Sri Matangi Devi Dhyanam - శ్రీ మాతంగి దేవి ధ్యానం

శ్రీ మాతంగీ దేవి ధ్యానం

మాణిక్యవీణా ముపలాలయంతీం మదాలసాం మంజులవాగ్విలాసాం  

మహేంద్ర నీలద్యుతి కోమలాంగీం మాతంగ కన్యాం మనసా స్మరామి ॥

శ్యామాంగీం శశిరేఖరాం త్రినయనాం రత్న సింహాసన స్థితాం
వేదై ర్బాహుదండై రసిఖేటక పాశాంకుశ ధరాం ॥

చతుర్భుజే చంద్ర కళావసంతే కుచోన్నతే కుంకుమ రాగశోణే
పుండ్రేక్షు పాశాంకుశ పుష్పబాణ హస్తే నమస్తే జగదేక మాతః ॥

మాతా మరకత శ్యామా మాతంగీ మధుశాలినీ
కుర్యాత్‌ కటాక్షం కళ్యాణీ కదంబ వనవాసినీ ॥

జయమాతంగ తనయే జయనీలోత్పలద్యుతే
జయ సంగీత రసికే జయలీలా శుకప్రియే ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Sri Raja Matangi Devi Sthuthi - శ్రీ రాజమాతంగీ దేవి స్తుతి

శ్రీ రాజమాతంగీ దేవి స్తుతి 

ఆరాధ్య మాతశ్చరణాంబుజం తే
బ్రహ్మదయో విశృత కీర్తి మాపుః ।
అన్యేపరం వాగ్విభవం మునీంద్రాః
పరాంశ్రియం భక్తి భరేణాచాஉన్యే ॥ 01 ॥

నమామిదేవీం నవచంద్రమౌళే ర్మాతంగినీం చంద్రకళావతంసాం ।
ఆమ్నాయ వాగ్భిః ప్రతిపాది తార్థం ప్రబోధయంతే శుకమాదరేణ ॥ 02 ॥

వినమ్ర దేవాసుర మౌలిరత్నైః నీరాజితంతే చరణారవిందం ।
భజంతి యేదేవి మహీపతీనాం వ్రజంతి తే సంపద మాదరేణ ॥ 03 ॥

మాతంగ లీలాగమనే భవత్శాః శింజానమంజీర మిషాద్‌ భజంతే
మాతస్త్వదీయం చరణారవిందం ఆకృతిమాణాం వచసాం నిగుంఫాః ॥ 04 ॥

పదాత్‌ పదం శింజితనూపురాభ్యాం కృతార్థయంతీం పదవీ పదాభ్యాం ।
అస్ఫాలయంతీం కలవల్లకీంతాం మాతంగినీం మద్‌ హృదయం ధినోతు ॥ 05  ॥

నీలాం శుకాబద్ధ నితంబబింబాం తాళీదళేనాஉర్పిత కర్ణభూషాం ।
మాద్వీమదాఘూర్ణిత నేత్రపద్మాం ఘనస్తనీం శంభువధూం నమామి ॥ 06 ॥

తడిల్లతా కాంత మనర్ఘ్యభూషం చిరేణలక్ష్యం నవరోమ రాజ్యా ।
స్మరామి భక్త్యా జగతామధీశే వళిత్రయాంకం తవ మధ్యబింబం ॥ 07  ॥

నీలోత్పలానాం శ్రియమాహరంతీం కాంత్యాకటాక్షైః కమలా కరాణాం ।
కదంబ మాలాంచిత కేశపావాం మాతంగ కన్యాం హృది భావయామి ॥ 08 ॥

ధ్యాయేయమారక్త కపోలకాంతం బింబాధరన్యస్తలలామ రమ్యం ।
ఆలోల నీలాలక మాయతాక్షం మందస్మితం తే వదనం మహీః ॥ 09 ॥

దేవతాం జగతామాద్యాం మాతంగీం ఇష్టదాయినీమ్‌ ।
అవాప్తు మిష్టతాం వాచం భూషయేద్రత్న మాలయా ॥ 10 ॥

స్తుత్యాஉనయా శంకర ధర్మపతీం మాతంగినీం వాగధిదేవతాం తాం ।
స్తువంతియే భక్తియుతా మనుష్యాః పరాశ్రియం నిత్య ముపాశ్రయంతి ॥ 11 ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Uma Sahacharya virachitham Matangi Sthotram - ఉమాసహాచార్యవిరచితం మాతంగీ స్తోత్రం

ఉమాసహాచార్యవిరచితం మాతంగీ స్తోత్రం

ఓం క్లీం మాతంగ్యై నమః

మాతంగీ నావయావకార్ద్రాచరణాం ప్రోల్లాసికృష్ణాంశుకాం
వీణోల్లాసికరాం సమున్నతకుచాం ముక్తాప్రవాలావలీం ।
హృద్యాంగీం సితశంఖకుండలధరాం బింబాధరాం సుస్మితాం
ఆకీర్ణాలకవేణిమబ్జనయనాం ధ్యాయేత్‌ శుకஉశ్యామలాం ॥ 01॥

కలాధీశోత్తంసాం కరకలితవీణాహితరసాం
కలిందాపత్యాభాం కలితహృదయారక్తవసనాం ।
పురాణీం కల్యాణీం పురమథనపుణ్యోదయకలాం
అధీరాక్షీమేనామవటుతటసన్నద్ధకబరీం ॥ 02॥

కరోదంచద్వీణం కనకదలతాటంకనిహితం
స్తనాభ్యామానమ్రం తరుణమిహిరారక్తవసనం ।
మహః కల్యాణం తన్మధుమదభరాతామ్రనయనం
తమాలశ్యామం నః స్తబకయతు సౌఖ్యాని సతతం ॥ 03॥

కరాంచితవిపంచికాం కలితచంద్రచూడామణిం
కపోలవిలసన్మహఃకనకపత్రతాటంకినీం ।
తపఃకలమధీశితస్తరుణభానురక్తాంబరాం
తమాలదలమేచకాం తరలలోచనామాశ్రయే ॥ 04॥

కస్తూరీరచితాభిరామతిలకా కల్యాణతాటంకినీ
బాలా శీతమయూఖశోణవసనా ప్రాలంబిధమ్మిల్లకా ।
హారోదంచితపీవరస్తనతటా హాలామదోల్లాసినీ
శ్యామా కాంచన కామినీ విజయతే చంచద్విపంచీకరా ॥ 05॥

మాతా మరకతశ్యామా, మాతంగీ మృదుభాషిణీ ।
కటాక్షయే తు కల్యాణీ కదంబవనవాసినీ ॥ 06॥

శృంగే సుమేరోః సహచారిణీభిర్గీయంతి మాతంగి తవావదానం ।
ఆమోదినీమాగలమాపిబంతః కాదంబరీమంబరవాసినస్తే ॥ 07 ॥

ఏకేన చాపమపరేణ కరేణ బాణా-

నన్యేన పాశమితరేణ శృణిం దధానా ।
ఆనందకందలితవిద్రుమబాలవల్లీ
సంవిన్మయీ స్ఫురతు కాంచన దేవతా మే ॥ 08॥

గజదానకలంకికంఠమూలా
కబరీవేష్టనకాంక్షణీయగుంజా ।
కురుతాద్‌ దురితాద్‌ విమోక్షణం మే
కుహునా భిల్లకుటుంబినీ భవానీ ॥ 09॥

పాణౌ మృణాలసగుణం దధతీక్షుచాపం
పృష్ఠే లసత్కనకకేతకబాణకోశౌ ।
అంగే ప్రవాలకవచం వనవాసినీ సా
పంచాననం మృగయతే కదలీవనాంతే ॥ 10॥

వామే విస్తృతిశాలిని స్తనతటే విన్యస్య వీణాముఖం
తంత్రీం తారవిరావిణీమసకలైరాస్ఫాలయంతీ నఖైః ।
అర్ధోన్మీలదపాంగదిక్షువలితగ్రీవం ముఖం బిభ్రతీ
మాయా కాంచన మోహినీ విజయతే మాతంగకన్యామయీ ॥ 11 ॥

ప్రతిక్షణపయోధర -ప్రవిలసద్విపంచీగుణ -
ప్రసారి కరపంకజం బలభిదశ్మపుంజోపమం ।
కదంబవనమాలికాశశికలాసముద్భాసితం
మతంగకులమండనం మనసి మే మహో జృంభతాం ॥ 12 ॥

లాక్షాలోహితపాదపంకజదలామాపీనతుంగస్తనీం
కర్పూరోజ్జ్వలచారుశంఖవలయాం కాశ్మీరపత్రాంకురాం ।
తంత్రీతాడనపాటలాంగులిదలాం అందామహ్‌ మాతరం
మాతంగీం మదమంథరాం మరకతశ్యామాం మనోహారిణీం ॥ 13 ॥

స్రస్తం కేశరదామభిర్వలయితం ధమ్మిల్లమాబిభ్రతీ
తాలీపత్రపుటాంతరైః సుఘటితైస్తాటంకినీ మౌక్తికైః ।
మూలే కల్పతరోర్మదస్ఖలితదృగ్ దృష్ట్యైవ సమ్మోహినీ
కాచిద్‌ గాయనదేవతా విజయతే వీణావతీ వాసనా ॥ 14 ॥

యత్‌ షట్పత్రం కమలముదితం తస్య యత్కర్ణికాంత-
ర్జ్యోతిస్తస్యాప్యుదరకుహరే యత్తదోంకారపీఠం ।
తస్యాప్యంతః స్తనభరనతాం కుండలీతి ప్రసిద్ధాం
శ్యామాకారాం సకలజననీం సంతతం భావయామి ॥ 15 ॥

నిశి నిశి బలిమస్యై భుక్తశేషేణ దత్త్వా
మను మను గణనాథో మంత్రజాపం వితన్వన్‌ ।
భవతి నృపతిపూజ్యో యోషితాం ప్రీతిపాత్రం
వ్రజతి చ పునరంతే శాశ్వతీం మూర్తిమాద్యాం ॥ 16 ॥

కాసారంతి పయోధయో విషధరాః కర్పూరహారంతి చ
శ్రీఖండంతి దవానలా వనగజాః సారంగశావంతి చ ।
దాసంత్యద్భుతశాత్రవాః కిమపరం పుష్యంతి వజ్రాణ్యపి
శ్రీదామోదరసోదరే భగవతి ! త్వత్పాదనిష్ఠాత్మనాం ॥ 17 ॥

