PAHI RAMA PRABHO - పాహి రామప్రభో

 పాహి రామప్రభో

తాళం: ఝంప

రాగం: మధ్యమావతి

రూపకర్త: రామదాసు

పల్లవి

పాహిరామప్రభో పాహిరామప్రభో

పాహిభద్రాద్రి వైదేహిరామప్రభో ॥ పాహిరామప్రభో ॥

చరణము(లు):

శ్రీమన్మహాగుణస్తోమాభిరామ మీ

నామకీర్తనలు వర్ణింతు రామప్రభో ॥ 1 ॥

సుందరాకార హృన్మందిరోద్ధార సీ

తేందిరా సంయుతానంద రామప్రభో ॥ 2 ॥

ఇందిరా హృదయారవిందాదిరూఢ

సుందారాకార ఆనంద రామప్రభో ॥ 3 ॥

ఎందునేజూడ మీసుందరాననము

కందునో కన్నులింపొంద రామప్రభో ॥ 4 ॥

పుణ్యచారిత్రలావణ్య కారుణ్య గాం

భీర్య దాక్షిణ్య శ్రీరామచంద్రప్రభో ॥ 5 ॥

కందర్పజనక నాయందు రంజిల సదా

నందుడవై పూజలందు రామప్రభో ॥ 6 ॥

ఇంపుగా జెవులకు న్విందుగా నీకథల్‌

కందుగా మిమ్ము సొంపొంద రామప్రభో ॥ 7 ॥

వందనముచేసి మునులందరు ఘనులైరి

విందవైనట్టి గోవింద రామప్రభో ॥ 8 ॥

బృందారకాది సద్బృందార్చితావతార

వింద ముని సందర్శితానంద రామప్రభో ॥ 9 ॥

తల్లివినీవె మాతండ్రివినీవె మా

ధాతవునీవె మాభ్రాత రామప్రభో ॥ 10 ॥

పల్లవాధరలైన గొల్లభామలగూడి

యుల్లమలరంగ రంజిల్లు రామప్రభో ॥ 11 ॥

మల్లరంగంబునందెల్ల మల్లులజీరి

యల్ల కంసుని జంపు మల్ల రామప్రభో ॥ 12 ॥

కొల్లలుగ నీమాయ వెల్లివిరియగ జేయ

సల్లాపమున క్రీడసల్పు రామప్రభో ॥ 13 ॥

తమ్ముడును నీవు పార్శ్వమ్ములంజేరి వి

ల్లమ్ములెక్కెడి నిల్చుటిమ్ము రామప్రభో ॥ 14 ॥

క్రమ్ముకొనిశాత్రవులు హుమ్మనుచువచ్చెదరు

ఇమ్మైనబాణములిమ్ము రామప్రభో ॥ 15 ॥

రమ్ము నాకభయమ్ము నిమ్ము నీపాదముల్‌

నమ్మినానయ్య శ్రీరామచంద్రప్రభో ॥ 16 ॥

కంటి మీ శంఖమ్ము కంటి మీ చక్రము

కంటి మీ పాదముల్గంటి రామప్రభో ॥ 17 ॥

వింటి మహిమ వెన్నంటి తమ్ముడు నీవు

జంటరావయ్య నావెంట రామప్రభో ॥ 18 ॥

మేము నీవారమైనాము రక్షింపుమ

న్నాము జాగేల శ్రీరామచంద్రప్రభో ॥ 19 ॥

నామనోవీధిని ప్రేమతోనుండు మీ

భూమిజాసహిత జయ రామచంద్రప్రభో ॥ 20 ॥

మీ మహత్త్వమ్ము విన మనమందు ప్రేమ

వేమరున్‌ బుట్టు శ్రీరామచంద్రప్రభో ॥ 21 ॥

శ్యామసుందర కోమలం జానకీమనః

కాముకం త్వం భజే రామచంద్రప్రభో ॥ 22 ॥

కామితార్థములిచ్చు నీ మహత్వము విన్న

