Chitta Nakshatra - చిత్త నక్షత్రము

చిత్త నక్షత్రము

నక్షత్రం - చిత్త

అధిపతి - కుజుడు

గణము - రాక్షస

జాతి - స్త్రీ

వృక్షం - తాటి

జంతువు - పులి

నాడి - మధ్య

పక్షి - గరుడ

అధిదేవత - త్వష్ట్ర

రాశి - 1,2 పాదాలు కన్య, 3,4 పాదాలు తుల

చిత్తా నక్షత్ర జాతకుల గుణగణాలు
నక్షత్రములలో చిత్తా నక్షత్రం 14వ నక్షత్రం. ఈ నక్షత్రం ఒకటవ రెండవ మూడవ పాదములు పితృ మాతృ సహోదరులకు ఆరు నెలల దోషం. శాంతి అవసరము. చతుర్ధం అయితే హోమ శాంతి అవసరము.

చిత్తా నక్షత్రముకు అధిపతి కుజుడు, గణము రాక్షస, జంతువు పులి, వృక్షము తాటి చెట్టు, రాశ్యధిపతులు బుధుడు శుక్రుడు, అధిదేవత త్వష్ట. బాల్యములో ఇబ్బందులు ఎదుర్కొంటారు.

ఇతరుల ఆర్థిక సాయముతో జీవితములో ముఖ్యఘట్టాలు పూర్తి చేసుకుంటారు. తాను అనుభవించిన కష్టాలు జీవితములో మరెవ్వరు అనుభవించకూడదని అహర్నిశలు కష్టపడతారు.

సంతానము ఉన్నత స్థితికి వస్తారు. విదేశీ వ్యవహారాలు ఆలస్యముగా కలసి వస్తాయి. వస్తువులను బాగు చేయడము (రిపేరు వర్క్), సాహసకృత్యాలు, సాంకేతిక పరిజ్ఞానము, అగ్నికి సంబంధించిన వ్యాపారాలు కలసి వస్తాయి.

జీవిత మధ్య భాగములో స్థిరాస్థులు కలిసి వస్తాయి. పాడి పంట వ్యవసాయము పట్ల ప్రత్యేక అభిరుచి ఉంటుంది. వీరు కష్టపడి పనిచేస్తారు. అదేవిధంగా, దాదాపుగా ప్రతి ఒక్కరితో వీరు చక్కటి సంబంధాలుంటాయి.

ఎవరిని కలిసినా, వారిపై ప్రేమాభిమానాలను కురిపిస్తారు. వాగ్దాటి అనేది వీరి ప్రత్యేక లక్షణం. ఎల్లప్పుడూ పూర్తి శక్తి మరియు శౌర్యంతో ఉంటారు. ఏది ఏమైనప్పటికీ కూడా, వీరు ప్రతి పనిని కూడా తమ శక్తితో పూర్తి చేస్తారు.

వీరు ఎలాంటి ప్రతికూల పరిస్థితికి భయపడరు, దానికి బాధ్యులుగా వీరు అన్ని రకాల ప్రతికూల పరిస్థితులను ధైర్య సాహసాలతో ఎదుర్కొంటారు, వాటిపై విజయం సాధించి, ముందుకు సాగుతారు. వీరు దేనికి కూడా సాకులు వెతకరు, ఏ పని చేసినప్పటికీ దానిని సాధ్యమైనంత త్వరగా పూర్తి చేయడానికి ప్రయత్నిస్తారు.

చిత్తా నక్షత్ర జాతకులు ఎప్పుడూ కూడా బిజీగా ఉండటానికి ఇష్టపడతారు, అందువల్లనే ఒక పని పూర్తయిన వెంటనే మరో పనిని చేపడతారు. చాలావరకు, వీరికి విశ్రాంతి అనే పదానికి అర్థమే తెలియదు. చాలాసార్లు మొండిగా ఉంటారు.

వ్యాపార సంబంధిత విషయాల్లో వీరి మెదడు చాలా చురుగ్గా పనిచేస్తుంది. వ్యాపార దృక్పథం కారణంగా, వీరు సంపదను ప్రోగు చేయడం వీరికి ఆసక్తి కలిగిస్తుంది మరియు వాస్తవిక జీవితం నుంచి వీరు సంతోషాన్ని పొందుతారు.

వీరికి అట్టడుగు వర్గాలపై నిజమైన ప్రేమాభిమానాలుంటాయి మరియు వారికిమేలు చేయడం కొరకు ఎల్లప్పుడూ సిద్ధంగా ఉంటారు. వీరికి 32 సంవత్సరాల వయస్సు వచ్చేంత వరకు కొంత ఇబ్బందిని వీరు ఎదుర్కొనవచ్చు. గొప్ప విజయాలను సాధిస్తారు.