కువలయనిభా కౌశేయార్ధోరుకా ముకుటోజ్జ్వలా
హలముశలినీ సద్భక్తేభ్యో వరాభయదాయినీ ।
కపిలనయనా మధ్యేక్షామా కఠోరఘనస్తనీ
జయతి జగతాం మాతః ! సా తే వరాహముఖీ తనుః॥ 18 ॥

అమృతమహోదధిమధ్యే రత్నద్వీపే సకల్పవృక్షవనే ।
నవమణిమండపమధ్యే మణిమయసింహాసనస్యోర్థం ॥ 19 ॥

మాతంగీం భూషితాంగీం మధుమదముదితాం ఘూర్ణమాణాక్షియుగ్మాం
స్విద్యద్వక్త్రాం కదంబప్రసవపరిలసద్వేణికామాత్తవీణాం ।
బింబోష్ఠీం రక్తవస్త్రాం మృగమదతిలకామిందులేభావతంసాం
కర్ణోద్యచ్చంఖపత్రాం కఠినకుచభరాక్రాంతకాంతావలగ్నాం ॥ 20 ॥

ఉన్మీలద్యౌవనాఢ్యాం నిబిడమదభరోద్వేగలీలావకాశాం
రత్నగ్రైవేయహారాంగదకటకకటీ సూత్రమంజీరభూషాం ।
ఆనీయార్థానభీష్టాన్‌ స్మితమధురదృశా సాధకం తర్పయంతీం
ధ్యాయేద్‌ దేవీం శుకాభాం శుకమభిలకలారూపమస్యాశ్చ పార్శ్వే  ॥ 21 ॥

అమృతోదధిమధ్యేஉత్ర రత్నద్వీపే మనోరమే ।
కదంబబిల్వనిలయే కల్పవృక్షోపశోభితే ॥ 22 ॥

తస్య మధ్యే సుభాస్తీర్ణే రత్నసింహాసనే శుభే ।
త్రికోణకర్ణికామధ్యే తద్బహిః పంచపత్రకం ॥ 23 ॥

అష్టపత్రం మహాపద్మం కేసరాఢ్యం సకర్ణికం ।
తత్పార్శ్వేஉష్టదలం ప్రోక్తం చతుఃపత్రం పునః ప్రియే ॥ 24॥

చతురస్రం చ తద్భాహ్యే ఏవం దేవ్యాసనం భవేత్‌ ।
తస్య మధ్యే సుఖాసీనాం శ్యామవర్ణాం శుచిస్మితాం ॥ 25 ॥

కదంబమాలాపరితః ప్రాంతబద్ధశిరోరుహాం ।
ప్రాలంబాలకసంయుక్తాం చంద్రలేఖావతంసకాం ॥ 26 ॥

లలాటతిలకోపేతాం ఈషత్ప్రహసితాననాం ।
కించిత్స్వేదాంబురచితలలాటఫలకోజ్జ్వలాం ॥ 27 ॥

త్రివలీతరంగమధ్యస్థరోమరాజివిరాజితాం ।
సర్వాలంకారసంయుక్తాం సర్వాభరణభూషణాం ॥ 28 ॥

నూపురై రత్నఖచితైః కటిసూత్రైరలంకృతాం ।
వలయై రత్నరచితైః కేయూరైర్మణిభూషణైః ॥ 29 ॥

భూషితాం ద్విభుజాం బాలాం మదాఘూర్షితలోచనాం ।
వాదయంతీం సదా వీణాం శంఖకుండలభూషణాం ॥ 30॥

ప్రాలంబికర్ణాభరణాం కర్ణోత్తంసవిరాజితాం ।
యౌవనోన్మాదినీం వీరాం రక్తాంశుకపరిగ్రహాం ॥ 31 ॥

తమాలనీలాం తరుణీం మదమత్తాం మతంగినీం ।
చతుఃషష్టికలారూపాం పార్శ్వస్థశుకసారికాం ॥ 32 ॥

మాతంగేశీం మహాదేవీం నిఃశ్వస్యైనాంతరాత్మనా ।
సూర్యకోటిప్రతీకాశాం జపాకుసుమసన్నిభాం ॥ 33 ॥

అథవా పీతవర్ణాం చ శ్యామామేవాపరాం శ్రయే ।
నిష్పాపస్య మనుష్యస్య కిం న సిద్ధ్యతి భూతలే ॥ 34 ॥

కామవచ్చరతే భూమౌ సాక్షాద్‌ వైశ్రవణాయతే ।
గద్యపద్యమయీ వాణీ తస్య వక్త్రాద్‌ వినిర్గతా ॥ 35 ॥

భైరవీ త్రిపురా లక్ష్మీర్వాణీ మాతంగినీతి చ ।
పర్యాయవాచకా హ్యేతే సత్యమేతద్‌ బ్రవీమి తే ॥ 36 ॥

త్రిక-పంచకాష్టయుగలం షోడశకోష్ఠాష్టకం చతుఃషష్టౌ ।
ధ్యాత్వాఙ్గஉదేవతానాం దేవ్యాః పరితో యజేత భావేన ॥ 37 ॥

మాతంగి ! మాతరీశే ! మధుమథనారాధితే ! మహామాయే ! ।
మోహిని ! మోహప్రమథిని ! మన్మథమథనప్రియే నమస్తేஉస్తు ॥ 38 ॥

స్తుతిషు తవ దేవి ! విధిరపి విహితమతిర్భవతి చాప్యవిహితమతిః ।
యద్యపి భక్తిర్మామపి భవతీం స్తోతుం విలోభయతి ॥ 39 ॥

యతిజనహృదయావాసే ! వాసవవంద్యే వరాంగి మాతంగి ! ।
వీణావాద్యవినోద్యైర్నారదగీతే ! నమో దేవి! ॥ 40 ॥

దేవి! ప్రసీద సుందరి పీనస్తని కంబుకంఠి ఘనకేశి! ।
శ్యామాంగి విద్రుమోష్ఠి స్మితముఖి ముగ్ధాక్షి మౌక్తికాభరణే! ॥ 41 ॥

భరణే త్రివిష్టపస్య ప్రభవసి తత ఏవ భైరవీ త్వమసి ।
త్వద్భక్తిలబ్ధవిభవో భవతి క్షుద్రోஉపి భువనపతిః ॥ 42 ॥

పతితః కృపణో మూకోஉప్యంబ! భవత్యాః ప్రసాదలేశేన ।
పూజ్యః సుభగో వాగ్మీ భవతి జడశ్చాపి సర్వజ్ఞః ॥ 43 ॥

జ్ఞానాత్మకే జగన్మయి నిరంజనే నిత్యశుద్దపదే! ।
నిర్వాణరూపిణి పరే త్రిపురే! శరణం ప్రపన్నస్త్వాం ॥ 44 ॥

త్వాం మనసి క్షణమపి యో ధ్యాయతి ముక్తావృతాం శ్యామాం ।
తస్య జగత్త్రితయేஉస్మిన్‌ కాస్తా యా న స్త్రియః సాధ్యాః॥ 45 ॥

సాధ్యాక్షరగర్భితపంచనవత్యక్షరాత్మికే జగన్మాతః!  ।
భగవతి మాతంగేశ్వరి ! నమోஉస్తు తుభ్యం మహాదేవి ॥ 46 ॥

విద్యాధరసురకిన్నరగుహ్యకగంధర్వసిద్ధయక్షవరైః ।
ఆరాధితే ! నమసేஉస్తు ప్రసీద కృపయైవ మాతంగి! ॥ 47॥

మాతంగీస్తుతిరియమన్వహం ప్రజప్తా
జంతూనాం వితరతి కౌశలం క్రియాసు ।
వాగ్మిత్వం శ్రియమధికాం చ మానశక్తిం
సౌభాగ్యం నృపతిభిరర్చనీయతాం స యాతి॥ 48॥

మాతంగీమనుదినమేవమర్చయంతః
శ్రీమంతః సుభగతరాః కవిత్వభాజః  ।
ప్రాప్యాంతే సకలసమీహితార్థవర్గం
దేహాంతే విమలతరం విశంతి ధామ ॥ 49 ॥

అవటుతటఘటితచోలీం తాడితతాడీం పలాశతాటంకాం ।
వీణావాదనవేలాకంపితశిరసం నమామి మాతంగీం ॥ 50 ॥

వీణావాదననిరతం తదలాబుస్థగితవామకృతకుచం  ।
శ్యామలకోమలగాత్రం పాటలనయనం పరం భజే ధామ ॥ 51 ॥

అంకితపాణిచతుష్టయమంకుశపాశేక్షుపుప్పచాపశరైః  ।
శంకరజీవితమిత్రం పంకజనయనం పరం భజే ధామ ॥ 52 ॥

కరకలితకనకవీణాలాబుకకదలీకృతైకకుచకమలా  ।
జయతి జగదేకమాతా మాతంగీ మంగలాయతనా ॥ 53 ॥

అంగలాలితమనంగవిద్విషస్తుంగపీనకుచభారభంగురం  ।
శ్యామలం శశినిభాననం భజే కోమలం కుటిలకుంతలం మహః ॥ 54 ॥

వీణావాద్యవినోదగీతనిరతాం లీలాశుకోల్లాసినీం
బింబోష్ఠీం నవయావకార్ద్రచరణామాకీర్ణకేశాలకాం  ।
హృద్యాంగీం సితశంఖకుండలధరాలంకారవేషో జ్వలాం
మాతంగీం ప్రణతోஉస్మి సుస్మితముఖీం దేవీం శుకశ్యామలాం ॥ 55 ॥

వేణీమూలవిరాజితేందుశకలాం వీణానినాదప్రియాం
క్షోణీపాలసురేంద్రపన్నగగణైరారాధితాంహ్రిద్వయాం ।
ఏణీచంచలలోచనాం సువదనాం వాణీం పురాణోజ్జ్వలాం
శ్రోణీభారభరాలసామనిమిషాం పశ్యామి విశ్వేశ్వరీం ॥ 56॥

