Arudra - ఆరుద్ర

ఆరుద్ర నక్షత్రము

నక్షత్రం - ఆరుద్ర
అధిపతి - రాహువు
గణము - మానవ
జాతి - స్త్రీ
వృక్షం - రేల
జంతువు - శునకము
నాడి - ఆదినాడి
పక్షి - పింగళ
అధిదేవత - రుద్రుడు
రాశి - మిధునము

ఆరుద్ర నక్షత్ర జాతకుల గుణగణాలు
ఆరుద్ర శివుడి నక్షత్రంగా పేరు పొందినది. అధిదేవత రుద్రుడు. ఆర్ద్ర సాధారణంగా దోషం లేనిది. ఈ నక్షత్రం 4వ పాదం నందలి 8 ఘడియలలో జననం మాతృగండం. మరియు తండ్రి యొక్క జన్మ నక్షత్రం జన్మలగ్నం యందు శిశువు జననం పితృగండం. మిగిలిన బంధువులకి కూడా ఇదే వర్తిస్తుంది. ఇలాగే తల్లి సోదరులకి కూడా చెప్పదగును.

శిశువు యొక్క జన్మ నక్షత్రం లగ్నములు ఏకమైన యెడల దోషం కలుగును. అట్లుగాక పాద బేధములైన యెడల దోషం లేదు. ఈ నక్షత్రములో జన్మించిన వారు మాటలాడుటలో నేర్పరితనమును, మించిన జ్ఞాపక శక్తియు కలిగి ఉండెదరు, చింతలేనివారు. శౌర్యము కలవారు. గొప్పగా, గమ్మత్తుగా మాట్లాడగలరు.

వ్యాపారపరమైన నైపుణ్యము ఉంటుంది. పలు రంగాలలో పరిచయము ఉంటుంది. ఇతరుల అభివృద్ధికి ఇటుక రాళ్ళవలె సహాయపడతారు. ఎన్నిసార్లు జారిపడినా పట్టువదలక ఉన్నత స్థితికి వస్తారు. కీర్తియోగము వీరిని ఎప్పుడూ వెన్నంటి ఉంటుంది. డబ్బులకు చెందునట్టి నిర్ణయాలను సరిగా చేయలేరు.

ఆరుద్ర నక్షత్ర జాతకుల గుణగణాలు:
తొందరపాటుతో ముందు-వెనుక మంచి-చెడు అనేవి చూడకుండనే నిర్ణయాలను వెంటనే అమలుపరుస్తారు. లౌక్యము తెలివితేటలు కనబరచుతారు. తల్లిదండ్రులు, తోడబుట్టువుల మీద గొప్ప ప్రేమను కలిగి ఉంటారు.

ఆడవారిపట్ల గౌరవ భావము కలిగి ఉంటారు. ఎంత మంది వీడి వెళ్ళినా ఎనలేని శక్తి సామర్థ్యాలతో మరల వీరు ఉన్నత స్థాయి సాధిస్తారు.

వీరు పుట్టుకతోనే మేధావిగా పరిగణించబడతారు. వివిధ విషయాల గురించిన జ్ఞానాన్ని పొందడానికి వీరిలో నిండు ఆసక్తి ఉంటుంది. వీరు చాలా ఆహ్లాదకరమైన వ్యక్తి మరియు అందరితో మర్యాద పూర్వకంగా ప్రవర్తిస్తారు.

వీరు అన్ని రకాల వాణిజ్య కార్యక్రమాల్లో దిట్ట, మరియు వీరు వ్యాపారం నుంచి పరిశోధన వరకు అన్ని విషయాల్లో విజయం సాధిస్తారు. ఇతర వ్యక్తులు ఏమి ఆలోచిస్తున్నారనే దానిని తేలికగా గుర్తించగలరు. అందువల్లనే వీరికి చక్కటి దూరదృష్టి ఉంటుంది. ప్రతిదీ కూడా లోతుగా విశ్లేషించడం వీరి యొక్క అలవాటు.

