పంచమ భావము నందున్న గ్రహ ఫలితాలు

పంచమ భావము నందున్న గ్రహ ఫలితాలు

01. జన్మ లగ్నము నుండి 5వ రాశి పంచమ భావము.  దీనిని పుత్ర భావము, మంత్రస్థానం, లక్ష్మీస్థానము, మనస్తానమనియు అందురు.

02. పంచమ భావము ద్వారా జాతకుని యొక్క బుద్ధి, వివేకము, పుత్ర సంతతి, జ్ఞాపకశక్తి, సంతోషము, మాట నేర్పు, కళాభినివేశము, లలిత కళలు, గ్రంథ రచనాశక్తి, వ్యూహ నిర్మాణము, మంత్రి పదవి, మంత్రోపాసన, దేవతా ప్రసన్నము, ఆటలు, వ్యాపారము, వ్రాతయందు నేర్పు, భవిష్యత్ జన్మకు సంబంధించిన విషయములు, మెదడు, పొట్ట, గర్భస్రావము, దత్త విషయములు, పితృభాగ్యము అను విషయములను గురించి తెలుసుకోనవలెను.

03. పంచమ భావమునకు గురువు కారక గ్రహము. ఇందు బుద్ధికి సంబంధించిన విషయములకు చంద్రుని; సంతాష, అధికారాది విషయములకు శుక్రుని కారక గ్రహముగా గ్రహించవలెను.

04. పంచవ భావము నందు శుభగ్రహములుండి, గురుదృష్టి కలిగి పంచమాధిపతి శుభస్థానములందు శుభ సంబంధాదికుడై ఉండుట వల్ల -భావ ఫలితములు వృద్ధికరముగా ఉండగలవు.

05. భావాధిపతికి పాప సంబంధము, పాపస్థితి భావమున పాప గ్రహములుండుట, గురుడు పాప సంబంధాధికృత నందుట వలన -బావ ఫలితములు అనయు చెడిపోగలవు.

06. పంచమ భావము నందు రవియున్న -కుశాగ్ర బుద్ధి, మంత్రి, విద్యా పరిజ్ఞానము, మోసము, అధిక కోపము, స్వల్ప భోగము, ఏకపుత్ర సంతానము, అట్టి సంతానము వలన బాధలు, బాల్య దశయందు దుఃఖము, యవ్వన దశయందు కష్టములు, భుజరోగములచే మృత్యవు కలుగును.

07. చంద్రుడు పూర్ణ కళలు కలిగి, పంచముమందున్న -విశేషధన- సుఖ -, స్త్రీ సంతానాదిక్యత, పుత్ర ప్రాప్తి, మాతృ నష్టము కలుగ గలవు. క్షీణ చంద్రడున్న -కుటుంబ సౌఖ్యము, స్వల్ప భోగము, స్త్రీ సంతతి, చంచల. స్వభావములు కలుగును.

08. పంచమ భావము నందు కుజుడున్న -పుత్ర హీనత, ధనలోపము, దుఃఖము, కఠిన హృదయము, నేర్పు గలిగిన వ్యాపారము కలుగును.

09. కుజుడు పంచమ భావం లోనుండిన- తీవ్రమైన వాంఛ అధికము, నిదానముండదు. దుస్సాహస ఉండగలదు. ప్రేమ- ద్వేషము కూడా అధికముగా ఉంటది. ప్రతీకార వాంఛ, పగ, ద్వే, దీర్ఘ కోపము, చొరవ, సాహసము అహింస భావము, కఠినవర్తిన గాడమగు వస్తువులు, తమోగుణ ప్రధానమగు ఫలితము ఉండగలవు.

10. పంచమంలో కుజునతో ఏ గ్రహము గలసిన -ఆ గ్రహకారక ఫలితములు తీవ్రతరము కలిగి యుంటవి.

11. పంచమ భావములో బుధుడున్న- సంతాన సుఖము, పుత్ర భాగ్యము, చక్కని ముఖము, స్త్రీ సంతానాదిక్యత, భోగము, ఐహిక వాంఛలు, లోతైన హృదయము, అన్ని విషయములందు మంచి చెడ్డలు గ్రహింపగల శక్తి, వ్యవహార జ్ఞానము, ఉపాయము, యుక్తి, విజ్ఞానము, విమర్శనాశక్తి, క్రయ-విక్రయ నైపుణ్యము, పుస్తక ప్రచురణలు కలుగ గలవు.

12. పంచమంలో గల బుదునికి రవి మరియు శుభగ్రహముల కలయిక వల్ల -శుభ ఫలాభివృద్ధి యుండును. శని మొదలగు వ్యతిరేక పాప గ్రహముల కలయిక వల్ల -అశుభ ఫలితములు అధికముగా ఉండగలవు. 