కుచకలశనిషణ్ణకేలివీణాం
కలమధురధ్వనికంపితోత్తమాంగీం  ।
మరకతమణిభంగమేచకాభాం
మదనవిరోధిమనస్వినీముపాసే ॥ 57 ॥

తాడీదలోల్లసితకోమలకర్ణపాలీం
కేశావలీకలితదీర్ఘసునీలవేణీం ।
వక్షోజపీఠనిహితోజ్జ్వలనాదవీణాం
వాణీం నమామి మదిరారుణనేత్రయుగ్మాం ॥ 58 ॥

యామామనంతి మునయః ప్రకృతిం పురాణీం
విద్యేతి యాం శ్రుతిరహస్యవిదో గృణంతి  ।
తామర్థపల్లవితశంకరరూపముద్రాం
దేవీమనన్యశరణః శరణం ప్రపద్యే ॥ 59 ॥

యః స్ఫాటి కాక్షవరపుస్తకకుండికాఢ్యాం
వ్యాఖ్యాసముద్యతకరాం శరదిందుశుభ్రాం ।
పద్మాసనాం చ హృదయే భవతీముపాస్తే
మాతః! స విశ్వకవితార్కికచక్రవర్తీ ॥ 60 ॥

బర్హానతంసఘనబంధురకేశపాశాం
గుంజావలీకృతఘనస్తనహారశోభాం ।
శ్యామాం ప్రవాలవసనాం శరచాపహస్తాం
తామేవ నౌమి శబరీం శబరస్య నాథాం ॥ 61 ॥

అజ్ఞాతసంభవమనాకలితాన్వవాయం
భిక్షుం కపాలినమవాససమద్వితీయం  ।
పూర్వం కరగ్రహణమంగలతో భవత్యాః
శంభుః క ఏవ బుబుధే గిరిరాజకన్యే! ॥ 62 ॥

చర్మాంబరం చ శవభస్మవిలేపనం చ
భిక్షాటనం చ నటనం చ పరేతభూమౌ ।
వేతాలసంహతిపరిగ్రహతాం చ శంభోః
శోభాం వహంతి గిరిజే ! తవ సాహచర్యాత్‌ ॥ 63॥

గలే గుంజాబీజావలిమపి చ కర్ణే శిఖిశిఖాం
శిరో రంగే నృత్యత్కనకకదలీమంజులదలం  ।
ధనుర్వామే చాంసే శరమపరపాణౌ చ దధతీం
నితంబే బర్హాలీం కుటిలకబరీం సిద్ధశబరీం ॥ 64 ॥

లసద్గుంజాపుంజాభరణకిరణారక్తనయనాం
జపాకర్ణాభూషాం శిఖివరకలాపాంబరవతీం ।
నదజిల్లీపల్లీవన తరుదలైః సంపరివృతాం-
నమామి వామోరుం కుటిలకబరీం సిద్ధశబరీం ॥ 65 ॥

అపర్జాహోపర్ణాం సిరసకదలీసంభవమలం
భవం జేతుం ప్రౌఢిం కిల మనసి బాలా విదధతీ ।
నదజిల్లీపల్లీవనతరుషు హల్లీసకరుచి-
ర్లసత్పల్లీభిల్లీ కరకలితభల్లీ విజయతే ॥ 66 ॥

ధనినామవినాభవన్మదానాం
భవనద్వారి దురాశయా శయానాం ।
అవలోకయ మామగేంద్రకన్యే!
కరుణాకందలితైః కటాక్షమోక్షైః ॥ 67 ॥

కువలయదలనీలం బర్బరస్నిగ్ధకేశం
పృథుతరకుచభారాక్రాంతకాంతావలగ్నం  ।
కిమితి బహుభిరుక్తైస్త్వత్స్వరూపం పదం నః
సకలజనని మాతః ! సంతతం సన్నిధత్తాం ॥ 68 ॥

మిథః కేశాకేశి ప్రధననిధనాస్తర్కఘటనా
బహుశ్రద్ధాభక్తిప్రణతివిషయాశ్చాప్తవిధయః ।
ప్రసీద ప్రత్యక్షీభవ గిరిసుతే! దేహి శరణం
నిరాలంబే ! చేతః పరిలుఠతి పారిప్లవమిదం ॥ 69 ॥

లసద్గుంజాహారస్తనభరనమన్మధ్యలతికా -
ముదంచద్ఘర్మాంభఃకణగుణితవక్త్రాంబుజరుచం  ।
శివం పార్థత్రాణప్రణవమృగయాకారకరణం
శివామన్వక్యాంతీం శరణమహమన్వేమి శబరీం ॥ 70॥

శిరసి ధనురటన్యా తాడ్యమానస్య శంభో-
రలక-నయన-కోణే కించిదాలజ్యమానే  ।
ఉపనిషదుపగీతం రుద్రముద్ఘోషయంతీ
పరిహరతి మృడానీ మధ్యమం పాండవానాం ॥ 71 ॥

యద్గలాభరణతంతువైభవాన్‌
నాయకో గరలమాగలం పపా ।
తాం చరాచరగురోః కుటుంబినీం
నౌమి యౌవనభరేణ లాలసాం ॥ 72 ॥

సుధామప్యాస్వాద్య ప్రతిభయహరా మృత్యుహరణీం
విపద్యంతే సర్వే విధి-శతమఖాద్యా దివిషదః ।
కరాలం యత్‌ క్ష్వేడం కవలితవతః కాలకలనా
న శంభోస్తన్మూలం జనని ! తవ తాటంకమహిమా ॥ 73 ॥

కరోపాంతే కాంతే వితరణినిశాంతే విదధతీం
లసద్వీణాశోణాం నఖరుచిభిరేణాంకవదనాం ।
సదా వందే సందేతరురుహవశందేశకవశాత్‌
కృపాలంబామంబాం కుసుమితకదంబాంగణగృహాం ॥ 74 ॥

కర్ణలంబితకదంబమంజరీకేసరారుణకపోలమండలం  ।
కేవలం నిగమవాదగోచరం నీలిమానమవలోకయామహే ॥ 75 ॥

అకృశం కుచయోః కృశం విలగ్నే
విపులం చక్షుషి విస్తృతం నితంబే ।
అరుణాధరమావిరస్తు చిత్తే
కరుణాశాలికపాలిభాగధేయం ॥ 76 ॥

అనభంగురకేశపాశమంబ! ప్రభయా కీచకమేచకం వపుస్తే  ।
పరితః పరితో విలోకయామః ప్రతిపచ్చంద్రకలాధిరూఢచూడం ॥ 77 ॥

ధ్యాయేయం రత్నపీఠే శుకకలపఠితం శృణ్వతీం శ్యామగాత్రీం
న్యస్తైకాంఘ్రీసరోజే శశిశకలధరాం వల్లకీం వాదయంతీం ।
కహ్లారాబద్ధభాలాం నియమితవిలసచ్చూలికాం రక్తవస్త్రాం
మాతంగీం శంఖపత్రాం మధుమదవివశాం చిత్రకోద్భాసిభాలాం ॥ 78 ॥

ఆరాధ్య మాతశ్చరణాంబుజం తే బ్రహ్మాదయో విశ్రుతకీర్తిమాపుః ।
అన్యే పరం వాగ్విభవం మునీంద్రాః పరాం శ్రియం భక్తిభరేణ చాన్యే ॥ 79 ॥

నమామి దేవీం నవచంద్రమౌలిం మాతంగినీం చంద్రకలావతంసాం ।
ఆమ్నాయవాగ్భిః ప్రతిపాదితార్థం ప్రబోధయంతీం శుకమాదరేణ ॥ 80 ॥

వినమ్రదేవాసురమౌలిరత్నైర్నీరాజితం తే చరణారవిందం ।
భజంతి యే దేవి ! మహీపతీనాం పరాం శ్రియం భక్తిముపాశ్రయంతి ॥ 81 ॥

మాతంగి! లీలాగమనే ! భవత్యాః సంజాతమంజీరమిషాద్‌ భజంతే ।
మాతస్త్వదీయం చరణారవిందం అకృత్రిమాణాం వచసాం విగుంఫాః ॥ 82 ॥

పదాత్పదం సింజితనూపురాభ్యాం కృతార్థయంతీ పదవీం పదాభ్యాం  ।
అస్ఫాలయంతీ కలవల్లకీం తాం మాతంగినీ మే హృదయం ధినోతు ॥ 83 ॥

లీలాంశుకాబద్ధనితంబబింబాం తాడీదలేనార్పితకర్ణభూషాం ।
మాధ్వీమదాఘూర్ణితనేత్రపద్మాం ఘనస్తనీం శంభువధూం స్మరామి ॥ 84 ॥

తడిల్లతాకాంతమలబ్ధభూషం, చిరేణ లక్ష్యం నవరోమరాజ్యా ।
స్మరామి భక్త్యా జగతామధీశి ! వలిత్రయాంకం తవ మధ్యమంబ! ॥ 85 ॥

నీలోత్పలానాం శ్రియమాహరంతీం కాంత్యాః కటాక్షైః కమలాకరాణాం।
కదంబమాలాంచితకేశపాశాం మాతంగకన్యాం హృది భావయామి ॥ 86 ॥

ధ్యాయేయమారక్తకపోలకాంతం బింబాధరం న్యస్తలలాటరమ్యం ।
ఆలోలలీలాయితమాయతాక్షం మందస్మితం తే వదనం మహేశి! ॥ 87॥

వామస్తనాసంగసఖీం విపంచీం ఉద్ఘాటయంతీమరుణాంగులీభిః ।
తదుత్ధసౌభాగ్యవిలోలమౌలిం శ్యామాం భజే యౌవనభారభీన్నాం ॥ 88 ॥

స్తుత్యానయా శంకర-ధర్మపత్నీం మాతంగినీం వాగధిదేవతాం తాం ।
స్తువంతి యే భక్తియుతా మనుష్యాః పరాం శ్రియం భక్తిముపాశ్రయంతి ॥ 89 ॥

గేహం నాకతి గర్వితః ప్రణమతి స్త్రీసంగమో మోక్షతి
మృత్యుర్వైద్యతి దూషణం చ గుణతి క్ష్మావల్లభో దాసతి ।
వజ్రం పుష్పతి పన్నగోஉబ్జనలతి హాలాహలం భుజ్యతి
ద్వేషీ మిత్రతి పాతకం సుకృతతి త్వత్పాదసంచింతనాత్‌ ॥ 90॥

