CHERI YASODAKU చేరి యశోదకు శిశు వితడు

 పల్లవి 

చేరి యశోదకు శిశు వితడు

ధారుణి బ్రహ్మకు తండ్రియు నితడు ||

చరణములు 

సొలసి చూచినను సూర్యచంద్రులను

లలి వెదచల్లెడులక్షణుడు |

నిలిచిననిలువున నిఖిలదేవతల

కలిగించు సురలగనివో యితడు ||

మాటలాడినను మరియజాండములు

కోటులు వోడమేటిగుణరాశి |

నీటగునూర్పుల నిఖిలవేదములు

చాటువనూ రేటిసముద్ర మితడు ||

ముంగిట జొలసిన మోహన మాత్మల

బొంగించేఘనపురుషుడు |

సంగతి మావంటిశరణాగతులకు

నంగము శ్రీవేంకటాధిపు డితడు ||

CHOODARAMMA SATULAARAA చూడరమ్మ సతులారా సోబాన పాడరమ్మ

 పల్లవి 

చూడరమ్మ సతులారా సోబాన పాడరమ్మ

కూడున్నది పతి చూడి కుడుత నాంచారి ||

చరణములు 

శ్రీమహాలక్ష్మియట సింగారాలకే మరుదు

కాముని తల్లియట చక్కదనాలకే మరుదు |

సోముని తోబుట్టువట సొంపుకళలకేమరుదు

కోమలాంగి ఈ చూడి కుడుత నాంచారి ||

కలశాబ్ధి కూతురట గంభీరలకే మరుదు

తలపలోక మాతయట దయ మరి ఏమరుదు |

జలజనివాసినియట చల్లదనమేమరుదు

కొలదిమీర ఈ చూడి కుడుత నాంచారి ||

అమరవందితయట అట్టీ మహిమ ఏమరుదు

అమృతము చుట్టమట ఆనందాలకేమరుదు |

తమితో శ్రీవేంకటేశు దానె వచ్చి పెండ్లాడె

కౌమెర వయస్సు ఈ చూడి కుడుత నాంచారి ||

DAACHUKO NEE PAADAALAKU దాచుకో నీపాదాలకుదగ నే జేసినపూజ లివి

 రాగం: ఆరభి

పల్లవి 

దాచుకో నీపాదాలకుదగ నే జేసినపూజ లివి |

పూచి నీకీరీతిరూపపుష్పము లివి యయ్యా ||

చరణములు 

వొక్క సంకీర్తనె చాలు వొద్దికై మమ్ము రక్షించగ |

తక్కినవి భాండారాన దాచి వుండనీ |

వెక్కసమగునీ నామము వెల సులభము ఫల మధికము |

దిక్కై నన్నేలితి విక నవి తీరని నా ధనమయ్యా ||

నానాలికపైనుండి నానాసంకీర్తనలు |

పూని నాచే నిన్ను బొగడించితివి |

వేనామాల వెన్నుడా వినుతించ నెంతవాడ |

కానిమ్మని నా కీపుణ్యము గట్టితి వింతేయయ్యా ||

యీమాట గర్వము గాదు నీ మహిమే కొనియాడితిగాని |

చేముంచి నాస్వాతంత్ర్యము చెప్పినవాడగాను |

నేమాన బాడేవాడను నేరము లెంచకుమీ |

శ్రీమాధవా నే నీదాసుడ శ్రీవేంకటేశుడవయ్యా ||

RAMA DASARATHA RAAMAA రామ దశరథరామ నిజ సత్య

 పల్లవి 

రామ దశరథరామ నిజ సత్య

కామ నమో నమో కాకుత్థ్సరామ ||

చరణములు 

కరుణానిధి రామ కౌసల్యానందన రామ

పరమ పురుష సీతాపతిరామ |

శరధి బంధన రామ సవన రక్షక రామ

గురుతర రవివంశ కోదండ రామ ||

దనుజహరణ రామ దశరథసుత రామ

వినుతామర స్తోత్ర విజయరామ |

మనుజావతారా రామ మహనీయ గుణరామ

అనిలజప్రియ రామ అయోధ్యరామ ||

సులలితయశ రామ సుగ్రీవ వరద రామ

కలుష రావణ భయంకర రామ |

విలసిత రఘురామ వేదగోచర రామ

కలిత ప్రతాప శ్రీవేంకటగిరి రామ ||

DEVA DEVAM BHAJE దేవ దేవం భజే దివ్యప్రభావం

 రాగం: ధన్నాసి

పల్లవి 

దేవ దేవం భజే దివ్యప్రభావం

రావణాసురవైరి రణపుంగవం ||

చరణములు 

రాజవరశేఖరం రవికులసుధాకరం

ఆజానుబాహు నీలాభ్రకాయం |

రాజారి కోదండ రాజ దీక్షాగురుం

రాజీవలోచనం రామచంద్రం ||

నీలజీమూత సన్నిభశరీరం ఘనవి

శాలవక్షం విమల జలజనాభం |

తాలాహినగహరం ధర్మసంస్థాపనం

భూలలనాధిపం భోగిశయనం ||

పంకజాసనవినుత పరమనారాయణం

శంకరార్జిత జనక చాపదళనం |

లంకా విశోషణం లాలితవిభీషణం

వెంకటేశం సాధు విబుధ వినుతం ||

DEVA EE TAGAVU TEERCHAVAYYAA దేవ యీ తగవు దీర్చవయ్యా

 పల్లవి 

దేవ యీ తగవు దీర్చవయ్యా

వేవేలకు నిది విన్నపమయ్యా ||

చరణములు 

తనువున బొడమినతతి నింద్రియములు

పొనిగి యెక్కడికి బోవునయా |

పెనగి తల్లికడ బిడ్డలు భువిలో

యెనగొని యెక్కడి కేగుదురయ్యా ||

పొడుగుచు మనమున బొడమిన యాసలు

అదన నెక్కడికి నరుగునయా |

వొదుగుచు జలములనుండు మత్స్యములు

పదపడి యేగతి బాసీనయ్యా ||

లలి నొకటొకటికి లంకెలు నివే

అలరుచు నేమని యందునయా |

బలు శ్రీవేంకటపతి నాయాత్మను

గలిగితి వెక్కడి కలుషములయ్యా ||

DOLAAYAANCHALA డోలాయాం చల డోలాయాం హరే డోలాయాం

 రాగం: వరాళి

పల్లవి 

డోలాయాం చల డోలాయాం హరే డోలాయాం ||

చరణములు 

మీనకూర్మ వరాహా మృగపతి//అవతారా |

దానవారే గుణశౌరే ధరణిధర మరుజనక ||

వామన రామ రామ వరకృష్ణ అవతారా |

శ్యామలాంగా రంగ రంగా సామజవరద మురహరణ ||

దారుణ బుద్ద కలికి దశవిధ//అవతారా |

శీరపాణే గోసమాణే శ్రీ వేంకటగిరికూటనిలయ || 2 ||