AYAYO NEEDELLA E JEEVUNAKU - అయ్యయ్యో నేడెల్ల యీ జీవునకు సుఖమెయ్యెడ

తాళం: ఆది (రూపక)

రాగం: వరాళి (మేళకర్త 39, జలవరాళి జన్యరాగ)

రూపకర్త: రామదాసు

ఆరోహణ: స గ3 మ2 ద2 ని2 స

అవరోహణ: స ని2 ద2 మ2 గ3 రి2 గ3 స

పల్లవి:

అయ్యయ్యో నేడెల్ల యీ జీవునకు సుఖమెయ్యెడ లేదుగదా రామయ్య

చరణము(లు):

చయ్యన రఘుకుల సార్వభౌమా ఏ చందాన బ్రోచెదవో రామయ్య॥ 1 ||

వనజనాభుని మాయ తెలియకనే వెఱ్ఱివగల బొందుచుంటిగా కొన్నాళ్ళు॥ 2 ||

మునుపు జేసిన పుణ్యపాప సంఘములచే మునిగి తేలుచుంటిగా కొన్నాళ్ళు॥ 3 ||

ఎనుబదినాల్గు లక్షల యోనులందెల్ల వేసరక పుట్టితిగా కొన్నాళ్ళు॥ 4 ||

అయ్య ఆలంబనము లేక నాకాశమున నలసట నొందితిగా కొన్నాళ్ళు॥ 5 ||

మేను తెలియగ లేక మిన్ను లోపల జిక్కి మినుకుగ నుంటినిగదా కొన్నాళ్ళు॥ 6 ||

ఈలాగు వచ్చి మేఘమధ్యమునందు నిడుమల పడుచుంటిగా కొన్నాళ్ళు॥ 7 ||

జాలినొంద సూర్యకిరణములో జొచ్చి చలనము నొందితిగా కొన్నాళ్ళు ॥ 8 ||

వర్షములోజిక్కి వసుమతిమీదనె వర్తించుచుంటిగదా కొన్నాళ్ళు॥ 9 ||

వరుస శషసస్యగతమైన ధాన్యముల వదలి వర్తించితిగా కొన్నాళ్ళు॥ 10 ||

పురుషుడారగించు నన్నముతోనే నట్టు జేరియుంటిగా కొన్నాళ్ళు॥ 11 ||

వరనరుని రేతస్సువల్ల నారీగర్భనరకమున బడియుంటిగా ఓరామ ॥ 12 ||

ఆ త్రిప్పుడు తిత్తిలో బదినెలలు ప్రవర్తిల్లుచుంటినిగా కొన్నాళ్ళు॥ 13 ||

అప్పుడు మాతల్లి యుప్పుపులుసుదిన నంగలార్చుచుంటి గదా కొన్నాళ్ళు॥ 14 ||

ఎప్పుడు నిందుండి బయలు వెళ్ళుదునని ఎదురుచూచుచుంటిగదా కొన్నాళ్ళు॥ 15 ||

చెప్పరానియట్టి ద్వారములోను బడి జననమొందితిని గదా రామయ్య॥ 16 ||

పొరలు దుర్గంధపు పొత్తిళ్ళలోనలిగి వరలుచు నుంటిగదా కొన్నాళ్ళు॥ 17 ||

పెరుగుచు బాల్యావస్థల కొన్నిదినములు పరుగులాడుచునుంటిగా కొన్నాళ్ళు॥ 18 ||

లేతరుణులతో గూడి మదమత్సరంబులు తన్నెరుగలేనైతినిగదా కొన్నాళ్ళు॥ 19 ||

తరువాత దారపుత్రాది మోహములదగిలి వర్తించితిగదా ఓ రామా ॥ 20 ||

తెల్లతెల్లనై దంతము లూడివణకుచు తడబడుచుంటిగదా కొన్నాళ్ళు॥ 21 ||

బలముదీరి కండ్లు పొరలు గప్ప పరుల బ్రతిమాలుచుంటిగదా కొన్నాళ్ళు॥ 22 ||

అంతట మృతినొంది యలయుచు యమునిచే బాధలొందితిగా కొన్నాళ్ళు॥ 23 ||

ఎంతగా నీరీతి పుట్టుచు గిట్టుచు వేదనబడుచుంటిగా కొన్నాళ్ళు॥ 24 ||

కంజజనక భద్రాచలపతివగు నిన్ను గనలేక తిరిగితిగదా కొన్నాళ్ళు॥ 25 ||

వింతగ నేరామదాసుడనైతిని నింకెట్లు బ్రోచెదవో ఓ రామా ॥ 26 ||