ఏహ్యేహి మాతస్త్రిపురే పవిత్రే ! యంత్రాంతరే త్వం వసతిం విధేహి  ।
గృహ్ణాస్వ గృహ్ణాస్వ బలిం ప్రపూజాం త్రికోణషట్కోణదలஉష్టకుండే ॥ 91 ॥

ఏహ్యేహి మాతస్త్రిపురే మదీయే నేత్రే నివాసం కురు మంజునేత్రే ।
భూతాత్మకం విశ్వమిదం నరస్య మే దర్శయ త్వం తవ చిత్స్వరూపం ॥ 92 ॥

ఏహ్యేహి మాతస్త్రిపురే మదీయే వక్త్రే నివాసం కురు చంద్రవక్త్రి ! ।
పరాపవాదం వచనం నరస్య వాగీశ్వరం మే వదతాం కురుష్వ ॥ 93 ॥

ఏహ్యేహి మాతస్త్రిపురే మదీయే చిత్తే నివాసం కురు కల్పవల్లి ! ।
వేగేన జాడ్యాది తమో నిరస్య విధేహి దీప్తం తవ చిత్స్వరూపం ॥ 94 ॥

అనేన స్తోత్రపాఠేన సర్వపాపహరేణ వై  ।
ప్రీయతాం పరమా శక్తిర్మాతంగీ సర్వకామదా ॥ 95 ॥

॥ ఇత్యాగమసారే ఉమాసహాచార్యవిరచితం శ్రీమాతంగీస్తోత్రం సంపూర్ణం ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Sri Matangi Devi Sthotram 3 - శ్రీ మాతంగి దేవి స్తోత్రం 3

శ్రీ మాతంగీ దేవి స్తోత్రమ్‌-3

నమామి వరదాం దేవీం సుముఖీం సర్వసిద్ధిదాం ।
సూర్యకోటి నిభాం దేవీం వహ్నిరూపాం వ్యవస్థితాం ॥ 01 ॥

రక్తవస్త్ర నితంబాం చ రక్తమాల్యోపశోభితాం ।
గుంజాహారస్తనాఢ్యాంతాం పరంజ్యోతిస్వరూపిణీం ॥ 02 ॥

మారణం మోహనం వశ్యం స్తంభనాకర్ష దాయినీ ।
ముండ కర్త్రిం శరావామాం పరంజ్యోతిస్వరూపిణీం ॥ 03 ॥

స్వయంభుకుసుమ ప్రీతాం ఋతుయోనినివాసినీం ।
శవస్థాం స్మేరవదనాం పరంజ్యోతిస్వరూపిణీం ॥ 04 ॥

రజస్వలా భవేన్నిత్యం పూజేష్టఫలదాయినీ ।
మద్యప్రియం రతిమయీం పరంజ్యోతిస్వరూపిణీం ॥ 05 ॥

శివవిష్ణువిరంచీనాం సాద్యాం బుద్ధిప్రదాయినీం ।
అసాధ్యం సాధినీం నిత్యాం పరంజ్యోతిస్వరూపిణీం ॥ 06 ॥

రాత్రౌ పూజా బలియుతాం గోమాంస రుధిరప్రియాం ।
నానాஉలంకారిణీం రౌద్రీం పిశాచగణసేవితాం ॥ 07 ॥

ఇత్యష్టకం పఠేద్యస్తు ధ్యానరూపాం ప్రసన్నధీః ।
శివరాత్రౌ వ్రతేరాత్రౌ వారూణీ దివసేஉపివా ॥ 08 ॥

పౌర్ణమాస్యామమావస్యాం శనిభౌమదినే తథా ।
సతతం వా పఠేద్యస్తు తస్య సిద్ధి పదే పదే ॥ 09 ॥

॥ ఇతి ఏకజటా కల్పలతికా శివదీక్షాయాంతర్గతం 

మాతంగీ స్తోత్రం సంపూర్ణం ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Sri Matangi Devi Sthotram 2 - శ్రీ మాతంగి దేవి స్తోత్రం 2

శ్రీ మాతంగీ దేవి స్తోత్రమ్‌-2

మాతంగీం మధుపానమత్తనయనాం మాతంగ సంచారిణీం
కుంభీకుంభవివృత్తపీవరకుచాం కుంభాదిపాత్రాంచితాం ।
ధ్యాయేஉహం మధుమారణకసహజాం ధ్యాతుస్సుపుత్రప్రదాం
శర్వాణీం సురసిద్ధసాధ్యవనితా సంసేవితా పాదుకాం ॥ 01॥

మాతంగీ మహిషాదిరాక్షసకృతధ్వాంతైకదీపో మణీిః
మన్వాదిస్తుత మంత్రరాజవిలసత్సద్భక్త చింతామణిః ।
శ్రీమత్కౌలికదానహాస్యరచనా చాతుర్య రాకామణిః
దేవిత్వం హృదయే వసాద్యమహిమే మద్భాగ్య రక్షామణిః ॥ 02॥

జయదేవి విశాలాక్షి జయ సర్వేశ్వరి జయ ।
జయాంజనగిరిప్రఖ్యే మహాదేవ ప్రియంకరి ॥ 03॥॥

మహావిశ్వేశ దయితే జయ బ్రహ్మాది పూజితే ।
పుష్పాంజలిం ప్రదాస్యామి గృహాణ కులనాయికే ॥ 04 ॥

జయమాతర్మహాకృష్టే జయ నీలోత్పలప్రభే ।
మనోహారి నమస్తేஉస్తు నమస్తుభ్యం వశంకరి ॥ 05॥

జయ సౌభాగ్యదే నణాం లోకమోహిని తే నమః ।
సర్వైశ్వర్యప్రదే పుంసాం సర్వవిద్యాప్రదే నమః ॥ 06 ॥

సర్వాపదాం నాశకరీం సర్వదారిద్రయనాశినీం ।
నమో మాతంగతనయే నమశ్చాండాలి కామదే ॥ 07 ॥

నీలాంబరే నమస్తుభ్యం నీలాలకసమన్నితే ।
నమస్తుభ్యం మహావాణి మహాలక్ష్మి నమోస్తుతే ॥ 08 ॥

మహామాతంగి పాదాబ్జం తవ నిత్యం నమామ్యహం ।
ఏతదుక్తం మహాదేవ్యా మాతంగయాః స్తోత్రముత్తమం ॥ 09 ॥

సర్వకామప్రదం నిత్యం యః పఠేన్మానవోత్తమః ।
విముక్తస్సకలైః పాపైః సమగ్రం పుణ్యమశ్నుతే ॥ 10 ॥

రాజానో దాసతాం యాంతి నార్యో దాసీత్వమాప్పుయుః ।
దాసీభూతం జగత్సర్వం శీఘ్రం తస్య భవేద్‌ ద్రువం॥ 11॥

మహాకవీభవేద్వాగ్భిః సాక్షాద్‌ వాగీశ్వరో భవేత్‌ ।
అచలాం శ్రియమాప్నోతి అణిమాద్యష్టకం లభేత్‌ ॥ 12 ॥

లభేన్మనోరథాన్‌ సర్వాన్‌ త్రైలోక్యే నాపి దుర్లభాన్‌ ।
అంతే శివత్వమాప్నోతి నాత్ర కార్యా విచారణా ॥ 13 ॥

॥ శ్రీరాజమాతంగీ పాదుకార్పణమస్తు ॥

॥ ఇతి శ్రీమాతంగీస్తోత్రం సంపూర్ణం ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Sri Matangi Devi Sthotram - శ్రీ మాతంగి దేవి స్తోత్రం

శ్రీ మాతంగి దేవి స్తోత్రం

ఈశ్వర ఉవాచ:
ఆరాధ్య మాతశ్చరణాంబుజే తే బ్రహ్మాదయో విస్తృత కీర్తిమాయుః
అన్యే పరం వా విభవంమునీంద్రాః పరాంశ్రియం భక్తి పరేణ చాన్యే ॥ 01 ॥

నమామిదేవీం నవచంద్రమౌళే ర్మాతంగినీ చంద్రకళావతంసాం
ఆమ్నాయప్రాప్తి ప్రతిపాదితార్థం ప్రబోధయంతీం ప్రియమాదరేణ ॥ 02 ॥

వినమ్రదేవ స్థిరమౌళిరత్నైః విరాజితం తే చరణారవిందం
అకృత్రిమాణం వచసాం విశుక్లం పదాం పదం శిక్షితనూపురాభ్యామ్‌ ॥ 03 ॥

కృతార్థయంతీం పదవీం పదాభ్యామాస్ఫాలయంతీం కలవల్లకీంతాం
మాతంగినీం సద్దృదయాం ధినోమి లీలాంశుకాం శుద్ధనితంబబింబామ్‌ ॥ 04 ॥

తాలీదళేనార్చితకర్ణభూషాం మాధ్వీమదోద్ఘూర్ణితనేత్రపద్మాం
ఘనస్తనీం శంభువధూం నమామి తటిల్లతాకాంతి మనర్ఘ్యభూషామ్‌ ॥ 05 ॥

చిరేణ లక్ష్మ్యానవరోమరాజ్యా స్మరామి భక్త్యా జగతామధీశే
వలిత్రయాఢ్యం తవ మధ్యమంబ నీలోత్పలాం శుశ్రియమావహంతమ్‌ ॥ 06 ॥

కాంత్యా కటాక్షైః కమలాకరాణాం కదంబమాలాంచిత కేశపాశం
మాతంగకన్యే హృది భావయామి ధ్యాయేహమారక్తకపోలబింబమ్‌ ॥ 07 ॥

బింబాధరం న్యస్తలలామరమ్య మాలోలలీలాలకమాయతాక్షం
మందస్మితం తే వదనం మహేశి స్తువేన్వహం శంకరధర్మపత్నీ ॥ 08 ॥

మాతంగినీం వాగధిదేవతాం తాం స్తువంతి యే భక్తియుతా మనుష్యాః
పరాం శ్రియం నిత్యముపాశ్రయంతి పరత్రకైలాసతలే వసంతి ॥ 09 ॥

