Anuradha Nakshatra - అనురాధ నక్షత్రము

అనురాధ నక్షత్రము

నక్షత్రం - అనురాధ
అధిపతి - శని
గణము - దేవ
జాతి - పురుష
వృక్షం - పొగడ
జంతువు - జింక
నాడి - మధ్య
పక్షి - పింగళ
అధిదేవత - సూర్యుడు
రాశి - వృశ్చికము

అనురాధ నక్షత్ర జాతకుల గుణగణాలు:
నక్షత్రములలో అనురాధ నక్షత్రము 17వ నక్షత్రం. ఇది దోష నక్షత్రము కాదు. కానీ, తల్లితండ్రులు సోదరులు ఇదే నక్షత్ర జననం అయినచో శాంతి అవసరం. ఇది దేవగణానికి చెందిన నక్షత్రం.

ఈ నక్షత్రములో జన్మించిన వారు నైతిక ధర్మము, పెద్దలు, వృద్ధుల పట్ల గౌరవము కలిగి ఉంటారు. విద్యలలో రాణించడానికి కొంత సమయము కావాలి. ఆరంభములో కొన్ని సమస్యలను ఎదుర్కొన్న తరువాత కాలములో నిరాటంకముగా విద్యలను అభ్యసిస్తారు.

ఉద్యోగ జీవితములో మొదట ఒడిదుడుకులను ఎదుర్కొన్నా తరువాత నిలదొక్కుకుని ముందుకు విజయవంతముగా సాగిపోతారు. ప్రేమ వివాహాలు చేసుకుంటారు. గుర్తింపు పత్రాలు లేకున్నా కొన్ని విద్యలలో పురోగతి సాధిస్తారు.

విద్యలపట్ల ఆసక్తి కలిగి ఉంటారు. ఉన్నత విద్యలు అభ్యసించి ఉన్నత పదవులు అధిరోహిస్తారు. కుటుంబ శ్రేయస్సు కొరకు కొన్ని పదవులు చేపడతారు. తల్లి మీద విశేషమైన అనురాగము ఉంటుంది. వీరు సలహాలు చెప్పి, మార్గాలు చూపి అనేక మంది పురోగతికి తోడ్పడతారు. సంతానము వలన ఖ్యాతి లభిస్తుంది.

అనురాధ నక్షత్ర జాతకులకు దేవుడిపై లోతైన విశ్వాసం ఉంటుంది. ఈ కారణం వల్లనే ఎటువంటి క్లిష్టమైన పరిస్థితుల్లోనూ నిరుత్సాహపడరు. జీవితంలో అడ్డంకులు రావొచ్చు, అయితే, వీరు బాగా కష్టపడి పనిచేస్తారు కనుక, అవి జీవిత పథాన్ని కదిలించకపోవచ్చు. చాలా చిన్న వయస్సులోనే వీరు డబ్బును సంపాదించడం ప్రారంభిస్తారు. వీరి స్వభావం చాలా సమస్యలమయంగా ఉంటుంది.

మానసిక శాంతి కొరకు, వీరు నిరంతరం శ్రమించాలి. వీరు ముక్కుసూటిగా వ్యవహరిస్తారు కనుక, మదిలోకి ఏది వస్తే దానిని చెబుతారు. ప్రతిదీ వీరు మనస్సులో ఉంచుకునే స్వభావం కాదు. అందువల్లనే కొన్నిసార్లు ప్రజల మాటలతో బాధించబడతారు. ఎప్పుడైనా వీరు ప్రజలకు సహాయపడటానికి ప్రయత్నిస్తే, వారు హృదయపూర్వకంగా చేస్తారు.

లక్ష్యం పట్ల వీరు చాలా సీరియస్ గా ఉంటారు, అనేక అడ్డంకుల తరువాత దానిని విజయవంతంగా చేరుకోగలుగుతారు. అవకాశం వచ్చినప్పుడల్లా, దానిని పూర్తిగా ఉపయోగించుకోవడానికి ప్రయత్నిస్తారు.

