తృతీయ భావ మందున్న గ్రహ ఫలితాలు

తృతీయ భావ మందున్న గ్రహ ఫలితాలు

1. జన్మ లగ్నము నుండి మూడవ రాశియే తృతీయ భావము. దీనినే భాత్రు భావమని కూడా యనెదరు . 

2. తృతీయ భావము ద్వారా - జాతకుని యొక్క కనిష్ట సోదరి - సోదరులు వారియొక్క వృద్ధి - క్షయములు , బంధువులు , మిత్రులు , భార్య , తండ్రి , ఇరుగు పొరుగు పరిస్థితులు, పరాక్రమము, ధైర్య- సాహసములు, శాంతము, శ్రద్ధ, సమర్ధత, ఉపాయము, తీర్ధయాత్రలు, ప్రయాణము, మనశ్చాంచల్యము, గ్రంధ రచనా ప్రచురణలు, ఉత్తర- ప్రత్యుత్తరములు, ధీర పటుత్వము, కంఠస్వరము, భుజములు, అలంకార భూషణములు, పంపకములు, వాహనము, మార్గము, స్వప్నములు, ఎడమ చెవి, చెవులు, పాదములు, రొమ్ములు అనువానికి సంబంధించిన  ఫలితములు, తెలియవలెను. 

3.  రవి గ్రహము తృతీయ భావము నందున్న - ప్రియ వాక్కులు ధన వాహన సువర్ణములు, సేవకులు, బలము ధైర్యము, ఖ్యాతి, దుష్టమైన బుద్ధి స్వల్ప సోదరులు కలుగగలరు. ఇతరులచే పూజింపబడును. 

4. తృతీయమునందు చంద్రుడున్న - హింసా స్వభావము, గర్వము, నేర్పరితనము, అల్పబుద్ది, దయాహీనత, నిర్భయత్వము, పిరికితనము, సోధరివృద్ధి కల్గును. 

5. కుజుడు తృతీయమందున్న - సోదరనష్టము, కృషిచే ధనార్జన, ధన, సుఖ, పరివార రాహిత్యము, క్రిమి కీటక గృహ వాసములు కల్గును. 

6. బుధుడు తృతీయమందున్న- బుద్ధి సూక్ష్మత, నేర్పరితనము, శరీర కుశత్వము, పిరికితనము, కల్మష చిత్తము విశేష ధనము, బాలారిష్టములు కల్గును. 

7. తృతీయ భావమందు గురుడున్న - దుర్మార్గవర్తనము, సౌమ్యత లేకుండుట, ప్రేమరాహిత్యము, అజీర్ణ వ్యాదులు, బలహీనత, అందమైన వ్రాత, ధన సౌక్యము లోపించుట, స్వల్ప సోదరులు, ఆడపిల్లలయందు ప్రేమ లేకుండుట ప్రాప్తించగలవు. 

8. తృతీయమందు శుక్రుడున్న - చిక్కిన దేహము లజ్జత్వము, దుర్మార్గము, మనసాతురత, ఆభరణధారణ, మంచివారికి దూరమగుట, చెడు కార్యాసక్తి కల్గును. 

9. తృతీయమందు శని యున్న - రాజ గౌరవము, వాహన సౌఖ్యము, గ్రామానుకూలత, పరాక్రమము, గ్రామాదిపత్యము కల్గును.

10. తృతీయమందు రాహువు యున్న సోదర నాశనము కల్గును. తృతీయము రాహువుకు ఉచ్చస్థానమైన యెడల పుత్ర, కళత్ర, ధన ధాన్య - సౌక్యములు, వాహనములు, పరివార జనము కల్గును. 

11. కేతువు తృతీయమందున్న- శత్రునాశనము, ధన బోగైశ్వర్యములు, బంధు నాశనము, భాహువులకు పీడ, మనోద్వేగములు కల్గును.