ఉద్యద్భాను మరీచివీచి విలసద్వాసో వసానాం పరాం

గౌరీంసంగతి పానకర్పర కరాం ఆనంద కందోద్భవాం ॥ 10 ॥

గుంజాహారాలసత్ విహార హృదయాం ఆపీన తుంగస్తనీం

మందస్మేర ముఖీం నమామి సుముఖీం శావాసనామ్ సేదుషీమ్  ॥ 11 ॥

మాత్ర్భైరవి భద్రకాళి విజయే వారాహి విశ్వాశ్రయే

శ్రీవిద్యే సమయే మహేషి బగళే కామాక్షి వామాంగమే  ॥ 12 ॥

మాతంగి త్రిపురే పరాత్పర తరే స్వర్గాపవర్గప్రదే 

దాసోహం శరణాగతః కరుణయా విశ్వేశ్వరీ త్రాహిమాం  ॥ 13 ॥

॥ ఇతి శ్రీ రుద్రయామళే శ్రీ మాతంగీ స్తోత్రమ్‌ సమాప్తం ॥

శ్రీ మాతంగి మహా విద్యా

దశ మహా విద్యలు

నిత్య స్తోత్రావళి

పంచాంగం

Sri Baglamukhi Sahasra Nama Sthotram - శ్రీ బగళాముఖీ సహస్రనామ సోత్రం

శ్రీ బగళాముఖీ సహస్రనామ సోత్రం

సురాలయప్రధానే తు దేవదేవం మహేశ్వరమ్‌ ।
శైలాధిరాజతనయా సంగ్రహే తమువా చ హ ॥ 01 ॥

శ్రీదేవ్యువాచ:
పరమేష్ఠిన్‌ పరంధామ ప్రధాన పరమేశ్వర ।
నామ్నాం సహస్రం బగళా ముఖ్యాద్య బ్రూహివల్లభ ॥ 02 ॥

ఈశ్వర ఉవాచ :
శ్రుణు దేవి ప్రవక్ష్యామి నామధేయ సహగస్రకమ్‌ ।
పరబ్రహ్మాస్త్ర విద్యాయాశ్చతుర్వర్గ ఫలప్రదమ్‌ ॥ 03 ॥

గుహ్యద్గుహ్యతరం దేవి సర్వసిద్దైక వందితమ్‌ ।
అతిగుప్తతరం విద్యా సర్వతంత్రేషు గోపితా ॥ 04 ॥

విశేషతః కలియుగే మహాసిద్ధ్యౌఘదాయినీ ।
గోపనీయం గోపనీయం గోపనీయం ప్రయత్నతః ॥ 05 ॥

అప్రకాశ్య మిదం సత్యం స్వయోనిరివ సువ్రతే ।
రోధినీ విఘ్న సంఘానాం మోహినీ పరయోషితాం ॥ 06 ॥

స్తంభినీ రాజసైన్యానాం వాదినీ పరవాదినాం ।
పురా చైకార్ణవే ఘోరే కాలేపరమభైరవః ॥ 07 ॥

సుందరీ సహితో దేవః కేశవః క్లేశనాశనః ।
ఉరగాసన మాసినో యోగనిద్రా ముపాగమత్‌ ॥ 08 ॥

నిద్రాకాలే చ తే కాలే మయా ప్రోక్తః సనాతనః ।
మహాస్తంభకరం దేవి సోత్రం వా శతనామకం ॥ 09 ॥

సహస్రనామ పరమం వదదేవస్యకస్య చిత్‌ ।

శ్రీ భగవానువాచ:
శ్రుణుశంకర దేవేశ పరమాతి రహస్యకం ॥ 10 ॥

అజోஉహం యత్ప్రసాదేన విష్ణుః సర్వేశ్వరేశ్వరః ।
గోపనీయం ప్రయత్నేన ప్రకాశాత్సిద్ధి హానికృత్‌ ॥ 11 ॥

ఓం అస్యశ్రీ పీతాంబరీ సహస్రనామ స్తోత్ర మంత్రస్య
భగవాన్‌ సదాశివ ఋషిః అనుష్టుచ్చందః
శ్రీ జగద్వశ్యకరీ పీతాంబరీ దేవతా సర్వాభీష్ట సిద్ధర్థే జపే వినియోగః ॥

ధ్యానం :
పీతాంబరపరీధానాం పీనోన్నతపయోధరాం ।
జటాముకుట శోభాఢ్యాం పీతభూమి సుఖాసనాం ॥ 12 ॥

శత్రోర్జిహ్వాం ముద్గరం చ బిభ్రతీం పరమాం కళాం ।
సర్వాగమపురాణేషు విఖ్యాతాం భువనత్రయే ॥ 13 ॥

సృష్టిస్థితి వినాశానా మాదిభూతాం మహేశ్వరీం ।
గోప్యాం సర్వప్రయత్నేన శ్రుణుతాం కథయామితే ॥ 14 ॥

జగద్విధ్వంసినీం దేవీం అజరామరకారిణీం ।
తాం నమామి మహామాయాం మహదైశ్వర్య దాయినీం ॥ 15 ॥

ప్రణవం పూర్వముధృత్య స్థిర మాయాం తతో వదేత్‌ ।
బగళాముఖీ సర్వేతీ దుష్టానాం వాచమేవ చ ॥ 16 ॥

ముఖం పదం స్తంభయేతి జిహ్వాం కీలయ బుద్ధిమత్‌ ।
వినాశయేతి తారం చ స్థిర మాయాం తతోవదేత్‌ ॥ 17 ॥

వహ్నిప్రియం తతో మంత్రశ్చతుర్వర్గ ఫలప్రదః ।
బ్రహ్మాస్త్రం బ్రహ్మవిద్యా చ బ్రహ్మమాతా సనాతనీ ॥ 18 ॥

బ్రహ్మేశీ బ్రహ్మకైవల్య బగళా బ్రహ్మచారిణీ ।
నిత్యానందా నిత్యసిద్ధా నిత్యరూపా నిరామయా ॥ 19 ॥

సంధారిణీ మహామాయా కటాక్షక్షేమకారిణీ ।
కమలా విమలా నీలా రత్నకాంతిః గుణాశ్రితా ॥ 20 ॥

కామప్రియా కామరతా కామకామ స్వరూపిణీ ।
మంగళా విజయా జాయా సర్వమంగళ కారిణీ ॥ 21 ॥

కామినీ కామినీ కావ్యా కాముకా కామచారిణీ ।
కామప్రియా కామరతా కామాకామ స్వరూపిణీ ॥ 22 ॥

కామాఖ్యా కామబీజస్థా కామపీఠ నివాసినీ ।
కామదా కామహాకాళీ కపాలీ చ కరాళికా ॥ 23 ॥

కంసారీః కమలా కామా కైలాసేశ్వర వల్లభా ।
కాత్యాయనీ కేశవా చ కరుణా కామకేళి భుక్‌ ॥ 24 ॥

క్రియాకీర్తిః కృత్తికా చ కాశికా మధురా శివా ।
కాలాక్షీ కాళికా కాళీ ధవళాననసుందరీ ॥ 25 ॥

ఖచరీ చ ఖమూర్తిశ్చ క్షుద్రా క్షుద్రక్షుధావరా ।
ఖడ్గహస్తా ఖడ్గరతా ఖడ్గినీ ఖర్చరప్రియా ॥ 26 ॥

గంగా గౌరీ గామినీ చ గీతా గోత్ర వివర్ధినీ ।
గోధరా గోకరా గోధా గంధర్వ పురవాసినీ ॥ 27 ॥

గంధర్వా గంధర్వ కలా గోపనీ గరుడాసనా ।
గోవింద భావాగోవిందా గాంధారీ గంధమాదినీ ॥ 28 ॥

గౌరాంగీ గోపికా మూర్తిః గోపీ గోష్ఠ నివాసినీ ।
గంధాగజేంద్రగా మాన్యా గదాధరప్రియా గ్రహా ॥ 29 ॥

ఘోర ఘోరా ఘోరరూపా ఘనశ్రేణీ ఘనప్రభా ।
దైత్యేంద్రా ప్రబలా ఘంటావాదినీ ఘోర నిస్వనా ॥ 30 ॥

డాకిన్యుమా ఉపేంద్రా చ ఊర్వశీ ఉరగాసనా ।
ఉత్తమా ఉన్నతా ఉన్నా ఉత్తమస్థానవాసినీ ॥ 31 ॥

చాముండా ముండితా చండీచండ దర్పహరేతి చ ।
ఉగ్ర చండా చండచండా చండదైత్య వినాశినీ ॥ 32 ॥

చండరూపా ప్రచండా చ చండా చండ శరీరిణీ ।
చతుర్భుజా ప్రచండా చ చరాచర నివాసినీ ॥ 33 ॥

క్షత్రప్రాయశ్శిరోవాహా ఛలాచల తరా ఛలీ ।
క్షత్రరూపా క్షత్రధరా క్షత్రియ క్షయకారిణీ ॥ 34 ॥

జయా చ జయదుర్గా చ జయంతీజయదా పరా ।
జాయినీ జాయినీ జ్యోత్స్నా జటాధర ప్రియాజితా ॥ 35 ॥

జితేంద్రియా జిత క్రోధా జయమానా జనేశ్వరీ ।
జితమృత్యుర్జరాతీతా జాహ్నవీ జనకాత్మజా ॥ 36 ॥

ఝంకారా ఝంఝురీ ఝుంటా ఝుంకారీ ఝకశోభినీ ।
ఝఖా ఝమేశా ఝంకారీ యోనికల్యాణ దాయినీ ॥ 37 ॥

ఝంఝురా ఝమురీ ఝారా ఝరా ఝరతరా పరా ।
ఝంఝా ఝమేతా ఝంకారీ ఝణా కల్యాణదాయినీ ॥ 38 ॥

ఈమనా మానసీ చింత్యా ఈమునా శంకరప్రియా ।
టంకారీ టిటికా టీకా టంకినీ చ టవర్గగా ॥ 39 ॥

టపాటోపా టటపతిష్టమనీ టమనప్రియా ।
ఠకారధారిణీ ఠీకా ఠంకరీ ఠికరప్రియా ॥ 40 ॥

ఠేకఠాసాఠ కరతీ ఠామినీ ఠమనప్రియా ।
డారహా డాకినీ డారా డామరా డమర ప్రియా ॥ 41 ॥

ఢాకినీ డడయుక్తా చ డమరూకర వల్లభా ।
ఢక్కా ఢక్కీ ఢక్కనాదా ఢోలశబ్ద ప్రబోధినీ ॥ 42 ॥

ఢామినీ ఢామన ప్రీతా డగతంత్ర ప్రకాశినీ ।
అనేక రూపిణీ అంబా అణిమాసిద్ధి దాయినీ ॥ 43 ॥

