బుధ గ్రహం (బుధుడు) జన్మ వృత్తాంతం
పురాణ కథనం ప్రకారం బుధుడు చంద్రుడి కుమారుడు. అయితే ఆయన జన్మ వెనుక ఒక ఆసక్తికరమైన సంఘటన ఉంది. నవగ్రహాల్లో ఒకరైన చంద్రుడు, దేవగురువైన బృహస్పతి (గురుడు) భార్య అయిన తార అందానికి ఆకర్షితుడయ్యాడు.
గురువు పట్ల గౌరవం వీడి చంద్రుడు తారను తీసుకెళ్లడంతో వారిద్దరి అనుబంధం ద్వారా తార గర్భవతి అయింది. బ్రహ్మదేవుడు జోక్యం చేసుకుని వివాదాన్ని ఆపి తారను బృహస్పతికి తిరిగి అప్పగించాడు.
అప్పటికే తార గర్భవతిగా ఉండగా, ఒక అద్భుతమైన తేజస్సుతో కూడిన కుమారుడు జన్మించాడు. ఆ బిడ్డ ఎవరి కుమారుడనే విషయంలో చంద్రుడు, బృహస్పతి ఇద్దరు మేమే ఆ బిడ్డకు తండ్రిని అని వాదించారు. చివరకు బ్రహ్మదేవుడు తారను నిజం చెప్పమని అడగగా… “ఈ బిడ్డ చంద్రుడి కుమారుడు” అని తార వెల్లడించింది.
ఆ బిడ్డను చూసిన చంద్రుడు ఎంతో ఆనందించి, అతని తెలివితేటలను సూచించేలా “బుధుడు” అని పేరు పెట్టాడని పురాణ కథనం. అలా చంద్రుడికి, తారకు జన్మించిన దివ్యమైన, అత్యంత తెలివైన బాలుడే మన బుధ గ్రహం (బుధుడు).
బుధుడు అంటే “తెలిసినవాడు / జ్ఞానం కలవాడు” అనే అర్థంతో కూడా వివరించబడతాడు. అందుకే జ్యోతిష్య సంప్రదాయంలో బుధుడు బుద్ధి, వివేకం, మాట, విద్య, గణితం, వ్యాపారం వంటి విషయాలతో అనుసంధానించబడతాడు.
అసాధారణమైన మేధస్సు, వాక్చాతుర్యం, వ్యాపార నైపుణ్యానికి అధిపతిగా మారిన బుధుడు... జ్యోతిష్యశాస్త్రంలో బుద్ధికారకుడిగా, విద్యార్ధులకు జ్ఞానాన్ని ప్రసాదించే దివ్య గ్రహంగా పూజలందుకుంటున్నాడు.
No comments:
Post a Comment