పని చేయడం కంటే వ్యాపారం చేయడానికి వీరు ఎక్కువ ఆసక్తి కనపరుస్తారు. బాల్యం నుంచే వీరికి వ్యాపార లక్షణాలుంటాయి. అందువల్ల, దీనిలో వీరు నిజంగా విజయం సాధిస్తారు. ఒకవేళ వీరు ఉద్యోగం చేయడం ప్రారంభించినట్లయితే, వీరిపై ఉన్నవారిని అందరినీ కూడా వీరికి అనుకూలంగా మలచుకోగలుగుతారు. వీరు జీవితంలో ఎంతో క్రమశిక్షణతో ఉంటారు మరియు జీవితంలో విలువలకు చాలా ప్రాధాన్యత ఇస్తారు.

పనిలో పూర్తి క్రమశిక్షణను కలిగి ఉండటానికి వీరు ప్రయత్నిస్తారు. వీరి యొక్క జీవిత పోరాటాల ద్వారా వీరు చక్కటి జీవిత పాఠాలను నేర్చుకుంటారు. వీరి యొక్క వ్యక్తిత్వ లక్షణాల గురించి తెలిసినవారు, వీరు చాలా అనుభవం కలిగినవారు కనుక వీరి నుంచి సలహాలను తీసుకోవడానికి ఇష్టపడతారు.

ఎలాంటి క్లిష్టమైన పరిస్థితినైనా తొలగించే అద్భుతమైన నైపుణ్యం వీరికి ఉంటుంది. ఒకవేళ సంపద విషయానికి వస్తే, ఆస్తులపై పెట్టుబడి పెట్టడం లేదా పొదుపు చేయడంపై వీరికి ఆసక్తి ఉంటుంది కనుక తగినంత సంపద ఉంటుంది. పెట్టుబడులు పెట్టే స్వభావం వల్ల, వీరు బాగా ధనవంతులుగా ఉంటారు.

అనురాధ నక్షత్రం మొదటి పాదము
అనురాధ నక్షత్ర అధిపతి శని. ఇది దేవగణ నక్షత్రం కావడం వల్ల వీరు సాత్విక గుణం, ధర్మపక్షపాతం కలిగి ఉంటారు. ఈ నక్షత్ర జాతకులకు స్వభావ రీత్య బద్ధకం ఉన్నా చేయాలనుకున్న పనిని శ్రమకు ఓర్చి పని చేస్తారు. అన్యాయాన్ని సహించలేరు. మంచివే అయిన తమ అభిప్రాయాలను సూటిగా తెలియజేస్తారు. వీరికి ఆత్మవిశ్వాసం ఎక్కువ.

ఈ నక్షత్ర జాతకులకు తొలి 17 సంవత్సరాల జీవితం సాధారణంగానే జరుగుతుంది. విద్యలో కాస్త మందకొడితనం ఉంటుంది. తరువాత వచ్చే 17 సంవత్సరాల బుధదశ కారణంగా కళాశాల చదువులలో అభివృద్ధి ఉంటుంది. జీవితంలో త్వరగా స్థిరపడతారు. వివాహం సకాలంలో జరుగుతుంది.

34 సంవత్సరాల అనంతరం వచ్చే 7 సంవత్సరాల కేతు దశ కారణంగా జీవితంలో కొన్ని సమస్యలు ఎదురవుతాయి. కేతు దశ అనుకూలిస్తే విదేశీ ఉద్యోగాలు అనుకూలిస్తాయి. 41 సంవత్సరాల కాలంలో వచ్చే శుక్ర దశ కారణంగా జీవితంలో అభివృద్ధి ఉంటుంది. జీవితం సౌఖ్యంగా జరుగుతుంది. మిగిలిన జీవితం సాఫీగా జరుగుతుంది.

అనురాధ నక్షత్రం రెండవ పాదము
అనురాధ నక్షత్ర రెండవ పాద జాతకులు సాత్విక గుణం, ధర్మ పక్షపాతం కలిగి ఉంటారు. వీరు చేయాలనుకున్న పనిని శ్రమకు ఓర్చి పనిచేస్తారు. అన్యాయాన్ని ప్రతిఘటిస్తారు. వీరికి మేధో సంబంధమైన వృత్తి ఉద్యోగాలు అనుకూలిస్తాయి. వీరికి బుధ దశ అనుకూలించడం వల్ల విద్యలో ఉన్నతిని సాధించగలరు.

13 సంవత్సరాల కాలం జీవితం సాధారణంగానే జరుగుతుంది. విద్యలో మందకొడితనం ఉంటుంది. తరువాత వచ్చే 17 సంవత్సరాల బుధ దశ కారణంగా మాధ్యమిక తరగతి నుంచి చదువులలో మంచి అభివృద్ధి ఉంటుంది. జీవితంలో తొందరగానే స్థిరపడతారు. వివాహం సకాలంలో జరుగుతుంది.