అమంత్రిణీ అణుకరీ అణుమద్భానుసంస్థితా ।
తారా తంత్రవతీ తంత్రా తత్వరూపా తపస్వినీ ॥ 44 ॥

తరంగిణీ తత్వపరా తంత్రికా తంత్ర విగ్రహా ।
తపోరూపా తత్వదాత్రీ తపఃప్రీతి ప్రఘర్షిణీ ॥ 45 ॥

తంత్ర యంత్రార్చనపరా తలాతల నివాసినీ ।
తల్పదా త్వల్పదా కామ్యా స్థిరాస్థిర తరాస్థితః ॥ 46 ॥

స్థాణుప్రియా స్థపరాస్థిలతా స్థాన ప్రదాయినీ ।
దిగంబరా దయారూపా దావాగ్ని దమనీ దమా ॥ 47 ॥

దుర్గా దుర్గపరా దేవీ దుష్టదైత్య వినాశినీ ।
దమన ప్రమదా దైత్య దయాదాన పరాయణా ॥ 48 ॥

దుర్గార్తినాశినీ దాంతా దంభినీ దంభవర్జితా ।
దిగంబరా ప్రియా దంభా దైత్యదంభవిదారిణీ ॥ 49 ॥

దమనా దశనసౌందర్యా దానవేంద్ర వినాశినీ ।
దయాధరా చ దమనీ దర్భపత్ర విలాసినీ ॥ 50 ॥

ధారిణీ ధరిణీ ధాత్రీ ధరాధర ధరప్రియా ।
ధరాధరసుతా దేవీ సుధర్మా ధర్మచారిణీ ॥ 51 ॥

ధర్మజ్ఞా ధవళాధూలాధన దాధన వర్ధినీ I
ధీరాధీరా ధీరతరా ధీరసిద్ధి ప్రదాయినీ ॥ 52 ॥

ధన్వంతరీధరా ధీరా ధ్యేయా ధ్యాన స్వరూపిణీ ।
నారాయణీ నారసింహీ నిత్యానంద నరోత్తమా ॥ 53 ॥

నక్తా నక్తవతీ నిత్యా నీలజీమూతసన్నిభా ।
నీలాంగీ నీలవస్త్రా చ నీలపర్వత వాసినీ ॥ 54 ॥

సునీలపుష్పఖచితా నీలజంబూ సమప్రభా ।
నిత్యాఖ్యా షోడశీ విద్యా నిత్యానిత్య సుఖావహా ॥ 55 ॥

నర్మదా నందనానందా నందానంద వివర్ధినీ ।
యశోదా నంద తనయా నందనోద్యాన వాసినీ ॥ 56 ॥

నాగాంతకా నాగవృద్దా నాగపత్నీ చ నాగినీ ।
నమితాశేష జనతా నమస్మార వతీ నమః ॥ 57 ॥

పీతాంబరా పార్వతీ చ పీతాంబర విభూషితా ।
పీతామాల్యాంబరధరా పీతాభా పింగమూర్ధజా ॥ 58 ॥

పీతపుష్పార్చనరతా పీత పుష్ప సమర్చితా ।
పరప్రభా పితృపతిః పరసైన్య వినాశినీ ॥ 59 ॥

పరమా పరతంత్రా చ పరమంత్రా పరాపరా ।
పరావిద్యా పరాసిద్ధిః పరాస్థాన ప్రదాయినీ ॥ 60 ॥

పుష్పాపుష్పవతీ నిత్యా పుష్పమాలా విభూషితా ।
పురాతనా పూర్వపరా పరసిద్ధి ప్రదాయినీ ॥ 61 ॥

పీతా నితంబినీ పీతా పీనోన్నత పయస్వినీ ।
ప్రేమా ప్రమధ్యమా శేషా పద్మ పత్ర విలాసినీ ॥ 62 ॥

పద్మావతీ పద్మనేత్రా పద్మా పద్మముఖీ పరా ।
పద్మాసనా పద్మప్రియా పద్మరాగ స్వరూపిణీ ॥ 63 ॥

పావనీ పాలికా పాత్రీ పరదా వరదా శివా ।
ప్రేతసంస్థా పరానందా పరబ్రహ్మ స్వరూపిణీ ॥ 64 ॥

జినేశ్వర ప్రియదేవి పశురక్తరత ప్రియా ।
పశుమాంస ప్రియాపర్ణా పరామృతపరాయణా ॥ 65 ॥

పాశినీ పాశికా చాపి పశుఘ్నీ పశుభాషిణీ ।
పుల్లారవిందవదనీ పుల్లోత్పల శరీరిణీ ॥ 66 ॥

పరానంద ప్రదా వీణా పశుపాశవినాశినీ ।
పుత్కారా పుత్కరా ఫేణీ పుల్లేందీవరలోచనా ॥ 67 ॥

ఫట్‌ మంత్ర స్ఫటిక స్వాహాస్ఫోటాచఫట్‌ స్వరూపిణీ ।
స్ఫోటికా ఘాటికా ఘోరస్ఫాటికాద్రి స్వరూపిణీ ॥ 68 ॥

వరాంగగా వరధరా వారాహీ వాసుకీ వరా ।
బిందుస్థా బిందునీ వాణీ బిందు చక్ర నివాసినీ ॥ 69 ॥

విద్యాధరీ విశాలాక్షీ కాశీ వాసి జన ప్రియా ।
వేదవిద్యా విరూపాక్షీ విశ్వయుగ్భాహు రూపిణీ ॥ 70 ॥

బ్రహ్మశక్తి ర్విష్ణుశక్తిః పంచవక్త్రా శివప్రియా ।
వైకుంఠవాసినీ దేవీ వైకుంఠ పదదాయినీ ॥ 71 ॥

బ్రహ్మరూపా విష్ణురూపా పరబ్రహ్మ మహేశ్వరీ ।
భవప్రియా భవోద్భావా భవరూపా భవోత్తమా ॥ 72 ॥

భవపారా భవాధారా భాగ్యవత్ప్రియకారిణీ ।
భద్రా సుభద్రా భవదా శుంభ దైత్య వినాశినీ ॥ 73 ॥

భవానీ భైరవీ భీమా భద్రకాళీ సుభద్రికా ।
భగినీ భగరూపాచ భగమానా భగోత్తమా ॥ 74 ॥

భగప్రియా భగవతీ భగవాసా భగాకరా ।
భగసృష్టా భాగ్యవతీ భగరూపా భగాసినీ ॥ 75 ॥

భగలింగ ప్రియాదేవీ భవలింగ పరాయణా ।
భగలింగ స్వరూపా చ భగలింగ వినోదినీ ॥ 76 ॥

భగలింగ రతాదేవీ భగలింగ నివాసినీ ।
భగమాలా భగకలా భగాధారా భగాంబరా ॥ 77 ॥

భగవేగా భగాభూఫా భగేంద్రా భాగ్యరూపిణీ ।
భగలింగాంగ సంభోగా భగలింగాసవావహా ॥ 78 ॥

భగలింగసమాధుర్యా భగలింగ నివేశితా ।
భగలింగ సుపూజా చ భగలింగ సమన్వితా ॥ 79 ॥

భగలింగ విరక్తా చ భగలింగ సమావృతా ।
మాధవీ మాధవీ మాన్యా మధురామధుమానినీ ॥ 80 ॥

మందహాసా మహామాయా మోహినీ మహదుత్తమా ।
మహా మోహా మహా విద్యా మహా ఘోరా మహాస్మృతిః ॥ 81 ॥

మనస్వినీ మానవతీ మోదినీ మధురాననా ।
మేనకా మానినీ మాన్యా మణిరత్న విభూషితా ॥ 82 ॥

మల్లికా మౌళికామాలా మాలాధర మదోత్తమా ।
మదనాసుందరీ మేధా మధుమత్తా మధుప్రియా ॥ 83 ॥

మత్తహంసా సమోన్నాసా మత్త సింహమహాసినీ ।
మహేంద్రవల్లభా భీమా మౌల్యం చ మిధునాత్మజా ॥ 84 ॥

మహాకాల్యా మహాకాళీ మనోబుద్ధిర్మహోత్కటా ।
మాహేశ్వరీ మహామాయా మహిషాసురఘాతినీ ॥ 85 ॥

మధురా కీర్తిమత్తా చ మత్త మాతంగ గామినీ ।
మదప్రియా మాంసరతా మత్తయుక్కామకారిణీ ॥ 86 ॥

మైధున్యవల్లభా దేవీ మహానందా మహోత్సవా ।
మరీచిర్మారతిర్మాయా మనోబుద్ధి ప్రదాయినీ ॥ 87 ॥

మోహామోక్షా మహాలక్ష్మీర్మహత్పదప్రదాయినీ ।
యమరూపా చ యమునా జయంతీ చ జయప్రదా ॥ 88 ॥

యామ్యా యమవతీ యుద్దా యదోః కుల వివర్ధినీ ।
రమారామా రామపత్నీ రత్నమాలా రతిప్రియా ॥ 89 ॥

రత్న సింహాసనస్థా చ రత్నాభరణ మండితా ।
రమణీరమణీయా చ రత్వారస పరాయణా ॥ 90 ॥

రతానందా రతవతీ రఘూణాం కులవర్ణినీ ।
రమణారీ పరిభ్రాజ్యా రైధారాధికరత్నజా ॥ 91 ॥

రావీ రసస్వరూపా చ రాత్రిః రాజసుఖావహా ।
ఋతుజా ఋతుదా బుద్దా ఋతురూపా ఋతుప్రియా ॥ 92 ॥

రక్తప్రియా రక్తవతీ రంగిణీ రక్తదంతికా ।
లక్ష్మీర్లజ్జా చ లతికా లీలాలగ్నా నితాక్షిణీ ॥ 93 ॥

