అడుగుదాటి కదలనియ్యను
తాళం: రూపక (త్రిపుట)
రాగం: వరాళి (మేళకర్త 39, జలవరాళి జన్యరాగ)
రూపకర్త: రామదాసు
ఆరోహణ: స గ1 రి1 గ1 మ2 ప ద1 ని3 స
అవరోహణ: స ని3 ద1 ప మ2 గ1 రి1 స
పల్లవి:
అడుగుదాటి కదలనియ్యను నాకభయ మియ్యక నిన్ను విడువను.
అను పల్లవి:
గడియగడియకు తిరిగితిరిగి యడిగితిని వేసారవచ్చెను
గడువుదప్పిన నేను నిక బహు దుడుకుతనములు సేయుదును నిను.
చరణము(లు):
కుదురుగా గూర్చుండనియ్యను కోపమొచ్చిన భయము చెందను
మది నెరింగి యుండుమిక మొగమాటమేమియు లేదుగద నా
హృదయ కమలమునందు నీ మృదు పదములను బంధించివేతును || 1 ||
రేపు మాపని జరిపితే నే నాపుజేసెడివాడ గాను
ప్రాపు నీవని నమ్మిగొలిచిన పాపముల నెడబాపి దయతో
తేపతేపకు నీదు మోమిటు చూపకుండిన నోర్వసుమ్మి || 2 ||
పతితపావన బిరుదులేదా పాలనము నను సేయరాదా
ప్రతిదినంబును దేవ నిను భూపతి వటంచును వేడినను నీ
హితజనంబులు వచ్చి నన్ను బ్రతిమాలినను విడబోను నిన్ను || 3 ||
రాక్షసాంతక భక్తవరదా సారసాక్ష సుజనరక్షక
యీ క్షణంబున దీనజనుడని మోక్షమియ్యక యుంటివా నిను
సాక్షి బెట్టియు నేడు నేనొక దీక్షచే సాధింతు నిన్ను || 4 ||
భూరి భద్రాచలనివాసా భుజగశయనా భక్తపోష
కూరిమిగ నిను విడిచిపెట్టిన ధరణిలో భద్రాద్రి రాఘవ
రామదాసుం డనెడి నామము మారుపేరున బిలువు నన్ను || 5 ||
No comments:
Post a Comment