13. గురుడు పంచమ భావం లో నుండుట వల్ల -శరీర కాంతి, ఆరోగ్యము, పుత్ర సంతానాధిక్యత, సత్కళత్రము, మంచి స్నేహితులు, కీర్తి, ఆనందము, నిర్మల హృదయము, దైవభక్తి,  ఆధ్యాత్మిక- జ్ఞాన విషయాను, భక్తి, ధర్మవృద్ది, మంత్ర శాస్త్ర ప్రావీణ్యము, ధన-వాహన-సుఖములు ప్రార్థించగలవు. 

14. శుక్రుడు పంచమ మందున్న శాంతము, సద్గుణము, స్వల్పపుత్ర సంతానము, స్త్రీ  సంతానాదిక్యత, ఐహిక సుఖ-భోగములు, దాతృత్వము, బందు-మిత్ర పుణ్యత, ధన సమృద్ధి, అధికారము, స్త్రీ లోలత, భోగము, భాగ్య వర్ధనము ఉండగలవు. 

15. పంచమంలో శనియున్న-నిధానము, ప్రేమ వ్యవహారములందు విఫలము, మానసిక బాధలు, నిరాశ, విరక్తి, కార్యాటంకములు, నిరాడంబరత, ఐహిక సుఖహీనత, బాల్యంలో బంధు నష్టము, అనారోగ్యము, కళత్రము, సంతానహీనత లేక సంతాన నష్టముల ద్వారా విచారము (రోగగ్రస్త సంతాన ప్రాప్తి) సామాన్య జీవితము కలుగును. 

16. పంచమ భావం శనికి నీచ స్థానమైనను, శత్రు స్థానమైనను సంతతిని నశింపజేయును. ఉచ్చ, మిత్ర స్థాన, ఉచ్చాOశలైనా-స్వల్పసంతతి కలుగును. 

17. రాహువు పంచమంలో నుండిన-మలిన సంతానము, దీనత్వము, అవ్యక్త మనోవేదన, అస్థిర బుద్ధి కలుగును. ఈ రాహువునకు పంచమంలో పాప గ్రహ సంబంధములు కలిగిన వయసు పైబడిన కొలది మానసిక బాధలు, అశాంతి, దేహ జాడ్జ్యాములు,  ఆశాభంగము, మనోచాంచల్యము, ఆటంకములు, కష్ట-నష్టములు కలువ గలవు.

18. పంచమంలో కేతువున్న-పుత్రవిచారము, మంత్ర శాస్త్ర-రసవాద విద్యా ప్రవేశము, గణిత శాస్త్ర పరిజ్ఞానము, వ్రాతయందు నేర్పు, జన కలహము, పితృద్వేషము, తత్వ విచారము, ఐహికామూష్మిక సుఖములు కలుగును. 

19. పంచమ భావంలో గురు-శుక్రులు కలిసి ఉన్న- అధిక పురుష సంతానము, శని-శుక్రులు కలిసి ఉన్న అధిక స్త్రీ సంతానము ఉండగలదు. 

సంతాన యోగములు 

01. పంచమాధిపతి 9 స్థానమందు, నవమాధిపతి పంచమ స్థానమందు ఉన్నను లేక పంచమ-నవమాధిపతులకు పరస్పర దృగ్యోగాది సంబంధములున్నను ముగ్గురు పుత్రులు కలుగు గలరు. 

02. భాగ్యాధిపతి లేక పంచమాధిపతి ఏకాదశ స్థానంలో బలయుక్తులై ఉన్న- నలుగురు పుత్రులు కల్గెదరు. 

03. కుటుంబ (2 స్థానము) లగ్నాధిపతులు పరస్పర దృగ్యోగాది సంబంధములు కలిగి యుండి, పంచమంలో శుక్రుడు ఉన్న- ప్రధమమున పుత్ర సంతానము కలుగును. 

04. పంచమంలో గల కేతువునకు గురు-శుక్ర సంబంధము కలిగిన- స్త్రీ పురుష సంతానము సమముగా నుండును. 

05. పంచమాధిపతి ఉచ్చయందుండి, లగ్నాధిపతితో గలసిన- ఒక పుత్రుడు, ఒక పుత్రిక కలుగ గలరు. 

06. పంచమంలో గురువు, 9 స్థానంలో రవి యుండి; శనికి అయిదవ రాశిలో రాహువు ఉన్న- ఏకపుత్ర సంతానము కలుగును. 