ఇతర భావ విషయములు

1. తృతీయ భావము శుభగ్రహరాశియై అందు శుభ గ్రహ సంబంధము వున్న - సోదర వృద్దియు, పాపగ్రహ రాశియై పాపగ్రహ సంబంధము యున్న - సోదర నాశనము సంభవించును. 

2. తృతీయ భావమునందు గతించిన నవాంశలకు సరియగు సంఖ్య గల సోదరు లుండగలరు.

3. తృతీయాదిపతి 6-8-12 స్థానములందున్నను, తృతీయమునందు రవి, బుధులున్నను - సోదరులుండరు.

4. లగ్న - తృతీయాధిపతులు తృతీయ -లగ్నములందు పరివర్తన పొందిన కవల సోదరులుండగలరు.

5. తృతీయాధిపతి - కుజునితోగని, చంద్రునితోగానీ, కలసియున్న సవతి సోధరులుండగలరు .

6. తృతీయమున శని యున్న - తమ్ములను, కుజుడున్న - అన్నలను నశింపజేయును.

7. 9 వ స్థానమునందు రవి, కుజ, గురులున్న- సోదరులు; చంద్ర, శుక్ర, రహువులున్న - సోదరీలు కలుగగలరు.

8. ద్వితీయమునందు బుధ గురులుండి, కన్యారాశి యందు రాహువున్న - ముగ్గురు సోదరులు కలుగగలరు.

9. తృతీయ భావము, ఆ భావధిపతి కారకుడు శుభగ్రహ సంబంధముల నందిన - చక్కని కంఠస్వరము కలిగి ఇతరులను రంజింపజేయును.

10. తృతీయమున శని - బుధులున్న ధైర్యము లోపించును.

11. తృతీయమున రవి -కుజ-శుక్ర-రాహు-కేతువులున్న-శూరత్వము కల్గును.

12. తృతీయమున చంద్ర-బుధులున్నా - లోభి గుణము పిరికితనము; శని గురువులున్న కీర్తి - ఔదార్యము కల్గును.

13. తృతీయాధిపతి  1-9 స్థానముల యందున్న - విశేష ప్రయాణములు కల్గును.

14. తృతీయాధిపతి  8 వ స్థానమందున్న -ప్రయాణము చేయుచూ మరణించును.

15. తృతీయాధిపతికి నీచ, అస్తంగత, శత్రు క్షేత్ర, పాపగ్రహ ద్రుష్టి అనునవి కల్గిన - విషపధార్ధములచే ప్రమాదములు తటస్థించగలవు.

16. తృతీయాధిపతి గురునితో కలసి, లగ్నమందున్న - జంతుభయము కల్గును .

17. మకర, కుంభ, మీన, కర్కాటకములందు తృతీయాధిపతియన్న యెడల - జల గండము ప్రాప్తించును.

18. జన్మ లగ్నము నందు తృతీయాధిపతి-రాహువు కలసి యున్న - సర్పగండము వుండగలదు.

19. తృతీయాధిపతి - బుధునితో కలసియున్న, లేక తృతీయమందు పాప గ్రహాలున్నను కంఠ రోగములు కల్గును.

20. కుజుడు, తృతీయాధిపతీ కలసి తృతీయ మందున్న - గుదము, మర్మావయవములందు రోగ భాధ లుండగలవు.

21. తృతీయమున కుజుడున్న - చెవి పోటు వ్రణభాధలు కల్గును.

22. తృతీయాధిపతి -రవి, శనులతో గలసి, 6-8-12 స్థానముల యందున్న - నేరారోపణలు జరిగి శిక్షింపబడగలరు.

23. తృతీయ భావమునకు అధిక పాప గ్రహ సంబంధముల వలన - భావ కారకత్వములకు సంబంధించిన ఫలితములు ప్రతికూలముగా నుండగలవు.

24. తృతీయ భావమునకు - భావాధిపతికి సంభవించు అధిక శుభగ్రహ సంబంధముల వలన భావకారకత్వ ఫలితములు వృదినంది అనుకూలించగలవు .

జ్యోతిషశాస్త్రము