గణేశగ్రహనక్షత్రయోగినీరాశిరూపిణీమ్‌ ।
దేవీం మన్త్రమయీం నౌమి మాతృకాపీఠరూపిణీమ్‌ ॥ 01 ॥
ప్రణమామి మహాదేవీం మాతృకాం పరమేశ్వరీమ్‌ ।
కాలహృల్లోహలోల్లోహకలానాశనకారిణీమ్‌ ॥ 02 ॥
యదక్షరైకమాత్రేఽపి సంసిద్ధే స్పర్ధతే నరః ।
రవితాక్ష్యేన్దుకన్దర్పైః శ్కరానలవిష్ణుభిః ॥ 03 ॥
యదక్షరశశిజ్యోత్స్నామణ్డితం భువనత్రయమ్‌ ।
వన్దే సర్వేశ్వరీం దేవీం మహాశ్రీసిద్ధమాతృకామ్‌ ॥ 04 ॥
యదక్షరమహాసూత్రప్రోతమేతజ్జగత్త్రయమ్‌ ।
బ్రహ్మాణ్డాదికటాహాన్తం తాం వన్దే సిద్ధమాతృకామ్‌ ॥ 05 ॥
యదేకాదశమాధారం బీజం కోణత్రయోద్భవమ్‌ ।
బ్రహ్మాణ్డాదికటాహాన్తం జగదద్యాపి దృశ్యతే ॥ 06 ॥
అకచాదిటతోన్నద్ధపయశాక్షరవర్గిణీమ్‌ ।
జ్యేష్టాఙ్గబాహుహృత్కణ్ఠకటిపాదనివాసినీమ్‌ ॥ 07 ॥
నౌమీకారాక్షరోద్ధారాం సారాత్సారాం పరాత్పరామ్‌ ।
ప్రణమామి మహాదేవీం పరమానన్దరూపిణీమ్‌ ॥ 08 ॥
అథాపి యస్యా జానన్తి న మనాగపి దేవతాః ।
కేయం కస్మాత్క్వ కేనేతి సరూపారూపభావనామ్‌ ॥ 09 ॥
వన్దే తామహమక్షయ్యాం క్షకారాక్షరరూపిణీమ్‌ ।
దేవీం కులకలోల్లోలప్రోల్లసన్తీం శివాం పరామ్‌ ॥ 10 ॥
వర్గానుక్రమయోగేన యస్యాభ్యోమాష్టకం స్థితమ్‌ |
వన్దే తామష్టవర్గోత్థమహాసిద్ధ్యాదికేశ్వరీమ్‌ ॥ 11 ॥
కామపూర్ణజకారాఖ్యసుపీఠాన్తర్నివాసినీమ్‌ ।
చతురాజ్ఞాకోశభూతాం నౌమి శ్రీత్రిపురామహమ్‌ ॥ 12 ॥
ఇతి ద్వాదశభీ శ్లోకైః స్తవనం సర్వసిద్ధికృత్‌ |
దేవ్యాస్త్వఖణ్డరూపాయాః స్తవనం తవ తద్యతః
॥ ఇతి త్రిపురసున్దర్యా ద్వాదశశ్లోకీస్తుతిః సమాప్తం ॥
No comments:
Post a Comment