07. పంచము శుభగ్రహ సంబంధము కలిగి, 9 స్థానంలో శుక్రుడు, తృతీయంలో రవియున్న యెడల- వివాహమైన వెంటనే (అతి తక్కువ కాలంలో) పుత్రుడు జన్మించగలడు.

08. జన్మ లగ్నాధిపతి బలము కలిగియుండి, 9వ స్థానంలో గురువు, పంచమ స్థానంలో శుక్రుడు ఉన్న యెడల- 24వ సంవత్సరమందు పుత్ర సంతతి కలుగును. 

09. పంచమ స్థానములో పాపగ్రహములుండి, గురువుకు పంచమంలో శనియున్న యెడల- మూడవ భార్య ద్వారా సంతతి కలుగును. 

10. పంచమాధిపతిగానీ, లగ్నాధిపతిగానీ 2-3 స్థానములందున్న- మొదట పురుష సంతతి కలుగును. 

11. పంచమాధిపతి యున్న రాశికి 5-7-11 రాశులలో లగ్నాధిపతి యున్నను- మొదట పురుష సంతతి ప్రాప్తించును.

12. పంచమ, సప్తమ స్థానములందు బలముగల రవి-శనితో గలసియున్న- మొదట పుత్రుడు, తర్వాత పుత్రిక కలుగగలరు. 

13. తృతీయంలో పురుష గ్రహముండి, పూర్ణచంద్ర దృష్టి నందిన- ప్రధమంగా స్త్రీ సంతతి ప్రార్థించగలదు. 

14. పంచమాధిపతి 4 వ స్థానమందున్న- మొదట పుత్రిక, తదుపరి పుత్రుడు జన్మించగలరు. 

15. గురువు కర్కాటక రాశి యందున్న- ఒకే ఒక స్త్రీ సంతానముండును. అట్లే ధనస్సునందున్న- పాపసంతతి, మీనమందున్న- స్వల్పసంతతి కలుగును. 

16. జన్మ లగ్నము ధనస్సు, మీనములుగా నుండి; గురువు కర్కాటకమునందున్న- పుత్ర సంతతి యుండును.  అయినను ఆశ్లేష 2 పాదము నందు గురుసంచారమున్న- ఏక పుత్రుడు కలుగును. 

17. చంద్రుడు పంచమంలోగానీ, కర్కాటకంలోగానీ యుండిన- స్వల్ప స్త్రీ సంతతి మాత్రమే యుండును. 

18. ధనస్సు, మకర, మీనా లగ్నములుగల వారికి పంచమంలో రాహువుగానీ, కేతువుగానీ యుండిన- త్వరగా సంతతి కలుగును. 

19. పంచమంలో పాప గ్రహములు, దశమంలో శుభగ్రహములు ఉండి; లగ్న, పంచమ, నవమాధిపతులు శుభగ్రహముల సంబంధికులై 6-8-12 స్థానములందున్న- ఆలస్యముగా సంతానము కలుగును. 

20. పంచమంలో చంద్ర-శుక్రులు ఉండి, 11వ స్థానంలో పాప గ్రహములు ఉన్న- మొదట స్త్రీ సంతానం కలుగును. 

21. పంచమ స్థానం బలహీనమైయుండి, 11వ స్థానంలో రాహువున్న- వార్ధక్యంలో సంతాన ప్రాప్తి కలుగును. 

22. జాతకము నందు సంతానయోగము లుండి, పంచమంలో శని మాత్రమే ఉన్న- బహుకాలమునకు సంతానము కలుగును. 

సంతాన నష్ట యోగములు 

01. పంచమంలోనున్న రవికి పాప గ్రహ దృష్టి కలిగిన- గర్భస్రావము. 

02. పంచమంలో గల కుజునికి పాపగ్రహ దృష్టియున్న- గర్భస్రావము కలుగును. 

03. ద్వితీయాధిపతికి పంచమంలోనూ, పంచమాధిపతి ద్వితీయంలో నుండిన- కలిగిన సంతానంలో స్త్రీ సంతతి నశించగలదు. 

04. పంచమాధిపతి పాపగ్రహ దృష్టి కలిగి 6-8-12 స్థానములందున్న- పుత్ర నష్టము కలుగును. 

05. కన్యా లగ్నమై, అందు రవి ఉండి, పంచమంలో కుజుడున్న- పుత్ర నష్టము కలుగును. 

06. వ్యయస్తానమున శుభులు-పాపులు నగు గ్రహములున్ననూ లేక గురువుకు రాహు సంబంధం కలిగిననూ - పుత్ర సంతాన నష్టం ఉండును. 

07. పంచమాధిపతి నీచ, అస్తంగత, పాప స్థానస్థితి, పాపాంశస్థితి  కలిగి యున్న- సంతాన నష్టము కలుగును. 