నా మొరాలించు నాస్వామి రామప్రభో ॥ 23 ॥

కామితప్రభుడవై ప్రేమతో రక్షించు

స్వామి సాకేతపురి రామచంద్రప్రభో ॥ 24 ॥

అన్న రావన్న నీకన్న నామీద నెన

రున్న వారేరి నాయన్న రామప్రభో ॥ 25 ॥

నిన్నెగాకను మరే యన్యులగానన్‌

గన్నతండ్రివిగ మాయన్న రామప్రభో ॥ 26 ॥

వెన్నదొంగిలి తిన్న చిన్నకృష్ణమ్మ ని

న్నెన్నగా వశమె రావన్న రామప్రభో ॥ 27 ॥

ఎన్నెన్నో జన్మముల నెత్తజాలను ఇక

నిన్నె నెమ్మదిని వర్ణింతు రామప్రభో ॥ 28 ॥

ఎన్నివిధములనైన నిన్నె నమ్మిన వాని

మన్నించి దయచేయుమన్న రామప్రభో ॥ 29 ॥

పన్నగాధిపశాయి భావనాతీత ఆ

పన్న నామనవి వినవన్న రామప్రభో ॥ 30 ॥

మేటివాక్యంబు మీసాటిదైవంబు ము

మ్మాటికిని భువిలేదు మేటి రామప్రభో ॥ 31 ॥

పాడుదును మిమ్ము గొనియాడుదును మోదమున

వేడుచున్నాను గాపాడు రామప్రభో ॥ 32 ॥

వేడుకోగానె నీజోడుకాడును నీవు

కూడి రారయ్య నాతోడ రామప్రభో ॥ 33 ॥

నేడు నాకోర్కె లీడేరగాజేసి కా

పాడరా కరినేలు జాడ రామప్రభో ॥ 34 ॥

మూడుమూర్తుల కాత్మమూలమై చెన్నొందు

వాడవని శ్రుతులు నిన్నాడు రామప్రభో ॥ 35 ॥

చూడు మీభక్తులను గూడు మీరిపుల గో

రాడు మీవల్ల గోవింద రామప్రభో ॥ 36 ॥

పుండరీకాక్ష మార్తాండవంశోద్భవా

ఖండలస్తుత్య కోదండ రామప్రభో ॥ 37 ॥

కుండలిశయన భూమండలోద్ధరణ పా

షండజనహరణ కోదండరామప్రభో ॥ 38 ॥

నిండుదయతోడ నాయండ బాయకను నీ

వుండి గాపాడు కోదండరామప్రభో ॥ 39 ॥

జాతకౌతూహలం చక్షుకృత్యారమాం

పూతసీతాపతే దాత రామప్రభో ॥ 40 ॥

పాతకులలో మొదటి పాతకుడ నావంటి

పాతకుని కావుటే ఖ్యాతి రామప్రభో ॥ 41 ॥

భూతనాథుని విల్లు ఖ్యాతిగా ఖండించి

సీతగైకొన్న విఖ్యాత రామప్రభో ॥ 42 ॥

పూతనాకల్మషోద్ధూత పె\న్‌శత్రు సం

హారి శ్రీసీతాసమేత రామప్రభో ॥ 43 ॥

జాతినీతులులేక భూతలంబున దిరుగు

ఘాతకుల బరిమార్చు నేత రామప్రభో ॥ 44 ॥

ఎప్పుడును గంటికి రెప్పవలె గాచి న

న్నొప్పుగాగావు మాయప్ప రామప్రభో ॥ 45 ॥

ఏదయా నీదయా యోదయాంభోనిధీ

యాదిలేదయ్య నామీద రామప్రభో ॥ 46 ॥

ఘోరరాక్షస గర్వహార విశ్వంభరో

ద్ధార గుణసాంద్రవిస్తార రామప్రభో ॥ 47 ॥

మోదమున నీవు నన్నాదుకోవయ్య గో

