వెలిగించిన నశించును. చిక్కగా ఉన్న బురద నీటిలో ఎంతకాలము స్నానము చేసినను చివరికి నిర్మలజలమందు ఒకమారు స్నానమాచరించిన యెడల ఆ మురికిపోవును అట్లే అల్ప పుణ్యము చేత అధికపాపములు నశించగలవు. 

అజ్ఞానముచేతగాని, జ్ఞానముచేతగాని చేసిన పాపములు అధికములు గాని స్వల్పములు గాని హరినామ సంకీర్తనము వలన నశించును. 

మహిమ తెలియక చేయబడినదయినను హరినామసంకీర్తనముచే పాపములన్నియు వెదురు పొదలను అగ్నివలె దహించును. 

పైన చెప్పిన విషయమై ఒక కథను చెప్పెదను వినుము. పూర్వకాల మందు కన్యాకుబ్జమను క్షేత్రమందు వేదవేదాంగపారంగతుడై సత్వనిష్ఠుడను నొక బ్రాహ్మణుడు గలడు. 

ఆ బ్రాహ్మణునకు పతివ్రతయు ధర్మాత్మురాలు అగు భార్యగలదు. వారిరువురకు చివరికాలమున అజామిళుడను ఒక కుమారుడు పుట్టెను. 

అజామిళుడు దురాచారుడును, దాసీభర్తయు, హింసకుడును, నిత్యము దాసీసాంగత్యమందు ఆసక్తిగలవాడై యుండెను. 

అట్టివాడు స్వల్పపుణ్యముచేత అనగా తెలియక చేసిన హరినామసంకీర్తనము వలన తరించెను. 

ఆ అజామిళుడు ప్రవర్తించిన ప్రకారము ఎట్లనిన అజామిళునకు యౌవనము రాగానే ఒక దుష్టబ్రాహ్మణుని యింటిలో ఒకదాసీయున్నది. 

దానితో సంగమముచేసి దాని యందు ఆసక్తుడై తల్లిని తండ్రిని విడిచి కామాతురుడై దానితోనే జలపానము, భోజనము, శయనము జరుపుచు వైదిక కర్మలను విడిచికామశాస్త్ర ప్రవీణుడై ఆలింగన చుంబనాది కర్మలయందాసక్తిగలవాడై ఆ దాసీతోనే నిరంతరము కాలము గడుపుచుండెను. 

ఆ అజామిళుడిట్లు కులాచారభ్రష్ఠుడైన కారణమున బంధువులందరు అతనిని గృహమునుండి వెళ్ళగొట్టిరి. 

అజామిళుడు ఆయూరిలోనే యొక చండాలుని యింటిలో నివాసము చేసికొని నిత్యము దాసీతో గూడి కుక్కలను వుచ్చులువేసి మృగములను పట్టు కొనుచు వాటిని వెంటబెట్టుకొని అరణ్యమునకు పోయి పశువులను, పక్షులను, మృగములను జంపి వాటిమాంసమును భుజింపుచు కాలము గడుపుచుండెను. 

ఇట్లుండగా ఒకనాడు ఆదాసీ కల్లుద్రాగుదమను యాశతో తాటి చెట్టిక్కి కమ్మవిరిగి క్రిందబడి మృతిబొందెను. 

తరువాత అజామిళుడు భార్యను జూచి తన ప్రాణములకంటె అధికప్రియమైనది. గనుక చచ్చిన శవమును తనముందు ఉంచుకొని వికలుడై బహు శోకించి తరువాత దానిని కొండగుహయందు పారవైచి యింటికి బోయెను. 

తరువాత అజామిళుడు యౌవనవంతురాలయిన దాని కూతురుచూచి పాపాత్ముడు గనుక తన పుత్రికయను నీతిని విడిచి దానితో చిరకాలము సంభోగించి సుఖించెను. 

తరువాత అజామిళునకు ఆ కూతురి యందు కొందరు పుత్రులు గలిగి నశించిరి. అందు చివరివాడు మాత్రము మిగిలియుండెను. 

వానికి నారాయణ అను నామకరణము చేసి అజామిళుడు నడుచునప్పుడును, కూర్చుండునప్పుడును, జలపానకాలమందును, భోజనము చేయునప్పుడును, తిరుగుచున్నప్పుడును పుత్రపాశముచేత బద్దుడై నిరంతరము ఆ నామముచే (నారాయణనామమునే) పలుకుచుండెను. 

తరువాత కొంతకాలమునకు అజామిళునకు మరణకాలము సమీపింపగా అతనిని తీసికొనిపోవుటకుగాను ఎఱ్ఱనిగడ్డములు మీసములు గలిగి చేతులందు దండములను రాళ్లను కత్తులను ధరించి భయంకరులైన యమదూతలు వచ్చిరి. 

అజామిళుడు తనను దీసికొని పోవవచ్చిన యమదూతలను జూచి భయపడి పుత్రస్నేహముచేత దూరమందాటలోనున్న కుమారుని నారాయణ, నారాయణాయని పిలిచెను. 

ఆ పిలుచునప్పుడు భయముచేత దీనస్వరముతో పెద్దగా ఓ నారాయణా యని పలుమాఱులు పిలిచెను. 

రాజా! దైన్యముతోగూడి నారాయణ నామసంకీర్తనమును మరణకాలమందు అజామిళుడు చేయగా విని యమదూతలు ఆలోచించి దగ్గరకు రావెరచి దూరముగా పోయి భయముతో నుండిరి. 

అంతలో తేజోవంతులైన విష్ణుదూతలువచ్చి యమదూతలను జూచి ఓయీ! ఈ అజామిళుడు మావాడుగాని మీవాడుగాడని పలికిరి. 

రాజా! ఆ విష్ణుదూతలు పద్మములవలె విశాలములయిన నేత్రములు గలవారును. పచ్చని పట్టుబట్టలను ధరించినవారును. పద్మమాలాలంకృతులును, కిరీటవంతులును, కుండలధారులును, మంచి మాలికలు, వస్త్రములు, ఆభరణములు గలవారును, నాలుగు చేతులు గలవారును, సుందర దేహులును, శంఖచక్రములను ధరించినవారును, తమ కాంతిచేత దేశమంతయు ప్రకాశింపజేయువారును అయిఉండిరి. 

ఇట్టీ విష్ణుదూతలను జూచి యమదూతలు ఇట్లనిరి. మీరు ఎవ్వరు! కిన్నరులా! సిద్ధులా! చారణులా! దేవతలా! అని యడుగగా యమదూతలను ధిక్కరించి విష్ణుదూతలు అజామిళుని తమ పుష్పకవిమానము ఎక్కించుకుని తమ లోకమునకు తీసికొని పోవుకోర్కె గలవారై ఇట్లుపలికిరి.

9వ అధ్యాయము యమదూత సంభాషణము, విష్ణుదూతోక్తి అజామిళునివిముక్తి

Prabodhini Ekadashi - Devutthana Ekadashi - ప్రబోధిని ఏకాదశి - దేవుత్తాన ఏకాదశి

ప్రబోధిని ఏకాదశి - దేవుత్తాన ఏకాదశి దేవుత్తాన ఏకాదశిని ప్రబోధిని ఏకాదశి, హరిబోధిని ఏకాదశి అని కూడా పిలుస్తారు. హిందూ సంప్రదాయంలో 24 ఏకాదశులల...