08. పంచమంలో సప్తమాధిపతి, సప్తమంలో పంచమాధిపతి ఉండి; శుభగ్రహ సంబంధము లేకయున్న- అధిక సంతాన నష్టములు ఉండగలవు. 

09. బుధుడు లగ్నాధిపతితో గలసి, 4-7-10 స్థానములందుండిన- వంశాంకురముండదు. 

10. లగ్నమందు చంద్ర-గురువులు, సప్తమముందు శని లేక కుజుడున్న- వంశము నిలువదు. 

11. పంచమాధిపతి పాప గ్రహములతో గలసియున్న- మొదట కలిగిన సంతానము నశించి తరువాత సంతానము జీవింప గలదు. 

12. పంచమాధిపతి 12వ స్థానంలో శుభ బలాదికుడైయున్న- జన్మించిన పుత్రుడు కొంతకాలము పెరిగి, తర్వాత నశించగలడు. 

13. కుజుడు, శనులు నీచస్థితి యందున్న- సంతాన నష్టం ఉండును. 

14. పంచమ-సప్తమాధిపతులు దుష్ట స్థానములలో కలిసియుండి, పాప గ్రహ వీక్షణ నందుతున్న- సంతానముతో కూడా భార్యయు నశించగలదు. 

నిస్సంతానా యోగములు

01. పంచమంలో శని లేక రాహువు ఉండి, పాపగ్రహ దృష్టి నందిన- సంతానము కలుగదు. 

02. దశమాధిపతి వ్యయంలో, వ్యాయాధిపతి దశమంలో ఉన్నప్పుడు గానీ; పంచమ స్థానాధిపతి పాపగ్రహ మధ్యగతుడై, శుభగ్రహ సంబంధములు లేనప్పుడుగాని- సంతానము ప్రార్థించదు. 

03. ద్వితీయ-పంచమాధిపతులు పాపగ్రహ దృష్టి కలిగి, పంచమంలోనున్ననూ లేక సప్తమ భావమునకు కుజ-శుక్రులు దృష్టి కలయిక వంటి సంబంధములు కలుగకున్ననూ సంతానయోగం ఉండదు. 

04. పంచమంలో చంద్ర దృష్టి కలిగిన శనియుండి; పంచమాధిపతి రాహువు కలిసియున్న- సర్పశాప దోషము కలిగి సంతతి కలుగదు. 

05. పుత్రకారక గ్రహము, రాహువు కలసిఉండి; పంచమాధిపతి కుజుడున్న అంశాధిపతితో గలసిన- నాగదోషము చే సంతతి కలుగదు. 

06. పంచమాధిపతి గురువు-కుజులతో గలసియుండి; లగ్నాధిపతి, రాహువులు 6-8-12 స్థానములందున్న సంతాన ప్రాప్తి ఉండదు. 

07. పంచమంలో గురువు ఉండి, 9 స్థానంలో పాప గ్రహములు ఉన్న- సంతతి ఉండదు. 

08. లగ్నంలో రవి, సప్తమంలో శనియున్న- సంతాన ప్రాప్తి కాటంకములు కలుగును. 

09. సప్తమంలో రవి-శనులుండ, దశమ భావమునకు గురు దృష్టియున్న సంతానము కలుగదు. 

10. శని 10, కుజుడు 9 స్థానములందున్నను; 11వ స్థానంలో శని, చంద్రులున్నను; 7వ స్థానంలో శని, శుక్రులున్ననూ- సంతానం ఉండదు. 

11. 5-9 స్థానములలో పాప గ్రహములతో గలసి గురువున్న-సంతానము కలుగదు. 

12. వ్యాయాధిపతి లగ్న దశమ స్థానములందున్న- నిస్సంతానము. 

13. 8వ స్థానంలో చంద్రుడు ఉండి, పంచమ-భాగ్యాధిపతులు 6-8-12 స్థానములందున్న సంతానహీనత ఉండును. 

14. సింహ-మకర-కుంభములు అష్టమ స్థానముగానుండి; అందు రవిగాని, శని గాని యుండిన- భార్య గర్భము ధరించదు. 

15. జన్మ లగ్నమందు శనియూ, సప్తమంలో-పాప గ్రహములతో గలసి శుక్రుడు ఉండి; దశమంలో గురువుండుట లేక చూచుట కలిగిన -భార్య గర్భము ధరించదు. 

16. పంచమంలో మూడు పాప గ్రహములు ఉన్నను, లేక పంచమ భావానికి మూడు పాప గ్రహ వీక్షణలు కలిగినను, లేక పంచమాధిపతి యొక్క శత్రు గ్రహములచే పంచమం చూపబడుచున్ననూ- నిసందేహముగా సంతానం ఉండదు. 