30 సంవత్సరాల అనంతరం వచ్చే 7 సంవత్సరాల కేతుదశ కారణంగా జీవితంలో కొన్ని సమస్యలు ఎదురవుతాయి. కేతుదశ అనుకూలిస్తే విదేశీ ఉద్యోగాలు అనుకూలిస్తాయి. 37 సంవత్సరాల అనంతరం వచ్చే శుక్ర దశ కారణంగా జీవితంలో అభివృద్ధి ఉంటుంది. ఆ తర్వాత జీవితం సౌఖ్యంగా, సాఫీగా కొనసాగుతుంది.

అనురాధ నక్షత్రం మూడవ పాదము
అనురాధ నక్షత్ర మూడవ పాద జాతకులు ప్రజాకర్షణ కలిగి ఉంటారు. తమ అభిప్రాయాలను సూటిగా, ఆకర్షణీయంగా చెప్పగలరు. కనుక సాత్విక గుణం, ధర్మ పక్షపాతం కలిగి ఉంటారు. వీరు చేయాలనుకున్న పనిని శ్రమించి పూర్తి చేస్తారు. సమాజంలో జరిగే అన్యాయాన్ని సహించలేరు. కళాత్మకమైన వస్తువులను సేకరించడానికి ఆసక్తి కలిగి ఉంటారు. పరిశుభ్రమైన వాతావరణంలో ఉండడానికి ఆసక్తి కలిగి ఉంటారు.

వీరికి బుధ దశ బాగా అనుకులించడం వల్ల విద్యావంతులై ఉన్నత స్థితికి చేరుకుంటారు. 8 సంవత్సరాల వరకు మందకొడిగా సాగే విద్యాభ్యాసం తరువాత వచ్చే 17 సంవత్సరాల బుధ దశ కాలంలో బాగా రాణిస్తుంది. కనుక వీరు ఉన్నత ఉద్యోగాలలో స్థిరపడతారు.

25 సంవత్సరాల తరువాత వచ్చే 7 సంవత్సరాల కేతు దశ కారణంగా కొన్ని సమస్యలను ఎదుర్కొంటారు. కేతుదశ అనుకూలిస్తే విదేశీ ఉద్యోగ అవకాశాలు అనుకూలిస్తాయి. 32 సంవత్సరాల తరువాత వచ్చే 20 సంవత్సరాల శుక్ర దశ కారణంగా జీవితంలో చక్కని అభివృద్ధి ఉంటుంది.

ఈ నక్షత్ర జాతకులకు ఇనుము, వెండి, ముత్యం సంబంధిత ఉద్యోగ వ్యాపారాలు అనుకూలం. పరిశ్రమలు, కర్మాగారం, విమానాశ్రయాలు.. వంటి వాటిలో పనిచేసే అవకాశాలు ఉంటాయి.

అనురాధ నక్షత్రం నాలుగో పాదము
అనురాధ నక్షత్ర నాల్గవ పాద జాతకులు ఆరంభములో కొన్ని సమస్యలను ఎదుర్కొన్నా తరువాత కాలంలో నిరాటంకముగా విద్యలను అభ్యసిస్తారు. ఉద్యోగ జీవితములో మొదట ఒడిదుడుకులను ఎదుర్కొన్నా తరువాత నిలదొక్కుకుని ముందుకు విజయవంతంగా సాగిపోతారు.

4 సంవత్సరాల తరువాత వచ్చే 17 సంవత్సరాల బుధ దశ కాలం బాగా రాణిస్తుంది. 21 సంవత్సరాల తరువాత వచ్చే 7 సంవత్సరాల కేతుదశ కారణంగా ఉన్నత విద్యాభ్యాసంలో కొన్ని సమస్యలను ఎదుర్కొంటారు. ప్రయత్న పూర్వకంగా విద్యలో విజయం సాధించవలసిన అవసరం ఉంది.

కేతు దశ అనుకూలిస్తే విదేశీ విద్య, ఉద్యోగ అవకాశాలు అనుకూలిస్తాయి. 28 సంవత్సరాల తరువాత వచ్చే 20 సంవత్సరాల శుక్ర దశ కారణంగా జీవితంలో చక్కని అభివృద్ధి ఉంటుంది. 71 సంవత్సరాల వరకు జీవితం సాఫీగా సాగిపోతుంది.