లీలా లీలావతీ లోభా హర్షాహ్లాదన పట్టికా ।
బ్రహ్మస్థితా బ్రహ్మరూపా బ్రహ్మణా వేదవందితా ॥ 94 ॥

బ్రహ్మోద్భవా బ్రహ్మకళా బ్రహ్మాణీ బ్రహ్మబోధినీ ।
వేదాంగనా వేదరూపా వనితా వినతా వసా ॥ 95 ॥

బాలా చ యువతీ వృద్ధా బ్రహ్మకర్మపరాయణా ।
వింధ్యస్థా వింధ్యవాసీ చ బిందుయుగ్బిందుభూషణా ॥ 96 ॥

విద్యావతీ వేదధారీ వ్యాపికా బర్హిణీ కళా ।
వామాచార ప్రియా వహ్నిర్వామాచార పరాయణా ॥ 97 ॥

వామాచారరతా దేవీ వామదేవ ప్రియోత్తమా ।
బుద్ధేంద్రియా విబుద్ధా చ బుద్ధా చరణ మాలినీ ॥ 98 ॥

బంధమోచన కర్త్రీ చ వారుణా వరుణాలయా ।
శివా శివప్రియా శుద్దా శుద్దాంగీ శుక్లవర్ణికా ॥ 99 ॥

శుక్లపుష్పప్రియా శుక్లా శివధర్మ పరాయణా ।
శుక్లస్థా శుక్లినీ శుక్లరూప శుక్లపశుప్రియా ॥ 100 ॥

శుక్లస్థా శుక్రిణీ శుక్రా శుక్రరూపా చ శుక్రికా ।
షణ్ముఖీ చ షడంగా చ షట్చక్ర వినివాసినీ ॥ 101 ॥

షడ్గ్రంధియుక్తా షోఢా చ షణ్మాతా చ షడాత్శికా ।
షడంగయువతీ దేవీ షడంగ ప్రకృతిర్వశీ ॥ 102 ॥

షడాననాఫడస్త్రా చ షష్టీ షష్టేశ్వరీ ప్రియా ।
షడంగవాదా షోడశీ చ షోడా న్యాసస్వరూపిణీ ॥ 103 ॥

షడ్చక్రభేదనకరీ షడ్చక్రస్థస్వరూపిణీ ।
షోడశస్వర రూపా చ షణ్ముఖీ షడ్రదాన్వితా ॥ 104 ॥

సనకాది స్వరూపా శివధర్మ పరాయణా ।
సిద్దా సప్తస్వరీ శుద్దా సురమాతా స్వరోత్తమా ॥ 105 ॥

సిద్ద విద్యా సిద్ద మాతా సిద్దా సిద్ద స్వరూపిణీ ।
హరా హర ప్రియా హారా హరిణీ హారయుక్‌ తథా ॥ 106 ॥

హరిరూపా హరిధారా హరిణాక్షీ హరిప్రియా ।
హేతుప్రియా హేతురతా హితాహితస్వరూపిణీ ॥ 107 ॥

క్షమా క్షమావతీ క్షీతా క్షద్రఘంటా విభూషణా ।
క్షయంకరీ క్షితీశా చ క్షీణమధ్యా సుశోభనా ॥ 108 ॥

అజానంతా అపర్ణా చ అహల్యా శేషశాయినీ ।
స్వాంతర్గతా చ సాధూనామంతరానంత రూపిణీ ॥ 109 ॥

అరూపా అమలాచార్జా అనంత గుణశాలినీ ।
స్వవిద్యా విద్యకా విద్యా విద్యాచారవిందలోచనా ॥ 110 ॥

అపరాజితా జాతవేదా అజపా అమరావతీ ।
అల్పా స్వల్పా అనల్పాద్యా అణిమాసిద్ధి దాయినీ ॥ 111 ॥

అష్టసిద్ధిప్రదాదేవీ రూపలక్షణ సంయుతా ।
అరవింద ముఖీ దేవీ భోగసౌఖ్యప్రదాయినీ ॥ 112 ॥

ఆదివిద్యా ఆదిభూతా ఆదిసిద్ధి ప్రదాయినీ ।
సీత్కారరూపిణీ దేవీ సర్వాసన విభూషితా ॥ 113 ॥

ఇంద్ర ప్రియా చ ఇంద్రాణీ ఇంద్రప్రస్థ నివాసినీ ।
ఇంద్రాక్షీ ఇంద్రవజ్రా చ ఇంద్ర వద్యోక్షిణీ తథా ॥ 114 ॥

ఈలా కామనివాసా చ ఈశ్వరీశ్వర వల్లభా ।
జననీచేశ్వరీ దీనా భేదా చేశ్వర కర్మకృత్‌ ॥ 115 ॥

ఉమా కాత్యాయినీ ఊర్ట్వా మీనాచోత్తరవాసినీ ।
ఉమాపతి ప్రియాదేవీ శివాచోంకారరూపిణీ ॥ 116 ॥

ఉరగేంద్ర శిరోరత్నా ఉరగోరగ వల్లభా ।
ఉద్యాన వాసినీ మాలా ప్రశస్త మణిభూషణా ॥ 117 ॥

ఊర్థ్వదంతోత్తమాంగీ చ ఉత్తమా చోర్ధ్వకేశినీ ।
ఉమా సిద్ధిప్రదాయా చ ఉరగాసన సంస్థితా ॥ 118 ॥

ఋషిపుత్రీ ఋషిచ్చందా బుద్ధి సిద్ధి ప్రదాయినీ ।
ఉత్సవోత్సవ సీమాంతా కామికా చ గుణాన్వితా ॥ 119 ॥

ఏలా ఏకార విద్యా చ ఏణివిద్యాధరా తథా ।
ఓంకార వలయోపేతా ఓంకార పరమాకళా ॥ 120 ॥

ఓం వద వద వాణీ చ ఓంకారాక్షర మండితా ।
ఐంద్రీ కులిశహస్తా చ ఓం లోక పరవాసినీ ॥ 121 ॥

ఓంకారా మధ్య బీజా చ। ఓం నమో రూపధారిణీ ।
పరబ్రహ్మ స్వరూపా చ అంశుకాంశుక వల్లభా ॥ 122 ॥

ఓంకారా అః ఫడ్మంత్రా చ అక్షాక్షర విభూషితా ।
అమంత్రా మంత్ర రూపా చ పదశోభా సమన్వితా ॥ 123 ॥

ప్రణవోంకార రూపా చ ప్రణవోచార భాక్‌ పునః ।
హ్రీంకార రూపా హ్రీంకారీ వాగ్బీజాక్షర భూషణా ॥ 124 ॥

హృల్లేఖా సిద్ధి యోగా చ హృత్పద్మాసన సంస్థితా ।
బీజాఖ్యానేత్ర హృదయా హ్రీంబీజా భువనేశ్వరీ ॥ 125 ॥

క్షీం కామరాజక్లిన్నా చతుర్వర్గ ఫలప్రదా ।
క్లీం క్లీం క్లీం రూపికా దేవీ క్రాం క్రీం క్రీం నామధారిణీ ॥ 126 ॥

కమలా శక్తి బీజా చ పాశాంకుశ విభూషితా ।
శ్రీం శ్రీం కారా మహావిద్యా శ్రద్ధా శ్రద్ధావతీ తథా ॥ 127 ॥

ఓం ఐం క్లీం హ్రీం శ్రీం పరా చ క్లీంకారీ పరమాకళా ।
హ్రీం క్లీం శ్రీం కారస్వరూపా సర్వకర్మ ఫలప్రదా ॥ 128 ॥

సర్వాఢ్యా సర్వదేవీ చ సర్వసిద్ధి ప్రదా తథా ।
సర్వజ్ఞా సర్వశక్తిశ్చ వాగ్విభూతి ప్రదాయినీ ॥ 129 ॥

సర్వమోక్షప్రదా దేవీ సర్వభోగ ప్రదాయినీ ।
గుణేంద్ర వల్లభా వామా సర్వశక్తి ప్రదాయినీ ॥ 130 ॥

సర్వానందమయీ చైవ సర్వసిద్ధి ప్రదాయినీ ।
సర్వ చక్రేశ్వరీ దేవీ సర్వసిద్ధేశ్వ తథా ॥ 131 ॥

సర్వప్రియంకరీ చైవ సర్వసౌఖ్య ప్రదాయినీ ।
సర్వానందప్రదా దేవీ బ్రహ్మానంద ప్రదాయినీ ॥ 132 ॥

మనోవాంఛితదాత్రీ చ మనోవృద్ధి సమన్వితా ।
అకారాదిక్షకారాంతా దుర్గా దుర్గతి నాశినీ ॥ 133 ॥

పద్మనేత్రాసునేత్రా చ స్వధా స్వాహా వషట్కరీ ।
స్వర్గా దేవవర్గా చ తవర్గా చ సమన్వితా ॥ 134 ॥

అంతస్థా వేశ్మరూపా చ నవదుర్గా నరోత్తమా ।
తత్వసిద్ధి ప్రదా నీలా తథా నీల పతాకినీ ॥ 135 ॥

నిత్యరూపా నిశాకారీ స్తంభినీ మోహినీతి చ ।
వశంకరీ తథోచ్చాటీ ఉన్నాదీకర్షిణీతి చ ॥ 136 ॥

మాతంగీ మధుమత్తా చ అణిమాలఘిమతథా ।
సిద్ధామోక్ష ప్రదానిత్యా నిత్యానంద ప్రదాయినీ ॥ 137 ॥

రక్తాంగీ రక్తనేత్రా చ రక్త చందనభూషితా ।
స్వల్పసిద్ధిః సుకల్పా చ దివ్యాచరణ శుక్రభా ॥ 138 ॥

సంక్రాంతిః సర్వవిద్యా చ సస్యవాసర భూషితా ।
ప్రథమాచ ద్వితీయా చ తృతీయా చ చతుర్ధికా ॥ 139 ॥

పంచమీ చైవ షష్టీ చ విశుద్ధా సప్తమీ తథా ।
అష్టమీ నవమీ చైవ దశమ్యేకాదశీతథా ॥ 140 ॥

ద్వాదశీ త్రయోదశీ చ చతుర్దశ్యథ పరిపూర్ణిమా ।
అమావశ్యా తథాపూర్వా ఉత్తరా పరిపూర్ణిమా ॥ 141 ॥