దావరీ తీర భద్రాద్రి రామప్రభో ॥ 48 ॥

నీదు బాణంబులను నాదుశత్రులబట్టి

బాధింపకున్నావదేమి రామప్రభో ॥ 49 ॥

ఆదిమధ్యాంత బహిరాంతరాత్ముడవనుచు

వాదింతునే జగన్నాథ రామప్రభో ॥ 50 ॥

చాలదేమి పదాబ్జములసాటి యీపదు

నాల్గులోకంబుల గూడి రామప్రభో ॥ 51 ॥

ఏల యీలాగు జాగేల జేసెదవు మ

మ్మేలుకోవయ్య మాపాలి రామప్రభో ॥ 52 ॥

పాలువెన్నలు మ్రుచ్చిలింతివని యశోద

రోటగట్టిన మాయచాలు రామప్రభో ॥ 53 ॥

కొల్లలుగ వ్రేపల్లె పల్లవాధరులతో

నల్లబిల్లిగను రంజిల్ల రామప్రభో ॥ 54 ॥

వాలి నొక్కమ్మునన్‌ గూలవేసిన శౌర్య

శాలియౌ నినుదలతు జాల రామప్రభో ॥ 55 ॥

సాలభంజికల నిర్మూలంబు చేయగా

జాలితివి గోపాలబాల రామప్రభో ॥ 56 ॥

తాళవృక్షము లొక్కకోల ధరగూలగా

లీలనేసిన బాహుశాలి రామప్రభో ॥ 57 ॥

(శిలయైన యహల్య శ్రీపాదములు

సోక నెలతయై మిము మదితలచె ॥ 58 ॥

వినవయ్య మనవి గైకొనవయ్య తప్పులన్‌

గనకయ్య సమ్మతిన్గొనుచు రామప్రభో ॥ 59 ॥

దానధర్మంబులున్‌ దపజపంబులు నీదు

నామకీర్తనకు సరిరావు రామప్రభో ॥ 60 ॥

మానావమానములు మహిని నీవై యుండ

మాకేల మదిని ఈచింత రామప్రభో ॥ 61 ॥

జ్ఞానయోగాభ్యాసమందు నుండెడివారి

కానందమయుడవైనావు రామప్రభో ॥ 62 ॥

భానువంశమునందు మానవాధిపుడవై

దానవుల బరిమార్చినావు రామప్రభో ॥ 63 ॥ 

అణురేణు పరిపూర్ణుడౌ హృదయవాస నా

మనవి విను దేవకీతనయ రామప్రభో ॥ 64 ॥

మాన్యమై ఆశ్రితవదాన్యమై సుజన స

న్మాన్యమై వెలుగు మూర్ధన్య రామప్రభో ॥ 65 ॥

నిత్యమై సత్యమై నిర్మలంబై మహిని

దివ్యవంశోత్తంసమైన రామప్రభో ॥ 66 ॥ 

సేవ్యమై మీపదద్భావ్యమై సజ్జన

శ్రావ్యమై యుండునో దివ్య రామప్రభో ॥ 67 ॥ 

గట్టిగా నీవున\న్‌ పట్టుగా విహితమౌ

నట్టుగా మమ్ము చేపట్టు రామప్రభో ॥ 68 ॥

దిట్టయగు తాటకినిగొట్టి వేగమె గాధి

పట్టి యాగము గాచినట్టి రామప్రభో ॥ 69 ॥

చుట్టుకొని కాళింగు డట్టహాసముచేయ

పట్టుకొని తలనెక్కినట్టి రామప్రభో ॥ 70 ॥

సంతతము నన్ను రక్షింతువని నమ్మి మి

మ్మెంతురా జానకీకాంత రామప్రభో ॥ 71 ॥

పంతమున మీ పాదచింతనము చేయ నా

వంతలన్నియు మానుటెంత రామప్రభో ॥ 72 ॥

వింతగాదయ్య నేనింతనాడినది నా