అన్య సంతాన యోగములు 

01. పంచమంలో గల రాహువు బలహీనుడైయున్న- అన్యపురుషుని వలన సంతానము కలుగును. 

02. లగ్నాధిపతి చతుర్ధమందు, చతుర్ధాధిపతి లగ్నము నందు ఉండి; వారిలో ఒకరికైనను రాహు కేతు సంబంధం కలిగిన జారసంతానము కలుగును. 

03. స్వాతి నక్షత్ర యుక్త, విదియ, ఆదివారము నందు గాని, రేవతి నక్షత్ర యుక్త, సప్తమి, సోమవారము నందు గాని, ధనిష్టా నక్షత్రము గల ద్వాదశీ ఆదివారమునందు గాని పుట్టిన వారు బావసంతానముగా చెప్పనగును. 

04. విధియా, సప్తమ, ద్వాదశీ తిధులయందు; పునర్వసు, విశాఖ, పూర్వాభాద్ర నక్షత్ర జాతకుల జననము- అన్యపురుష సంపర్కమువల్ల కలుగును. 

05. పాపగ్రహ సంబంధాధీకులై, రవి-చంద్రులు కలిసి ఉన్న- బావసంతతి అనవచ్చును. 

06. అంశచక్రంలో- కేతువునకు బుధ-శుక్రులు దృష్టి కలిగియున్నను; శుక్రునికి పాపగ్రహ దృగ్యోగాది సంబంధములుండి, వ్యయంమందున్నను దాసీపుత్రులు కాగలరు.

దత్తపుత్ర యోగములు 

01. రాజ్య భావమూ, అందలి గ్రహస్థితి, రాజ్యాధిపతి అనునవి దత్తపుత్ర విషయంలో ప్రాధాన్యత నంది యుండును. 

02. 6-8-12 స్థానాల్లో రవి నీచ-శత్రు క్షేత్ర స్థితి కలిగి యున్న దత్తపుత్ర ప్రాప్తి. 

03. మకర-కుంభములు, మిధున-కన్యలు పంచమ స్థానముగానుండి అందు శని గుళికులను దత్తపుత్ర యోగము కలుగును. 

04. పంచమంలో శని-కుజులు ఉండి, మకరంలో బుదుడుండిన దత్తపుత్ర యోగము. 

05. లగ్నమున శని 4వ స్థానంలో రాహువుయుండుట; పంచమంలో శని బుధులిద్దరూ నుండుట లేక చూచుట; దశమంలో శనియుండుట, చూచుట లేక దశమాధిపతిని శని చూచుట, కలయుట కలిగియున్న- దత్తతకు వెళ్ళుటగాని లేక తాను మరొకరిని దత్తపుత్రునిగా స్వీకరించుట గాని కలుగును. 

06. పంచమంలో చంద్రుడు పాపగ్రహములతో గలసియుండి, చతుర్ధంలో శని-కుజులున్న యెడల దత్తతకు వెళ్ళును. 

07. పంచమంలో శని-చంద్ర-బుధులున్న ధనము చే కొనబడినవాడు పుత్రుడగును. 

08. పంచమము చరరాశియై, పంచమాధిపతి చరరాశి యందుండగా- పంచమ, పంచమాధిపతులకు శని దృష్టి కలిగిన దత్తపుత్రుడు కాగలడు. 

09. లగ్నమునకు 5-9 స్థానములందు శని-శుక్ర-బుధ-కుజులు గలసియుండి, చంద్ర-రాహువు సంబంధము లేకుండిన దత్తపుత్ర యోగము ప్రాప్తించగలదు. 

కవలల యోగము 

01. పంచమాధిపతి పురుష గ్రహమై బుద్ధునితో గలసియున్న మూడవ కాన్పు, లేక ఆపై కాన్పుల యందు కవల పిల్లలు జన్మించగలరు. 

02. లగ్నము, చంద్ర లగ్నము, మేషాదిగా సమసంఖ్య గల రాశులుగానుండి, బలముగల గ్రహము చే చూపబడుచున్న కవలలు జన్మించాదరు. 

03. లగ్నాధిపతి, తృతీయాధిపతి, రాహువు కలిసి ఉన్న యెడల కవలలు బుట్టెదరు. 

04. లగ్నమందు తృతీయాధిపతి, తృతీయమందు లగ్నాధిపతి యున్న ఎడల కవల పిల్లలు జన్మించగలరు. 