ఖడ్గినీ చక్రిణీ ఘోరా గదినీ శూలినీ తథా ।
భుశుండీ చాపినీ బాణా సర్వాయుధ విభూషణా ॥ 142 ॥

కులేశ్వరీ కులవతీ కులాచారపరాయణా ।
కులకర్మసురక్తా చ కులాచారప్రవర్ధినీ ॥ 143 ॥

కీర్తి శ్రీ శ్చ రమా రామా ధర్మాయై సతతం నమః ।
క్షమా ధృతి స్మృతి ర్మేధా కల్పవృక్ష నివాసినీ ॥ 144 ॥

ఉగ్రా ఉగ్రప్రభా గౌరీ వేదవిద్యా వివర్ధినీ ।
సాధ్యా సిద్ధా సుసిద్ధా చ విప్రరూపాతధైవ చ ॥ 145 ॥

కాళీ కరాళి కాళ్యా చ కాళీదైత్య వినాశినీ ।
కౌలినీ కాళికీ చైవ కచటతప వర్ణికా ॥ 146 ॥

జయినీ జయయుక్తా చ జయదా జృంభిణీ తథా ।
స్రావిణీ ద్రావిణీ దేవీ భరుండా వింధ్యవాసినీ ॥ 147 ॥

జ్యోతిర్భూతా చ జయదా జ్వాలామాలా సమకూలా ।
భిన్నా భిన్న ప్రకాశా చ విభిన్నా భిన్న రూపిణీ ॥ 148 ॥

అశ్వినీ భరణీ చైవ నక్షత్ర సంభవానిలా ।
కాశ్యపీ వినతాఖ్యాతా దితిజా దితిరేవ చ ॥ 149 ॥

కీర్తిః కామప్రియా దేవీ కీర్త్యా కీర్తి వివర్ధినీ ।
సద్యో మాంస సమాలబ్ధా సద్యశ్చిన్నాసి శంకరా ॥ 150 ॥

దక్షిణా చోత్తరా పూర్వా పశ్చిమాదిక్‌ తథైవ చ ।
అగ్నినైఋతి వాయవ్యా ఈశాన్యాదిక్తథా స్మృతా ॥ 151 ॥

ఉర్ధ్వాంగాధోగతా శ్వేతా కృష్ణా రక్తా చ పీతికా ।
చతుర్వర్గా చతుర్వర్ణా చతుర్మాత్రాత్మికాక్షరా ॥ 152 ॥

చతుర్ముఖీ చతుర్వేదా చతుర్విద్యా చతుర్ముఖా ।
చతుర్గణా చతుర్మాతా చతుర్వర్గ ఫలప్రదా ॥ 153 ॥

ధాత్రీ విధాత్రీమిథునా నారీ నాయక వాసినీ ।
సురా ముదా ముదవతీ మోదినీ మేనకాత్మజా ॥ 154 ॥

ఊర్థ్వకాళీ సిద్ధికాళీ దక్షిణా కాళికా శివా ।
నీల్యా సరస్వతీ సాత్వం బగళా ఛిన్నమస్తకా ॥ 155 ॥

సర్వేశ్వరీ సిద్ధి విద్యా పరా పరమదేవతా ।
హింగుళా హింగుళాంగీ చ హింగుళాధర వాసినీ ॥ 156 ॥

హింగుళోత్తమ వర్ణాభా హింగుళా భరణా చ సా ।
జాగ్రతీచ జగన్మాతా జగదీశ్వర వల్లభా ॥ 157 ॥

జనార్దన ప్రియా దేవీ జయయుక్తా జయప్రదా ।
జగదానందకారీ చ జగదాహ్లాదకారిణీ ॥ 158 ॥

జ్ఞాన దానకరీ యజ్ఞా జానకీ జనకప్రియా ।
జయంతీ జయదా నిత్యా జ్వలదగ్నిసమప్రభా ॥ 159 ॥

విద్యాధరా చ బింబోష్ఠీ కైలాసాచల వాసినీ ।
విభవా బడబాగ్ని శ్చఅగ్నిహోత్ర ఫలప్రదా ॥ 160 ॥

మంత్రరూపా పరాదేవీ తథైవ గురురూపిణీ ।
గయాగంగా గోమతీ చ ప్రభాసా పుష్కరాపి చ ॥ 161 ॥

వింధ్యాచలరతాదేవీ వింధ్యాచలనివాసినీ ।
బహు బహు సుందరీ చ కంసాసుర వినాశినీ ॥ 162 ॥

శూలినీ శూలహస్తా చ వజ్రా వజ్రహరాపి చ ।
దుర్గా శివా శాంతికరీ బ్రహ్మాణీ బ్రాహ్మణ ప్రియా ॥ 163 ॥

సర్వలోక ప్రణంత్రీ చ సర్వరోగహరాపి చ ।
మంగళా శోభనా శుద్ధా నిష్కలాపరమా కళా ॥ 164 ॥

విశ్వేశ్వరీ విశ్వమాతా లలితా హసితాననా ।
సదాశివా ఉమాక్షేమా చండికా చండ విక్రమా ॥ 165 ॥

సర్వదేవమయీ దేవీ సర్వాగమ భయాపహా ।
బ్రహ్మేశ విష్ణునమితా సర్వకల్యాణ కారిణీ ॥ 166 ॥

యోగినీ యోగమాతా చ యోగీంద్ర హృదయస్థితా ।
యోగిజాయా యోగవతీ యోగీంద్రానందయోగినీ ॥ 167 ॥

ఇంద్రాది నమితా దేవీ ఈశ్వరీ చేశ్వర ప్రియా ।
విశుద్ధిదా భయహరా భక్త ద్వేషి భయంకరీ ॥ 168 ॥

భవవేషా కామినీ చ భరుండా భయకారిణీ ।
బలభద్ర ప్రియాకారా సంసారార్ణవతారిణీ ॥ 169 ॥

పంచభూతా సర్వభూతా విభూతిర్భూతి ధారిణీ ।
సింహవాహా మహామోహా మోహపాశ వినాశినీ ॥ 170 ॥

మందురా మదిరా ముద్రా ముద్రాముద్గర ధారిణీ ।
సావిత్రీ చ మహాదేవీ పరప్రియని నాయికా ॥ 171 ॥

యమదూతీ చ పింగాక్షీ వైష్ణవీ శంకరీ తథా ।
చంద్రప్రియా చంద్ర రతా చందనారణ్య వాసినీ ॥ 172 ॥

చందనేంద్ర సమాయుక్తా చండదైత్యవినాశినీ ।
సర్వేశ్వరీ యక్షిణీ చ కిరాతీ రాక్షసీ తథా ॥ 173 ॥

మహాభోగవతీ దేవీ మహామోక్ష ప్రదాయినీ ।
విశ్వహంత్రీ విశ్వరూపా విశ్వసంహారకారిణీ ॥ 174 ॥

ధాత్రీ చ సర్వలోకానాం హితకారణ కామినీ ।
కమలా సూక్ష్మదా దేవీ ధాత్రీ హరవినాశినీ ॥ 175 ॥

సురేంద్ర పూజితా సిద్ధా మహాతేజోవతీతి చ ।
పరారూపవతీ దేవీత్రైలోక్యాకర్షకారిణీ ॥ 176 ॥

ఇతి తేకథితం దేవి పీతా నామసహస్రకం ।
పఠేద్వా పాఠయేద్వాపి సర్వసిద్ధిః భవేత్ప్రియే ॥ 177 ॥

ఇతిమే విష్ణునాప్రోక్తం మహాస్తంభకరం పరం ।
ప్రాతఃకాలే చ మధ్యాహ్నే సంధ్యాకాలే చ పార్వతి ॥ 178 ॥

ఏకచిత్తః పఠదేతత్‌ సర్వసిద్ధిర్భవిష్యతి ।
ఏకవారం పఠేద్యస్తు సర్వపాపక్షయో భవేత్‌ ॥ 179 ॥

ద్వివారం ప్రపఠేద్యస్తు విఘ్నేశ్వర సమోభవేత్‌ ।
త్రివారం పఠానాద్దేవి సర్వం సిద్ధ్వతి సర్వధా ॥ 180 ॥

స్తవస్యాస్య ప్రభావేణ సాక్షాత్‌ భవతి సువ్రతే ।
మోక్షార్థీ లభతే మోక్షం ధనార్ధీర్లలభతేధనం ॥ 181 ॥

విద్యార్థీలభతే విద్యాం తర్కవ్యాకరణాన్వితం ।
మహిత్వం వత్సరాంతా చ శత్రుహానిః ప్రజాయతే ॥ 182 ॥

క్షోణీపతిర్వశస్తస్య స్మరణే సదృవేభవత్‌ ।
యః పఠేత్‌ సర్వదా భక్త్యాశ్రేయస్తు భవతి ప్రియే ॥ 183 ॥

గణాధ్యక్షః ప్రతినిధిః కవికావ్యపరో వరః ।
గోపనీయం ప్రయత్నేన జననీజారవత్‌ సదా ॥ 184 ॥

హేతయుక్తో భవేన్నిత్యం శక్తియుక్తః సదాభవేత్‌ ।
య ఇదం పఠతే నిత్యం శివేన సదృశో భవేత్‌ ॥ 185 ॥

జీవన్థర్మార్థభోగీస్యాత్‌ మృతోమోక్షపతిర్భవేత్‌ ।
సత్యం సత్యం మహాదేవి సత్యం సత్యం నసంశయః ॥ 186 ॥

స్తవస్యాస్య ప్రభావేణ దేవేన సహమోదతే ।
సుచిత్తాశ్చ సురాస్సర్వే స్తవరాజస్య కీర్తనాత్‌ ॥ 187 ॥

పీతాంబర పరీధానా పీతగంధానులేపనా ।
పరమోదయకీర్తిస్యాత్‌ పరతస్సురసుందరీ ॥ 188 ॥

॥ ఇతి శ్రీ ఉత్కటశంబరే నాగేంద్ర ప్రయాణ తంత్రే షోడశ సహస్ర 

విష్ణు శంకర సంవాదే పీతాంబరీ సహస్రనామ సోత్రం సమాప్తం ॥

శ్రీ బగళాముఖీ మహా విద్యా

దశమహా విద్యలు

నిత్య స్తోత్రావళి

పంచాంగం