పంతమున మిమ్ము భావింతు రామప్రభో ॥ 73 ॥

శాంతమూర్తిని రమాకాంతుడవని చాల

సంతసంబున నిన్ను నెంతు రామప్రభో ॥ 74 ॥

అక్షయంబైన నీకుక్షిలో లోకముల

రక్షించితివి లక్ష్మీవక్ష రామప్రభో ॥ 75 ॥

దంతివత్సల భక్తచింతామణీ విశ్వ

మంతయును నీవు రక్షించు రామప్రభో ॥ 76 ॥

పక్షివాహన శత్రునిక్షేపణా నన్ను

రక్షించు మోక్షప్రదాత రామప్రభో ॥ 77 ॥

రక్షించి సజ్జనుల వీక్షించి దుర్జనుల

రాక్షసుల శిక్షించినావు రామప్రభో ॥ 78 ॥

రక్షకుడవై జగద్రక్షణముచేయగా

రాక్షసుల శిక్షించినావు రామప్రభో ॥ 79 ॥

లక్ష్మీకటాక్ష వీక్షణధార వృష్టి మా

కక్షయంబుగ కటాక్షించు రామప్రభో ॥ 80 ॥

రావయా అభయంబు లీవయా నాస్వామీ

నీవయా గతి దేవరాయ రామప్రభో ॥ 81 ॥

కావు కావుమటంచు కాకాసురుడురాగ

కాచి రక్షించినావయ్య రామప్రభో ॥ 82 ॥

దేవదేవోత్తమా దేవేంద్రసన్నుతా

కావవేనన్ను శ్రీరామచంద్రప్రభో ॥ 83 ॥

భావజజనక నా బాధలన్నియుమాన్పి

యే విధంబునైన నేలు రామప్రభో ॥ 84 ॥

శ్రీవైష్ణవులపాలి చింతామణివి చాల

సేవగైకొని కరుణచేయు రామప్రభో ॥ 85 ॥

భావమున మిముభక్తి సేవించు జనులకు

కైవల్యమొసగు శ్రీరామచంద్రప్రభో ॥ 86 ॥

గోపాలురను గూడి యావులను మేపి

ఆపదోద్ధారకుడవైన రామప్రభో ॥ 87 ॥

నాపాలి శ్రీరామ భూపాలకా నను

కాపాడరావ గోపాల రామప్రభో ॥ 88 ॥

సారమౌశౌర్య విస్తారమౌ సుందరా

కారసద్భక్తమందార రామప్రభో ॥ 89 ॥

శరణాగతత్రాణ బిరుదాంకితంబైన

వరము నాకొసగు యేమరక రామప్రభో ॥ 90 ॥

శ్రీరామ రామేతి శ్రేష్ఠమంత్రము సారె

సారెకును వింతగా జదువ రామప్రభో ॥ 91 ॥

శ్రీరామ నీనామ చింతనామృతపాన

సారమే నాదుమది గోరు రామప్రభో ॥ 92 ॥

చేరి మీపాద పద్మారాధనము చేయ

కోరినానయ్య శ్రీరామచంద్రప్రభో ॥ 93 ॥

ఘోరరాక్షసగర్వహారి విశ్వంభరా

భూరిగుణసాంద్ర విస్తార రామప్రభో ॥ 94 ॥

మారీచమాయానివార శరసంధాన

ధారుణీతనయా విహార రామప్రభో ॥ 95 ॥

పరవాసుదేవ యక్షయపాత్ర మొసగి న

న్నరసి పోషింపగదవయ్య రామప్రభో ॥ 96 ॥

పరధనంబును పరస్త్రీల నపేక్షించు

నరుకబ్బునే మోక్షమరయ రామప్రభో ॥ 97 ॥

కామాదిదుర్గుణ స్తోమంబులడగ మీ

నామామృతమె దిక్కు రామచంద్రప్రభో ॥ 98 ॥