05. లగ్నాధిపతి పాపగ్రహములతో గలసి దశమ భావమందుండి, లగ్నమందు రాహువుండి, ఇతర స్థానములలో ఎక్కడైనను నాలుగు గ్రహములు కలిసియున్న యెడల; ఇద్దరూ లేక అంతకు మించిన శిశువులు జన్మించగలరు. 

06. 9వ స్థానాధిపతి- రవి కలసి పంచమ-నవమ స్థానములందుండి, 6-8-12 స్థానాధిపతుల సంబంధం కలిగియున్నను, లేక శత్రు గ్రహ సంబంధం కలిగియున్నను, జాతకుడు గర్భమునందుండగానే తండ్రి మరణించగలరు. 

07. గురువు పంచమాధిపతి వచ్చునందియు,న్న జాతకుని సంతానము భాగ్యవంతులు కాగలరు. 

08. లగ్న రాజ్యాధిపతులు గలసి 5వ స్థానమందున్నను- గురువునకు 5వ స్థానంలో పాప గ్రహమునున్నను తను గన్న సంతానము వలన సుఖము కలుగదు. 

09. లగ్న-పంచమాధిపతులు పరస్పర స్థానములందు పరివర్తనులై యున్న, జాతకుడు పుత్రునికి వశపడి ఉండగలడు. 

10. పంచమాధిపతి బలహీనుడై-లగ్నాధిపతి చూడబడుచున్నాను, లేక కుజ రాహువుల విక్షణ కలిగియున్నను, సంతానము చే నిందింపబడగలరు. 

11. లగ్న-చతుర్ధ-పంచమములందు పాప గ్రహములతో గలసి బుధుడున్న, పుత్ర సుఖం ఉండదు. 

12. పంచమాధిపతి 4-7-10 స్థానములందు పాపులతో కలిసియున్న దైవసేవచే సంతాన ప్రాప్తి. 

13. లగ్న-పంచమాధిపతులకుగాని- లగ్న, భాగ్యాధిపతులకుగాని పరివర్తన కలిగిన; జాతకుడుగానీ, అతడి పుత్రుడుగాని, ఒకరే జీవించి ఉండగలరు. 

14. లగ్న, తృతీయాధిపతులు బలవంతులై పాపగ్రహములతో జేరియున్న, సవతి సోదరులుండగలరు. 

15. చంద్ర-కుజులు ఏకరాశి యందుండి, తృతీయాధిపతి పాపగ్రహములతో కలిసి ఉన్న, సవతి తల్లికి సంతాన ప్రాప్తియుండును. 

16. తృతీయాధిపతికి లాభ స్థానంలో 11వ స్థానాధిపతి యుండిన సవతి తల్లికి సంతతి కలుగును. 

మంత్ర - దేవత - ఉపాసన యోగములు

01. పంచమ భావమునకు బలయుక్తమకు పురుష గ్రహ సంబంధము వలన పురుషదేవతో పాసనము, బలముగల స్త్రీ గ్రహ సంబంధము చే స్త్రీ దేవతోపాసనము ప్రార్థించగలవు. 

02. అంశ చక్రము నందు 5-9 స్థానములలో పాప గ్రహములుండి, శుభగ్రహ దృష్టి నందిన ఎడల, తా నుపాసించు దేవత యొక్క అనుగ్రహం నందును. 

03. పంచమ భావము నందు బలయుక్తులైన, ఆయా గ్రహములకు స్థితి కలిగిన, ఈ తెలుపబోవు విధముగా దైవ-మంత్రోపాసనలు ప్రాప్తించగలవు. 

    రవి వలన శివోపాసన, చంద్రుని వలన గౌరీ-పార్వతి, యక్షిణి దేవతలు; కుజుని వలన కుమారస్వామి, వీరభద్రుడు, భైరవుడు; బుధుడున్న సరస్వతి, హయగ్రీవుడు, దక్షిణామూర్తి; గురువున్న విష్ణువు, (విష్ణువు అవతార విశేషములు); శుక్రుడున్న చాముండా, దుర్గా; శనియున్న క్షుద్ర దేవతలు; రాహుకేతువులు ఉన్న పరపీడాకర శక్తులు ఉపాసించగలరు. 

04. ఉగ్రమగు పురుష దేవతోపాసనలు ప్రాప్తించుటకు, రవి కుజ గురుల కలయిక- ఉగ్ర స్త్రీ దేవతోపాసనకు శని, కుజ, శుక్రుల కలయిక పంచమములో కలిగి ఉండాలి. 

