శివ శర్మను విష్ణు దూతలు స్వర్గ లోకం నుండి మహార్లోకానికి తీసుకొనివెళ్లారు. అక్కడ విష్ణు స్మరణ చేసి, కల్పాయువు కలిగిన వారు ఉంటారు. అక్కడి నుండి జనోలోకం చేరాడు. ఇక్కడ బ్రహ్మ కుమారులు సనకసనందనాది మహర్షులు ఊర్ధ్వ రేతస్కులయి ఉంటారు. తర్వాత తపోలోకానికి వెళ్లాడు. ఇక్కడి వారు సదా వాసుదేవుని స్మరిస్తూ, అన్నీ ఆయనకే అర్పించి, దాహాదులు కూడా లేకుండా ఉంటారు. వీరికి బ్రహ్మాయుస్సు ఉంటుంది శివశర్మ సత్యలోకం చేరుకొన్నాడు. బ్రహ్మ అతడిని చూసి ‘’ఇక్కడి నుండి త్వరగా వెళ్ళు. నిత్యం నేను ఇక్కడ ప్రళయాన్ని సృష్టిస్తాను.
విరాట్ పురుషుని వరకు ఉన్న సృష్టిని అంతటిని హరుడు రోజు సంహరిస్తాడు. అలాంటప్పుడు మరణ ధర్మం ఉన్న మానవుల గురించి చెప్పాల్సిన్దేముంది? కృత, త్రేతాది యుగాలకు మనుష్యులకు తగినది ఒక్కటే యుగం. ఆ యుగం లో భారత వర్షం లో మానవులు వికశిస్తారు. మనసు లో కూడా ఇంద్రియాలను జయించి, క్రోధాదులను వదిలి, తపస్సు చేత యశో సంపదపొంది, తమో గుణాన్ని విసర్జించి, సంపద మీద ఆసక్తి లేకుండా, అహంకారాన్ని వదిలినవారు, స్మృతులను సమగ్రంగా తెలుసుకొన్న వారు, స్నేహంతొ ధర్మసోపాన్ని అధిరోహించిన వారు, భారతదేశంలో మళ్ళీ మళ్ళీ పుట్టి, మానవులు అని పించుకొంటారు.
దైత్య, దానవ కన్యల చేత పాతాళలోకం శోభిల్లు తుంది మోక్షాన్ని పొందిన వారు కూడా పాతాళ లోకం లో జన్మిస్తారు. పాతాళంలో పగటి పూట సూర్యుడు ప్రకాశిస్తే, రాత్రిళ్ళు చంద్రుడు వెలుగులను చిమ్ముతాడు. ఇక్కడ హాటకేశ్వర మహా లింగమున్నది. అన్ని కోర్కెలను తీరుస్తుంది. దానవులకు భోగ భూమి ఇది. ‘’ పాతాళం కంటే రమ్యమైనది ద్విజవర్షము. ఇది ఇలా వృతం.
ఇక్కడ రత్న సానువు లున్నాయి. పుణ్యాత్ములకు దివ్య భూమి. సత్యం భాషణులు, పుత్రులున్నవారు, ఉత్తమ క్షేత్రాలను సందర్శించిన వారు ఇక్కడకు వస్తారు. ఇందులో ద్వీపాలు చాలా ఉన్నాయి. వాటిని సముద్రం చుట్టి ఉంటుంది. ‘’జంబూ ద్వీపానికి మించిన ద్వీపం లేదు. ఇక్కడ నవ వర్షాలు దేవతల భోగ భూములు. దేవతలు స్వర్గం నుండి దిగివచ్చి ఇక్కడ ఉంటారు.
ఇది తొమ్మిదివేల యోజనాల విస్తీర్ణం కలది. దీనిలో మేరు పర్వతానికి దక్షిణం గా ఉన్న భారత వర్షం మొట్ట మొదటిది. కనుక ప్రయాగ లాంటి తీర్ధాలలో ముమ్దనం అంటే గుండు కొట్టించు కొంటె, పాపాలన్నీ వదిలి పోతాయి. త్రివేణీ సంగమ స్నానం దోషాలన్నిటిని హరించి పుణ్య లోక ప్రాప్తి కల్గిస్తుంది. ఇక్కడ పుణ్యవిధి నిర్వహించిన వారంతా సత్య లోకానికి చేరుకొంటారు.
కాశీ అన్నిటి కంటే గొప్ప ముక్తి క్షేత్రం. ఈ క్షేత్రం ఈశ్వరుని త్రిశూలాగ్రం లో, భూమికి, ఆకాశానికి మధ్య ఉన్నది. ఇక్కడ ఎప్పుడూ కృత యుగమే. నిత్యం మహా పర్వదినమే. ఎప్పుడూ ఉత్తరాయణమే. ఎల్లప్పుడు మహోదయమే. కాశిని సృష్టించిన వాడు సాక్షాత్తు మహా శివుడు. కాశీ లో పాపం చేయరాదు ఇక్కడ తులా పురుష దానం లాంటివి చేసిన వారు సత్య లోక వాసులవుతారు. జప, తప, ధ్యానదుల వల్ల రాని మోక్షం కాశీ నివాసం తొ, కాశీలో మరణం తొ కలుగు తుంది. అని బ్రహ్మ దేవుడు కాశీ క్షేత్ర మహాత్మ్యాన్ని వివరించాడు.