దుష్టులగు దానవుల నష్టంబుగా జేయగా

బుట్టితివి కౌసల్య పట్టి రామప్రభో ॥ 99 ॥

కష్టపడలేనయ్య పట్టాభిరామ నా

కిష్టసంపదలిచ్చి యేలు రామప్రభో ॥ 100 ॥

కేశవాయనిన భవపాశముళొలగు స

ర్వేశకోటి శశిప్రకాశ రామప్రభో ॥ 101 ॥

నారాయణా నీదు నామామృతం బెపుడు

పారాయణము చేతు నేను రామప్రభో ॥ 102 ॥

మాధవాయనియు సమ్మోదమున నినుగొల్చు

సాధుసజ్జనదయాంభోధి రామప్రభో ॥ 103 ॥

గోవింద గోవింద గోపాలకృష్ణయని

గోపకులు గొనియాడు గోపరామప్రభో ॥ 104 ॥

విష్ణునా సర్వవర్ధిష్ణునా తత్త్వ భూ

యిష్ణునా నిర్మితం కృష్ణ రామప్రభో ॥ 105 ॥

శ్రీధరా శ్రీకరా శ్రీనారసింహ గం

గాధర స్తోత్ర యానంద రామప్రభో ॥ 106 ॥

మత్స్యమై జలధిలో జొచ్చి సోమకుద్రుంచి

తెచ్చి వేదము లజునకిస్తి రామప్రభో ॥ 107 ॥

కూర్మరూపము నొంది కొండమూపునదాల్చి

కూర్మితో నమృతంబుగూర్చి రామప్రభో ॥ 108 ॥

వరాహరూపమున వసుధగొమ్ముననెత్తి

సురల రక్షించు దాశరథి రామప్రభో ॥ 109 ॥

శరణన్న ప్రహ్లాదు గరుణించి రక్షింప

నరసింహమూర్తివైనట్టి రామప్రభో ॥ 110 ॥

వామనత్వమున భూదానమడిగియు బలిని

భూమిక్రిందనడంచి పొల్చు రామప్రభో ॥ 111 ॥

పరశురాముడనంగ నరపాలకులనెల్ల

నరసిపొరికొన్న దాశరథి రామప్రభో ॥ 112 ॥

శ్రీరామమూర్తివై యారావణుని తలల్‌

ధారుణిన్‌ పడగూర్చినావు రామప్రభో ॥ 113 ॥

హలధరుడవై ధరాస్థలిపాలకులనెల్ల

బొరిపుచ్చి వెలుగుమాపాలి రామప్రభో ॥ 114 ॥

సిద్ధసన్నుత మనోబద్ధుండవై నీవు

బౌద్ధుండవైతి ప్రబుద్ధ రామప్రభో ॥ 115 ॥

కలికిరూపముదాల్చి కలియుగంబున నీవు

వెలసితివి భద్రాద్రినిలయ రామప్రభో ॥ 116 ॥

అవ్యయుడవైన నీయవతారముల జూచి

దివ్యులైనారు మునులయ్య రామప్రభో ॥ 117 ॥

శ్రీరామనామమే వేళస్మరియింతు

స్వామి దయచేయు సంపదను రామప్రభో ॥ 118 ॥

అప్ప శేషశయన యెప్పుడు నిను మరువ

నొప్పుగా బ్రోవు వరదప్ప రామప్రభో ॥ 119 ॥

తెప్పరంబులుదీర్చి యిప్పుడేమరక నన్‌

ద్రిప్పు బెట్టక చేపట్టు రామప్రభో ॥ 120 ॥

పట్టాభిరామ నీపాదపద్మాశ్రయుల

పాలింపుమా భద్రశైలి రామప్రభో ॥ 121 ॥

పట్టాభిరామ నిను ప్రభుడవని నమ్మితిని

కష్టపెట్టకను చేపట్టు రామప్రభో ॥ 122 ॥