05. అంశ లగ్నమై ఉన్న రాశి నుండి రాశి చక్రంలో 5-9 స్థానాలలో రెండు పాప గ్రహములు ఉన్నను, ఆ కోణ  స్థానములను పాప గ్రహవీక్షణలు కలిగినను భూత- పిశాచాది పీడ గ్రహములను వశము గావించుకొను భూత మాంత్రికుడు కాగలడు. 

06. మంత్ర కారకగ్రహము 1-4-5-7-9 10 స్థానము నందు శుభగ్రహ నవాంశల యందుండి, బుధా-శుక్రుల ద్రుగ్యోగాది సంబంధములు కలిగియున్న, తన ఉపాసనాబలము వలన జరగబోవు సమస్త విషయములను తెలుపగల సమర్ధుడు కాగలడు. 

07. కేంద్ర స్థానము లందు చంద్రుడు బలము కలిగి, శుభగ్రహ దృష్టి నంది యుండి, పంచమాధిపతి ఉచ్చ- మిత్ర క్షేత్రములందు శుభసంబంధీకుడైయున్న ఎడల త్రికాల వేత్త కాగలడు. 

08. అంశ చక్రమునందు శుక్ర-కేతువులు ఒకరికొకరు చూచుకొనుచున్న యాజ్ఞీ కత్వము   ప్రాప్తించగలదు. 

09. చంద్రుడు-శని కలసి పంచమ స్థానంలో బలవంతులైయుండిన, గొప్ప మేధావులై -దైవ రహస్యముల నెరుంగు శక్తి గలవారగుదురు. 

10. పంచమాధిపతి నీచ నంది, మంత్రకారక గ్రహము శత్రు క్షేత్రము యందుండి, నవమ స్థానము నందు నైసర్గిక పాపగ్రహములున్న; మంత్ర శక్తిచే పరులను హింసించగలడు. 

11. పంచమ, నవములందు 6-8-12 స్థానాధిపతిలుండి, మంత్ర కారక లగ్నాధిపతులు కలసి 8వ స్థానము నందున్న, పరక్రియ మంత్ర శక్తిచే ప్రాణములు కోల్పోవును. 

పాండిత్య ప్రతిభ యోగములు

01. కేంద్ర కోణ స్థానముల యందున్న, గురువు బుధుని చూచుచున్న- వేదాంత ప్రతిభ యుండగలదు. 

02. బుధుడు-కుజుడు కలసి మకరము లేక కుంభమునందుండి రవిదృష్టినందిన, గొప్ప విద్వాంసులతో వాదించగల విద్యా ప్రతిభ కలుగును. 

03. గురువు బలవంతుడై, రవి-శుక్రుల దృష్టినంది స్వక్షేత్రమందుండిన (అంశ లగ్నమునకు ద్వితీయంలో), వ్యాకరణ శాస్త్ర ప్రతిభ కలుగును. 

04. అంశ చక్రమునందు గురు, బుదు లిరువురు కలసి 2-3-5 స్థానములందున్న, మీమాంస శాస్త్రాచార్యత్వము కలుగును. 

05. అంశ చక్రంలో చంద్రుడు-గురువు కలసి 2-9-5 స్థానముల యందున్న, సాంఖ్య యాగాదులలో ప్రతిభావంతులు కాగలరు. 

06. అంశ చక్రంలో గురుచంద్రులు పాపగ్రహములతో గలసి పంచమరాశి యందున్న గ్రంథములు రచించి ప్రతిభ గాంచును. 

07. అంశ చక్రమునందు గురు-కేతువులు కలసి 2-3-5 స్థానములందున్న గణిత విజయం అందు సమాన ప్రతిభ కలుగును విద్య యందు అసమాన ప్రతిభ కలుగును. 

08. 2-3 రెండు మూడు స్థానములందు బుధ-శుక్రులున్న యెడల జ్యోతిష్య ప్రతిభ కలుగును. 

09. ద్వితీయ రాశి యందు గురుడు ఉచ్చనందియుండి, ద్వితీయాధిపతి బలవంతుడైయున్న జ్యోతిష్య విద్య యందు అసమాన ప్రతిభావంతులు కాగలరు. 

10. చంద్రుడున్న రాశికి 5-9 రాశుల యందు గురువు ఉండి, బుధుడున్న రాశికి 5-9 రాశులలో కుజుడుండిన, సమస్త విద్యాపాండిత్య ప్రకర్ష కలుగును. 

11. గురువునకుగానీ, శుక్రునకుగాని ద్వితీయాధిపత్యంకలిగి రవి, కుజుల యతి వీక్షణాది సంబంధముల నంది యుండిన తార్కికుడై ప్రతిభగాంచగలడు. 

12. గురు-శుక్రలలో నే ఒక్కరైనను 5-9 స్థానములందు ఉచ్చనందియున్న గొప్ప తార్కికూడగును. 

