మహర్షీ! దక్షిణాదేవి కథ చెప్పావు. ధ్యాన స్తోత్ర మంత్ర పూజావిధానాలు చెప్పలేదు. అవికూడా వినిపించు.
బ్రహ్మతనయా! ఆలకించు. అది అంతా కాణ్వశాఖోక్తం. అలనాడు యజ్ఞుడు చేసిన దక్షిణాస్తోత్రమేమిటంటే -
కార్తికపూర్ణిమనాడు మహాలక్ష్మి శరీరంలో దక్షిణాంసంనుంచి ఆవిర్భవించావు కనక నువ్వు దక్షిణాదేవివయ్యావు. అంతకుముందు గోలోకంలో నువ్వు సుశీలవు. శ్రీకృష్ణుడి ప్రేయసివి. రాధాసమానవు. రాధాదేవి శాపంవల్ల గోలోకం విడిచిపెట్టి తపస్సుచేసి మహాలక్ష్మిలో లీనమయ్యావు. ఇప్పుడు భాగ్యవశాన నాకు లభించావు. దక్షిణాదేవీ! దయచూపించు. నన్ను భర్తగా స్వీకరించు. కర్మిష్ఠులకు కర్మఫలాన్ని అందించే దేవివి నువ్వే. నువ్వు లేకపోతే అందరి సత్కర్మలూ నిష్ణలమవుతాయి. నువ్వు తప్ప మరింకెవ్వరూ - బ్రహ్మ విష్ణు మహేశ్వరులుగానీ దిక్సాలాది దేవతలుగానీ కర్మఫలాన్ని ఇవ్వలేరు. బ్రహ్మదేవుడు స్వయంగా కర్మరూపి. ఫలరూపి మహేశ్వరుడు. యజ్ఞరూపి విష్ణుమూర్తిని నేను. మా అందరికీ సారరూపిణివి నువ్వు.
కర రూపీ స్వయం బ్రహ్మా ఫలరూపీ మహేశ్వరః ।
యజ్ఞరూపీ విష్ణురహం త్వమేషాం సారరూపిణీ ॥
నువ్వు నిర్గుణవు. పరాప్రకృతివి. శక్తివి. నీవల్లనే శ్రీకృష్ణపరమాత్మ శక్తుడయ్యాడు. జన్మజన్మలకూ నువ్వు నాతో ఉండి నన్నూ శక్తుణ్ణి చెయ్యి - అని స్తుతించి ఎదుట నిలబడ్డాడు. దేవి సంతుష్టయై వరించింది.
ఇది యజ్ఞాడు చేసిన దక్షిణాస్తోత్రం. యజ్ఞకాలంలో పఠిస్తే యజ్ఞాలు విశేషఫలితాలను ఇస్తాయి. రాజసూయ - వాజపేయ - గోమేధ - నరమేధ - అశ్వమేధ - లాంగలయజ్ఞ - విష్ణుయజ్ఞ - కుబేరయజ్ఞ - ధనదాన - భూమిదాన - ఇష్టాపూర్తనిర్మాణ - ఫలదాన - గజదాన - గోమేధకదాన - లోహదాన - స్వర్ణదాన - రత్నదాన - తామ్రదాన - శివయజ్ఞ - రుద్రయజ్ఞ - శక్రయజ్ఞ - వరుణయాగ - వైరిమర్దన కండకయజ్ఞ - శుచియజ్ఞ - ధర్మయజ్ఞ - పాపమోచన యజ్ఞ - యోనియాగ - వాణీయాగాది సమయాలలో దీన్ని తప్పక పఠించాలి. నిర్విఘ్నంగా శీఘ్రంగా అత్యధిక ఫలదాయకాలు అవుతాయి. ఇక ధ్యానపూజావిధులు ఎమిటంటే -
సాలగ్రామంలోగానీ మంగళ కలశంలోగానీ దక్షిణాదేవిని ఆరాధించాలి, రెండు ధ్యాన శ్లోకాలు ఉన్నాయి. మూలమంత్రమూ ఉంది.
లక్షీ దక్షాంససంభూతాం దక్షిణాం కమలాకళామ్ ।
సర్వకర్మసు దక్షాం చ ఫలదాం సర్వకర్మణామ్ ॥
విష్ణోః శక్తిస్వరూపాం చ పూజితాం వందితాం శుభామ్ ।
శుద్దిదాం శుద్దిరూపాం చ సుశీలాం శుభదాం భజే ॥
ఓం శ్రీం క్లీం హ్రీం దక్షిణాయై స్వాహా అనే మూలమంత్రం జపిస్తూ పూజలు చెయ్యాలి. అర్ఘ్యపాద్యాదులతో షోడశోపచారాలూ శ్రద్ధగా నిర్వహించాలి. ఇలాచేస్తే దక్షిణాదేవి అనుగ్రహం లభిస్తుంది. అన్నిపనులూ ఫలవంతమవుతాయి. పుత్రార్థులకు పుత్రులూ ధనార్థులకు ధనాలూ విద్యార్థులకు విద్యలూ వివాహార్థులకు వివాహాలూ - ఎది కోరుకున్నవారికి అది లభిస్తుంది. కష్టాలు వచ్చినప్పుడూ బంధువియోగం జరిగినప్పుడూ ఆపదలు వచ్చినప్పుడూ బంధనాలలో ఇరుక్కున్నపుడూ ఒక నెలపాటు ఈ దక్షిణాదేవి ఉపాఖ్యానాన్ని పారాయణ చేసినా పురాణంగా విన్నా ఇబ్బంధులన్నీ తొలగిపోయి శాంతిసౌఖ్యాలు వెల్లివిరుస్తాయి.
నారాయణమహర్షీ! నీ దయవల్ల దేవీస్వరూపాల కథలూ గాథలూ చాలామటుకు తెలుసుకోగలిగాను. తక్కినవారి చరితలుకూడా తెలుసుకోవాలని కుతూహలంగా ఉంది. అనుగ్రహించు.
నారదా! దేవీచరితలన్నీ వేదపురాణాలలో దేనికదే ప్రత్యేకంగా ఉన్నాయి. దేవీప్రధాన రూపాలు ఎమిటో కళాంశావతారాలు ఏమిటో తొట్టతొలిగానే నీకు తెలియజెప్పాను. వాటిలో ఇంకా ఎమైనా మిగిలిపోయి ఉన్నాయేమో గుర్తుతెచ్చుకో. అవికూడా చెబుతాను విందువుగాని.
మహర్షీ! షష్ఠీ - మంగళచండీ - మానసాదేవి - వీరు ఆదిపరాశక్తి కళాంశరూపాలన్నావు. వీరి చరితలు చెప్పావుగావు.
No comments:
Post a Comment