GARUDA GAMANA GARUDADHVAJA గరుడ గమన గరుడధ్వజ

 పల్లవి 

గరుడ గమన గరుడధ్వజ

నరహరి నమోనమో నమో ||

చరణములు 

కమలాపతి కమలనాభా

కమలజ జన్మకారణిక |

కమలనయన కమలాప్తకుల

నమోనమో హరి నమో నమో ||

జలధి బంధన జలధిశయన

జలనిధి మధ్య జంతుకల |

జలధిజామాత జలధిగంభీర

హలధర నమో హరి నమో ||

ఘనదివ్యరూప ఘనమహిమాంక

ఘనఘనా ఘనకాయ వర్ణ |

అనఘ శ్రీవేంకటాధిపతేహం

నమో నమోహరి నమో నమో ||

GHANUDAATADE MAMU ఘనుడాతడే మము గాచుగాక హరి

 పల్లవి 

ఘనుడాతడే మము గాచుగాక హరి

అనిశము నేమిక నతనికె శరణు ||

చరణములు 

యెవ్వని నాభిని యీ బ్రహ్మాదులు

యెవ్వడు రక్షకుడిన్నిటికి |

యెవ్వని మూలము యీ సచరాచర

మవ్వల నివ్వల నతనికే శరణు ||

పురుషోత్తముడని పొగడి రెవ్వరిని

కరి నెవ్వడు గాచె |

ధర యెవ్వడెత్తి దనుజుల బొరిగొనె

అరుదుగ మేమిక నతనికె శరణు ||

శ్రీసతి యెవ్వని జేరి వురమునను

భాసిల్లె నెవ్వడు పరమంబై |

దాసుల కొరకై తగు శ్రీవేంకట

మాస చూపి నితడతనికె శరణు ||

GOVINDAASRITA GOKULABRUNDAA గోవిందాశ్రిత గోకులబృందా

 పల్లవి 

గోవిందాశ్రిత గోకులబృందా

పావన జయజయ పరమానంద ||

చరణములు 

జగదభిరామ సహస్రనామ

సుగుణధామ సంస్తుతనామ |

గగనశ్యామ ఘనరిపు భీమ

అగణిత రఘువంశాంబుధి సోమ ||

జననుత చరణా శరణ్యు శరణా

దనుజ హరణ లలిత స్వరణా |

అనఘ చరణాయత భూభరణా

దినకర సన్నిభ దివ్యాభరణా ||

గరుడ తురంగా కారోత్తుంగా

శరధి భంగా ఫణి శయనాంగా |

కరుణాపాంగా కమల సంగా

వర శ్రీ వేంకట గిరిపతి రంగా ||

HARI NAAMAMU KADU హరినామము కడు నానందకరము

 పల్లవి 

హరినామము కడు నానందకరము

మరుగవో మరుగవో మరుగవో మనసా ||

చరణములు 

నళినాక్షు శ్రీనామము

కలిదోషహరము కైవల్యము |

ఫలసారము బహుబంధ మోచనము

తలచవో తలచవో మనసా ||

నగధరు నామము నరకహరణము

జగదేకహితము సమ్మతము |

సగుణ నిర్గుణము సాక్షాత్కారము

పొగడవో పొగడవో పొగడవో మనసా ||

కడగి శ్రీవేంకటపతి నామము

ఒడి ఒడినే సంపత్కరము |

అడియాలం బిల నతి సుఖమూలము

తడవవో తడవవో తడవవో మనసా ||

HARI YAVATAARA MITADU హరి యవతార మీతడు అన్నమయ్య

 పల్లవి 

హరి యవతార మీతడు అన్నమయ్య

అరయ మా గురుడీతడు అన్నమయ్య |

చరణములు 

వైకుంఠ నాథుని వద్ద వడి పడు చున్న వాడు

ఆకరమై తాల్లపాక అన్నమయ్య |

ఆకసపు విష్ణు పాదమందు నిత్యమై ఉన్న వాడు

ఆకడీకడ తాల్లపాక అన్నమయ్య ||

ఈవల సంసార లీల ఇందిరేశుతో నున్న వాడు

ఆవటించి తాల్లపాక అన్నమయ్య |

భావింప శ్రీ వేంకటేశు పదములందే యున్నవాడు

హావ భావమై తాల్లపాక అన్నమయ్య ||

క్షీరాబ్ధిశాయి బట్టి సేవింపుచు నున్నవాడు

ఆరితేరి తాల్లపాక అన్నమయ్య |

ధీరుడై సూర్యమండల తేజము వద్ద నున్నవాడు

ఆరీతుల తాల్లపాక అన్నమయ్య ||

IPPUDITU KALAGANTI ఇప్పుడిటు కలగంటి నెల్లలోకములకు

 రాగం: భూపాళం

పల్లవి 

ఇప్పుడిటు కలగంటి నెల్లలోకములకు

అప్పడగు తిరువేంకటాద్రీశు గంటి ||

చరణములు 

అతిశయంబైన శేషాద్రిశిఖరము గంటి

ప్రతిలేని గోపుర ప్రభలు గంటి |

శతకోటి సూర్య తేజములు వెలుగగ గంటి

చతురాస్యు బొడగంటి చయ్యన మేల్కొంటి ||

కనకరత్న కవాట కాంతు లిరుగడగంటి

ఘనమైన దీపసంఘములు గంటి |

అనుపమ మణీమయమ్మగు కిరీటము గంటి

కనకాంబరము గంటి గ్రక్కన మేల్కొంటి ||

అరుదైన శంఖ చక్రాదు లిరుగడ గంటి

సరిలేని యభయ హస్తము గంటి |

తిరువేంకటాచలాధిపుని జూడగ గంటి

హరి గంటి గురు గంటి నంతట మేల్కంటి ||

ITARULAKU NINU ఇతరులకు నిను నెరుగదరమా

 పల్లవి 

ఇతరులకు నిను నెరుగదరమా ||

సతతసత్యవ్రతులు సంపూర్ణమోహవిర

హితులెరుగుదురు నిను నిందిరారమణా ||

చరణములు 

నారీకటాక్షపటునారాచభయరహిత

శూరులెరుగుదురు నిను జూచేటిచూపు |

ఘొరసంసార సంకులపరిచ్ఛేదులగు

ధీరులెరుగుదురు నీదివ్యవిగ్రహము ||

రాగభోగవిదూర రంజితాత్ములు మహా

భాగులెరుగుదురు నిను బ్రణుతించువిధము |

ఆగమోక్తప్రకారాభిగమ్యులు మహా

యోగులెరుగుదురు నీవుండేటివునికి ||

పరమభాగవత పదపద్మసేవానిజా

భరణు లెరుగుదురు నీపలికేటిపలుకు |

పరగునిత్యానంద పరిపూర్ణమానస

స్థిరు లెరుగుదురు నిను దిరువేంకటేశ ||