13. గురు శనులు, గురు రాహువులు, గురు కేతువులు కలిసియున్నప్పుడు వారికి శుక్రుని దృష్టి కలిగిన, జాతకుడు గొప్ప విద్యా ప్రతిభా కలవాడగును. 

14. రాశి చక్రమందు శుభలతోడను, అంశ చక్రమునందు పాపుల తోడను కలిసి ఉన్న, రవి రాహువుల వలన విష వైద్య చికిత్స ప్రతిభ కలుగును. 

15. అంశ చక్రము నందు చంద్ర-బుధ-శుక్రులకు పరస్పర దృష్టి కలిగిన వైద్యుడిగా వాసికెక్కును. 

16. సంపూర్ణ బలము కల గురువు ద్వితీయమునందుండి, నవమాధిపతి నవాంశయందున్న వేద పండితుడు కాగలరు. 

17. పంచమాధిపతి 6వ స్థానము నందున్న, విద్యా ప్రతిభ యుండును. 

బుద్ధి స్వభావ యోగములు

01. పంచమాధిపతి ఉచ్చనంది- గురువు కేంద్ర కోణము లందున్నను, పంచమాధిపతి కేంద్ర కోణములందుండి- బుధుడు పంచమమందున్నను జాతకుడు సద్భుద్ది గలవాడగును. 

02. పంచమంలో రవి చంద్రులున్న చంచల బుద్ధి కలుగును. 

03. ద్వితీయమునందు శుభగ్రహములుండి, బలహీనులుగు పాప గ్రహములచే చూడబడుచున్న- చపల చిత్తముండగలదు. 

04. చంద్రుడు జన్మలగ్నమునందుండి, శని-కుజుల దృష్టినందిన- బుద్ధి కుశలత లోపించగలదు. 

05. చంద్రుడే రాశి యందున్నను వానికి రవి-కుజ, శనుల దృష్టి కలిగినను -మూర్ఖత్త అధికము. 

06.శుక్రుని దృష్టి దృష్టి కలిగిన చంద్రుడు 6-8-12 స్థానములందున్న- ఆశ్చర్యకరముగు స్వభావము గలవాడగును. 

07. గురునితో గుడి శని-చంద్రులు 1-4-7-10 స్థానములందున్న, బుద్ధిమాందవ్య ముండగలదు. 

08. పాప గ్రహ సంబంధము గల గురువు పంచమమందున్నను, లేక పాప గ్రహ దృష్టి కలిగి బలహీనుడైయున్నను- తెలివిహీనుడగును. 

09. పంచమాధిపతికి- చంద్రునికి, లేక తృతీయాధిపతికి- చంద్రునికి షష్టాష్టక స్థితి కలిగియున్న, మతిలేక తిరుగుచుండగలడు. 

10. రాశి చక్ర- అంశ చక్రములందు చంద్రుడు నీచ స్థితియందున్నను, రాహు-కేతువులతో కలసి యున్నను, నిరంతర ఆందోళన లుండును. 

11. క్షీణచంద్రునికి కుజుని దృష్టి కలిగిన దుష్ట బుద్ధి, కఠిన స్వభావి కాగలరడు.

12. బుధునికి-గురునికి సమసప్తక స్థితి కలుగుట- లేక శుక్ర దృష్టి గల చంద్రుడు తృతీయము నందుండుట వలన హాస్య స్వభావి కాగలడు. 

13. పంచమంలో కుజుడుండిన అహంకారి కాగలడు. 

ఉన్మాద యోగములు

01. 12వ స్థానంలో రవి-బుధులుండి, పంచమాధిపతి నీచనందిన పిచ్చి కలుగును.

02. లగ్నమందు గురువు-సప్తమమందు కుజుడుండి చంద్రుడు నీచనందిన పిచ్చి కలుగును. 

03. శని-కుజులు కలసి లగ్న-సప్తమ స్థానములందున్న ఉన్మాదచేష్టలుండును. 

04. వ్యయమందు క్షీణ చంద్ర-రాహువులుండి, అష్టమంలో శుభగ్రహములున్న యెడల, జాతకునికి ఉన్మాదం కలుగును. 

05. దశమాధిపతి-శని, కుజుడు కలసి సప్తమమందున్న, తీవ్ర పిచ్చి కలుగును.

06. రాజ్యాధిపతి- కుజుడు సప్తమందుండి శని దృష్టి కలిగిన ఉన్మాదయోగము. 

07. రవి 6-12 స్థానములందుండి, పంచవంలో చంద్ర-కుజులున్న, పిచ్చి వాడగును. 

జ్యోతిషశాస్త్రము