అనురాధ నక్షత్ర జాతకులు పెంచవల్సిన వృక్షము
అనురాధ నక్షత్రం వారు పొగడ చెట్టుని పెంచడం, పూజించడం మంచిది. పది మందిలో ఒకరిగా గుర్తింపు తెచ్చుకోవడానికి, పరోపకారం చేయడానికి, విద్యలో ఎటువంటి ఆటంకాలు ఎదురైనా, పట్టుదలతో వాటిని అధిగమించి ముందుకు సాగడానికి, ఆలోచనా శక్తి అభివృద్ధి చెందడానికి ఉపయోగపడుతుంది.

అనురాధ నక్షత్ర అధిపతి శని భగవానుడు కావున, ఈశ్వర ఆరాధన మంచిది. శని సేవక వృత్తిని సూచిస్తాడు. కావున సేవ చేసిన వారిని కాపాడతాడు.

అనురాధ నక్షత్ర జాతకుల తారా ఫలాలు
తార నామం - తారలు - ఫలం

జన్మ తార - పుష్యమి, అనురాధ, ఉత్తరాభాద్ర - శరీరశ్రమ

సంపత్తార - ఆశ్లేష, జ్యేష్ట, రేవతి - ధన లాభం

విపత్తార - అశ్విని, మఖ, మూల - కార్యహాని

సంపత్తార - భరణి, పూర్వ ఫల్గుణి, పూర్వాషాఢ - క్షేమం

ప్రత్యక్ తార - కృత్తిక, ఉత్తర ఫల్గుణి, ఉత్తరాషాఢ - ప్రయత్న భంగం

సాధన తార - రోహిణి, హస్త, శ్రవణం - కార్య సిద్ధి, శుభం

నైత్య తార - మృగశిర, చిత్త, ధనిష్ట - బంధనం

మిత్ర తార - ఆరుద్ర, స్వాతి, శతభిష - సుఖం

అతిమిత్ర తార - పునర్వసు, విశాఖ, పూర్వాభాద్ర - సుఖం, లాభం

నక్షత్ర శాంతి: బియ్యం, కొబ్బరి, ఖర్జూరం, బెల్లం ఇవన్ని మిశ్రమం తయారు చేసి దానంగా ఇవ్వాలి.

నక్షత్ర మంత్రం:

।। ఓం ।।
ఋద్ధ్యాస్మ' హవ్యైర్నమ'సోపసద్య' ।
మిత్రం దేవం మి’త్రధేయం' నో అస్తు ।
అనూరాధాన్, హవిషా' వర్ధయంతః ।
శతం జీ'వేమ శరదః సవీ'రాః ।
చిత్రం నక్షత్రముద'గాత్పురస్తా”త్ ।
అనూరాధా స ఇతి యద్వదంతి ।
తన్మిత్ర ఏ'తి పథిభిర్దేవయానై: ।
హిరణ్యయైర్విత తైరంతరిక్షే ||

నక్షత్ర గాయత్రి

ఓం మిత్రదేయాయై విద్మహే 

మహామిత్రాయ ధీమహి 

తన్నో అనూరాధా ప్రచోదయాత్

దర్శించవలసిన ఆలయములు

మొదటి పాదం – పనికేరులో వేంచేసి ఉన్న శ్రీ బాలాత్రిపురసుందరీ సమేత శ్రీ ఇష్టకాంతేశ్వర స్వామి.
రెండవ పాదం – చింతలూరులో వేంచేసి ఉన్న శ్రీ పార్వతీ సమేత శ్రీ పృధ్వీశ్వర స్వామి.
మూడవ పాదం – పినపల్లలో వేంచేసి ఉన్న శ్రీ పార్వతీ సమేత శ్రీనీలకంఠేశ్వర స్వామి.
నాలుగవ పాదం – పెదపల్లలో వేంచేసి ఉన్న శ్రీ పార్వతీ సమేత శ్రీరామలింగేశ్వర స్వామి.

జ్యోతిషశాస్త్రము

నిత్య స్తోత్రావళి

నిత్య పారాయణ శ్లోకాలు

స్తోత్రాలు

పంచాంగం