చిత్త నక్షత్రము మొదటి పాదము
చిత్తా నక్షత్ర అధిపతి కుజుడు. పట్టుదల, మొండితనం వీరి లక్షణాలు. ఈ జాతకులకు ఆరు సంవత్సరాలకు రాహుదశ వస్తుంది. కనుక 18 సంవత్సరాల రాహుదశ కాలంలో విద్యలో ఆటంకాలు ఎదురవుతాయి. ప్రయత్న పూర్వకంగా విద్యలో విజయం సాధించాలి.

రాహుదశలో ఉన్న కారణంగా ఊరికి దూరంగా విద్యాభ్యాసం చేసే అవకాశాలు అధికం. 24 సంవత్సరాలకు గురుదశ వస్తుంది కనుక జీవితంలో త్వరగా స్థిరపడతారు. సకాలంలో వివాహం జరుగుతుంది. సంపాదించినది జాగ్రత్తగా కాపాడుకోవాలి. లేకుంటే 40 సంవత్సరాలకు వచ్చే 19 సంవత్సరాల శనిదశలో ఖర్చులు అధికమవుతాయి.

59 సంవత్సరాలకు వచ్చే 17 సంవత్సరాల బుధ దశ తరువాత కొంత ఉపశమనం ఉంటుంది. మిగిలిన జీవితం సాఫీగా కొనసాగుతుంది. ఇక వీరికి విద్యుత్, అగ్ని, భూ సంబంధిత ప్రభుత్వ ఉద్యోగాలు అనుకూలంగా ఉంటాయి. అధికారులుగా రాణించడానికి అవకాశాలు ఉంటాయి. నిర్వహణ సామర్థ్యం కూడా అధికమే.

చిత్త నక్షత్రము రెండవ పాదము
చిత్తా నక్షత్ర రెండవ పాదములో జన్మించిన వీరికి పట్టుదల అత్యధికం. నాలుగు సంవత్సరాలకు రాహుదశ వస్తుంది కనుక 18 సంవత్సరాల రాహుదశ కాలంలో విద్యలో ఆటంకాలు ఎదురవుతాయి. ప్రయత్నపూర్వకంగా విద్యలో విజయం సాధించాలి. రాహుదశలో ఉన్న కారణంగా ఊరికి దూరంగా విద్యాభ్యాసం చేసే అవకాశాలు అధికం.

22 సంవత్సరాలకు గురుదశ వస్తుంది కనుక జీవితంలో త్వరగా స్థిరపడతారు. సంపాదించినది జాగ్రత్తగా పొదుపు చేసుకోవాలి. లేదంటే 38 సంవత్సరాలకు వచ్చే శని దశ కాలంలో ఖర్చులు అధికమవుతాయి. దీంతో ఇబ్బందులకు లోనయ్యే అవకాశం ఉంది. 57 సంవత్సరాలకు వచ్చే 17 సంవత్సరాల బుధదశ తరువాత కొంత ఉపశమనం ఉంటుంది మిగిలిన జీవితం సాఫీగా జరుగుతుంది.

ఈ నక్షత్ర జాతకులకు భూ సంబంధిత వృత్తులు, వ్యాపారాలు, ఉద్యోగాలు వీరికి అనుకూలిస్తాయి. వీరు మేధావంతులు, ఆవేశపూరితులుగా ఉంటారు. కనుక సైనిక పరమైన వృత్తులు వీరికి అనుకూలిస్తాయి.

చిత్త నక్షత్రము మూడవ పాదము
చిత్త నక్షత్ర మూడవ పాద జాతకులు వీర విద్యలు నేర్చుకోవడంలో ఆసక్తి చూపిస్తారు. అంతేకాదు కళా రంగంలో ప్రవేశించే అవకాశం ఉంది. వీరు విద్యా శిక్షకులుగా రాణించగల అవకాశం ఉంది. వీరికి పట్టుదల అధికం.

ధైర్య సాహసాలతో కూడిన ఉద్యోగాలు వీరికి అనుకూలిస్తాయి. 3 సంవత్సరాలకు రాహు దశ వస్తుంది. కనుక 18 సంవత్సరాల రాహుదశ కాలంలో విద్యలో ఆటంకాలు ఎదురవుతాయి. ప్రయత్న పూర్వకంగా విద్యలో విజయం సాధించాలి.

వీరికి కూడా రాహుదశలో సొంత ఊరికి దూరంగా విద్యాభ్యాసం చేసే అవకాశాలున్నాయి. 21 సంవత్సరాలకు గురు దశ వస్తుంది. కనుక జీవితంలో త్వరగా స్థిరపడతారు. సకాలంలో వివాహం అవుతుంది. సంపాదించినది దాచుకోవాల్సిన అవసరం ఎంతో ఉంది.

37 సంవత్సరాలకు వచ్చే శనిదశలో ఖర్చులు అధికమవుతాయి. ఈ కారణాల వల్ల ఇబ్బందులకు లోనయ్యే అవకాశం ఉంది. 56 సంవత్సరాలకు వచ్చే 17 సంవత్సరాల బుధ దశ తరువాత కొంత ఉపశమనం ఉంటుంది మిగిలిన జీవితం సాఫీగా సాగుతుంది.