వీరు తమ కోపంపై నియంత్రణ సాధించడం అత్యుత్తమంగా ఉంటుంది. పరిస్థితులు వీరిని నిరంతరం టెస్ట్ చేయడానికి ప్రయత్నిస్తాయి, అయితే, వాటిని తిప్పికొట్టి తమను తాము రక్షించుకొంటారు. బహుశా అందువల్లనే వారు అనుభవం మరియు పరిణితిని కలిగి ఉంటారు. వీరి సమస్యల్ని వారే పరిష్కరించుకోవడం అనేది వారి యొక్క ముఖ్యమైన లక్షణాల్లో ఒక్కటి.

కొన్నిసార్లు వీరు భవిష్యత్తు ఆందోళనలు ఏమీ తెలియని అమాయకమైన పిల్లవాడిలా ప్రవర్తిస్తారు. వీరు అన్ని రకాల సమస్యలను కలిగి ఉన్నప్పటికీ, చివరగా వాటిని అధిగమించగలుగుతారు. వీరు శారీరకంగా శక్తివంతంగా ఉంటారు. ఒకేసారి అనేక పనులు చేయడం అనేది వీరి యొక్క మరో లక్షణం. ఆధ్యాత్మికతకు సంబంధించి వీరికి చక్కటి ఆసక్తి ఉంటుంది.

వీరు “ఎందుకు” మరియు “ఎలా” అనే చట్టాలకు అనుగుణంగా వీరి పని విధానం ఉంటుంది. పరిష్కరించని మర్మాలను పరిష్కరించడంపై దృష్టి సారిస్తారు.

ఆరుద్ర నక్షత్రం మొదటి పాదం:
ఆరుద్ర మొదటి పాదంలో జన్మించిన జాతకులకు వస్తు, విషయ జాగ్రత్తలు ఎక్కువ. పారదర్శక వైఖరితో కలుపుకునే స్వభావం ఉంటుంది. లోకాన్ని పరిశీలించే స్వభావం ఉండటంతో అవకాశాలపై పట్టు నిలుపుకుంటారు. ఆచార వ్యవహారాలపై శ్రద్ధ ఉంటుంది.

గ్రహ దశలు : ఈ పాదంలో జన్మించినవారికి మొదట రాహు మహర్దశ 18 సం.లు ఉంటుంది. తదుపరి గురు మహర్దశ 16 సం.లు, శని మహర్దశ 19 సం.లు, బుధ మహర్దశ 17 సం.లు, కేతు మహర్దశ 7 సం.లు, శుక్ర మహర్దశ 20 సం.లు ఉంటాయి.

దర్శనీయ క్షేత్రం : తూర్పు గోదావరి జిల్లా పెనుమళ్లలోని శ్రీ పార్వతీ సమేత సోమేశ్వర స్వామిని అర్చించుకోవడం శుభప్రదం.

ఆరుద్ర నక్షత్రం రెండో పాదం
పట్టుదల, తీక్షణత ఎక్కువగా ఉంటాయి. అంతిమ లక్ష్యం మీద దృష్టి పెడతారు. మధ్యలో ఏర్పడే పరిణామాలతో కాస్త గందరగోళానికి గురవుతారు.

గ్రహ దశలు : రాహు మహర్దశ పదమూడున్నర (13.5) సం.లు, గురు 16 సం.లు, శని 19 సం.లు, బుధ 17 సం.లు, కేతు 7 సం.లు, శుక్ర మహర్దశ 20 సం.లు ఉంటాయి.

దర్శనీయ క్షేత్రం : తూర్పు గోదావరి జిల్లాలోని గొల్లపాలెంలో కొలువైన శ్రీపార్వతీ సమేత గోకర్ణేశ్వరస్వామిని ఆరాధించటం ఉత్తమం.

