వలచి పైకొనఁగరాదు వలదని తొలఁగరాదు

వలచి పైకొనఁగరాదు వలదని తొలఁగరాదు

తాళం: 

రాగం: సామంతం (మేళకర్త 28, హరి ఖంభోజి   జన్యరాగ )

రూపకర్త: అన్నమాచార్య

ఆరోహణ: స రి2 మ1 ప ద2 స

అవరోహణ: స ద2 ప మ1 గ3 రి2 స

పల్లవి

వలచి పైకొనఁగరాదు వలదని తొలఁగరాదు

కలికి మరుఁడు సేసినాజ్ఞ కడవఁగ రాదురా ॥వలచి॥

చరణము

అంగడి కెత్తినట్టి దివ్వె లంగన ముఖాంబుజములు

ముంగిటి పసిఁడి కుంభములును ముద్దుల కుచయుగంబులు

యెంగిలి సేసినట్టి తేనె లితవులైన మెఱుఁగుమోవులు

లింగములేని దేహరములు లెక్కలేని ప్రియములు ॥వలచి॥

కంచములోని వేఁడికూరలు గరువంబులుఁ బొలయలుకలు

యెంచఁగ నెండలో నీడలు యెడనెడ కూటములు

తెంచఁగరాని వలెతాళ్ళు తెలివిపడని లేఁతనవ్వులు

మంచితనములోని నొప్పులు మాటలలోని మాటలు ॥వలచి॥

నిప్పులమీఁద జల్లిన నూనెలు నిగిడి తనివిలేని యాసలు

దప్పికి నేయి దాగినట్లు తమకములోని తాలిమి

చెప్పఁగరాని మేలు గనుట శ్రీవేంకటపతిఁ గనుటలు

అప్పని కరుణ గలిగి మనుట అబ్బురమైన సుఖములు ॥వలచి॥