చిత్త నక్షత్రము నాలుగవ పాదము
చిత్త నక్షత్ర నాలుగవ పాద జాతకులు ఆవేశాన్ని అదుపులో పెట్టుకోవలసిన అవసరం ఎంతైనా ఉంది. వీరు సైనిక పరమైన ఉద్యోగాలలో బాగా రాణించగల అవకాశం బాగా ఉంది. భూ సంబంధిత వృత్తులు, వ్యాపారాలు, ఉద్యోగాలు వీరికి అత్యధికంగా అనుకూలిస్తాయి.

ధైర్య సాహసాలు వీరికి అధికమే. మొదటి ఏడాది తరువాత రాహుదశ వస్తుంది కనుక 18 సంవత్సరాల రాహుదశ కాలంలో విద్యలో ఆటంకాలు ఎదురవుతాయి. ప్రయత్న పూర్వకంగా విద్యలో విజయం సాధించాలి.

19 సంవత్సరాలకు గురుదశ వస్తుంది కనుక జీవితంలో త్వరగా స్థిరపడతారు. సకాలంలో వివాహం జరుగుతుంది. సంపాదించినది జాగ్రత్తగా దాచుకోవాల్సిన పరిస్థితి.

36 సంవత్సరాలకు వచ్చే శని దశలో ఖర్చులు అధికమవుతాయి కనుక ఇబ్బందులకు లోనయ్యే అవకాశం ఉంది. 55 సంవత్సరాలకు వచ్చే 17 సంవత్సరాల బుధ దశ తరువాత కొంత ఉపశమనం ఉంటుంది. మిగిలిన జీవితం సాఫీగా సాగిపోతుంది.

చిత్తా నక్షత్ర జాతకులు పెంచవల్సిన వృక్షము :
చిత్త నక్షత్రం వారు మారేడు చెట్టును పెంచడం, పూజించడం మంచిది. కుజ దోష నివారణకై సుబ్రహ్మణ్య ఆరాధన చాలా అవసరం. కుజుడు అతి తీవ్ర మరియు అగ్ని కారకుడు కావున ఈయన అధిపతియైన సుబ్రహ్మణ్య ఆరాధన చాలా గొప్ప నివారణ కలిగించును.

చిత్తా నక్షత్ర జాతకుల తారా ఫలాలు
తార నామం - తారలు - ఫలం

జన్మ తార - మృగశిర, చిత్త, ధనిష్ట - శరీరశ్రమ

సంపత్తార - ఆర్ద్ర, స్వాతి, శతభిష - ధన లాభం

విపత్తార - పునర్వసు, విశాఖ, పూర్వాభాద్ర - కార్యహాని

సంపత్తార - పుష్యమి, అనూరాధ, ఉత్తరాభాద్ర - క్షేమం

ప్రత్యక్ తార - ఆశ్లేష, జ్యేష్ట, రేవతి - ప్రయత్న భంగం

సాధన తార - అశ్విని, మఖ, మూల - కార్య సిద్ధి, శుభం

నైత్య తార - భరణి, పూర్వ ఫల్గుణి, పూర్వాషాఢ - బంధనం

మిత్ర తార - కృత్తిక, ఉత్తర ఫల్గుణి, ఉత్తరాషాఢ - సుఖం

అతిమిత్ర తార - రోహిణి, హస్త, శ్రవణం - సుఖం, లాభం

నక్షత్ర శాంతి: 

చిత్త నక్షత్రములో 1వ పాదము తండ్రికి, 2వ పాదము తల్లికి 3వ పాదము తోడ పుట్టిన వారికి దోషము కలిగిస్తుంది. నాల్గవ పాదములో జన్మించిన వారికి సామాన్య దోషము కలుగును.

యాలుకలు, కస్తూరి, లవంగాలు, పునుగు, జవ్వాది ఇవన్ని ఎర్ర వస్త్రంలో కట్టి దానం ఇవ్వాలి.

నక్షత్ర మంత్రం:

।। ఓం ।।
త్వష్టా నక్షత్రమభ్యే'తి చిత్రామ్ ।
సుభగమ్ స'సంయువతిగమ్ రాచ'మానామ్।
నివేశయ'న్నమృతాన్మర్త్యాగ్'శ్చ ।
రూపాణి' పిగ్ంశన్ భువ'నానివిశ్వా" ।
తన్నస్త్వష్టా తదు' చిత్రా విచ’ష్టామ్ ।
తన్నక్షత్రం భూరిదా అ'స్తు మహ్యమ్” ।
తన్నః' ప్రజాం వీరవ'తీగమ్ సనోతు ।
గోభి'ర్నోఅశ్వైస్సమ'నక్తు యజ్ఞమ్ ॥

జ్యోతిషశాస్త్రము

నిత్య స్తోత్రావళి

నిత్య పారాయణ శ్లోకాలు

స్తోత్రాలు

పంచాంగం