ఆరుద్ర నక్షత్రం మూడో పాదం:
వాయుతత్వ స్వభావం ఉండటంతో నిర్ణయాల్లో నిలకడ లోపిస్తుంటుంది. ఈ సమస్యను అధిగమించేందుకు చిత్తశుద్ధితో కృషి చేయాల్సి ఉంటుంది. సర్దుకొనే స్వభావం ఉండటం కలిసి వచ్చే లక్షణం. కానీ సమస్యను నిజాయితీగా అర్థం చేసుకుంటేనే లాభం దక్కుతుంది.

గ్రహ దశలు : రాహు మహర్దశ 9 సం.లు, గురు మహర్దశ 16 సం.లు, శని 19 సం.లు, బుధ 17 సం.లు, కేతు 7 సం.లు, శుక్ర మహర్దశ 20 సం.లు ఉంటాయి.

ఆరుద్ర నక్షత్రం నాలుగో పాదం:
లౌక్యం, చాకచక్యం మిగిలిన లక్షణాలను ప్రభావితం చేస్తాయి. దూరదృష్టితో వ్యవహరించటం, నిలకడ సాధించడం చాలా ముఖ్యం. నిదానమే ప్రధానం అన్న సూక్తిని గుర్తుంచుకోవాలి. కలుపుకుపోయే స్వభావం ఉంటుంది. అనవసరపు కోపానికి సంకెళ్లు వేస్తే మంచి ఫలితాలు ఉంటాయి. అన్నింటా నెగ్గుకొని రావాలన్న యోచనను సమర్థంగా వినియోగించుకోవాలి.

గ్రహ దశలు : రాహు మహర్దశ నాలుగున్నర సం.లు, గురు 16 సం.లు, శని 19 సం.లు, బుధ 17 సం.లు, కేతు 7 సం.లు, శుక్ర మహర్దశ 20 సం.లు ఉంటాయి.

దర్శనీయ క్షేత్రం: తూర్పుగోదావరి జిల్లాలోని కూరాడలో కొలువైన శ్రీభద్రకాళీ సమేత వీరభద్రేశ్వర స్వామిని పూజించడం శుభప్రదం.

ఆరుద్ర నక్షత్ర జాతకులు పెంచవలసిన వృక్షములు:
ఆరుద్ర నక్షత్రం వారు చింత చెట్టుని పెంచడం, పూజించడం మంచిది. ఆరుద్ర నక్షత్ర అధిపతి రాహువు. తీవ్ర స్వభావి. మాయ భ్రమలకి కారణం రాహువు. ఆవేశం, కోపం అధికం. వైద్య వృత్తిని, చదువుని ఇవ్వగలడు. రాహువుకి అధిపతి దుర్గాదేవి. రాహుకాలంలో దుర్గా దేవికి నిమ్మకాయలో నెయ్యి వేసి దీపం వెలిగించడం శ్రేయస్కరం.

అరుద్ర నక్షత్ర జాతకుల తారా ఫలాలు:
తార నామం - తారలు - ఫలం

జన్మ తార - ఆర్ద్ర, స్వాతి, శతభిష - శరీరశ్రమ

సంపత్తార - పునర్వసు, విశాఖ, పూర్వాభాద్ర - ధన లాభం

విపత్తార - పుష్యమి, అనురాధ, ఉత్తరాభాద్ర - కార్యహాని

సంపత్తార - ఆశ్లేష, జ్యేష్ట, రేవతి - క్షేమం

ప్రత్యక్ తార - అశ్విని, మఖ, మూల - ప్రయత్న భంగం

సాధన తార - భరణి, పూర్వ ఫల్గుణి, పూర్వాషాఢ - కార్య సిద్ధి, శుభం

నైత్య తార - కృత్తిక, ఉత్తర ఫల్గుణి, ఉత్తరాషాఢ - బంధనం

మిత్ర తార - రోహిణి, హస్త, శ్రవణం - సుఖం

అతిమిత్ర తార - మృగశిర, చిత్త, ధనిష్ట - సుఖం, లాభం

జ్యోతిషశాస్త్రము

నిత్య స్తోత్రావళి

నిత్య పారాయణ శ్లోకాలు

స్తోత్రాలు

పంచాంగం