శ్రీ వేంకటేశ్వర మంగళాశాసనం
శ్రియః కాంతాయ కళ్యాణ నిధయే నిధయేఽర్థినాం
శ్రీవేంకటనివాసాయ శ్రీనివాసాయ మంగళమ్ || 1 ||
లక్ష్మీ సవిభ్రమాలోక సుభ్రూ విభ్రమచక్షుషే
చక్షుషే సర్వలోకానాం వేంకటేశాయ మంగళమ్ || 2 ||
శ్రీ వేంకటాద్రి శృంగాగ్ర మంగళాభరణాంఘ్రయే
మంగళానాం నివాసాయ శ్రీనివాసాయ మంగళమ్ || ౩ ||
సర్వావయవసౌందర్య సంపదా సర్వచేతసాం
సదా సమ్మోహనాయాస్తు వేంకటేశాయ మంగళమ్ || 4 ||
నిత్యాయ నిరవద్యాయ సత్యానందచిదాత్మనే
సర్వాంతరాత్మనే శ్రీమద్ వేంకటేశాయ మంగళమ్ || 5 ||
స్వతస్సర్వవిదే సర్వశక్తయే సర్వశేషిణే
సులభాయ సుశీలాయ వేంకటేశాయ మంగళమ్ || 6 ||
పరస్మై బ్రహ్మణే పూర్ణకామాయ పరమాత్మనే
ప్రయుంజే పరతత్త్వాయ వేంకటేశాయ మంగళమ్ || 7 ||
ఆకాల తత్త్వమశ్రాంతమాత్మనామనుపశ్యతాం
అతృప్త్యమృతరూపాయ వేంకటేశాయ మంగళమ్ || 8 ||
ప్రాయస్స్వచరణౌ పుంసాం శరణ్యత్వేన పాణినా
కృపయాఽఽదిశతే శ్రీమద్ వేంకటేశాయ మంగళమ్ || 9 ||
దయామృతతరంగిణ్యాస్తరంగైరివశీతలైః
అపాంగైః సించతే విశ్వం వేంకటేశాయ మంగళమ్ || 10 ||
స్రగ్భూషాంబరహేతీనాం సుషమావహ మూర్తయే
సర్వార్తిశమనాయాస్తు వేంకటేశాయ మంగళమ్ || 11 ||
శ్రీవైకుంఠవిరక్తాయ స్వామిపుష్కరిణీతటే
రమయా రమమాణాయ వేంకటేశాయ మంగళమ్ || 12 ||
శ్రీమద్సుందరజామాతృ మునిమానసవాసినే
సర్వలోకనివాసాయ శ్రీనివాసాయ మంగళమ్ || 13 ||
మంగళాశాసనపరైర్మదాచార్య పురోగమైః
సర్వైశ్చ పూర్వైరాచార్యైః సత్కృతాయాస్తు మంగళమ్ || 14 ||
No comments:
Post a Comment