శ్రీ శంకరాచార్య వర్యం
॥ శ్రీ శంకరాచార్యస్తవః ॥
శ్రీ శంకరాచార్యవర్యం సర్వలోకైకవంద్యం భజే దేశికేంద్రం
ధర్మప్రచారేఽతిదక్షం యోగిగోవిందపాదాప్తసన్యాసదీక్షమ్ ।
దుర్వాదిగర్వాపనోదం పద్మపాదాదిశిష్యాలిసంసేవ్యపాదమ్ ॥1॥
(శ్రీ శంకరాచార్యవర్యం)
శంకాద్రిదంభోలిలీలం కింకరాశేషశిష్యాలి సంత్రాణశీలమ్ ।
బాలార్కనీకాశచేలం బోధితాశేషవేదాంత గూఢార్థజాలమ్ ॥2॥
(శ్రీ శంకరాచార్యవర్యం)
రుద్రాక్షమాలావిభూషం చంద్రమౌలీశ్వరారాధనావాప్తతోషమ్ ।
విద్రావితాశేషదోషం భద్రపూగప్రదం భక్తలోకస్య నిత్యమ్ ॥3॥
(శ్రీ శంకరాచార్యవర్యం)
పాపాటవీచిత్రభానుం జ్ఞానదీపేన హార్దం తమో వారయంతమ్ ।
ద్వైపాయనప్రీతిభాజం సర్వతాపాపహామోఘబోధప్రదం తమ్ ॥4॥
(శ్రీ శంకరాచార్యవర్యం)
రాజాధిరాజాభిపూజ్యం రమ్యశృంగాద్రివాసైకలోలం యతీడ్యమ్ ।
రాకేందుసంకాశవక్త్రం రత్నగర్భేభవక్త్రాంఘ్రిపూజానురక్తమ్ ॥5॥
(శ్రీ శంకరాచార్యవర్యం)
శ్రీభారతీతీర్థగీతం శంకరార్యస్తవం యః పఠేద్భక్తియుక్తః ।
సోఽవాప్నుయాత్సర్వమిష్టం శంకరాచార్యవర్యప్రసాదేన తూర్ణమ్ ॥6॥
(శ్రీ శంకరాచార్యవర్యం)
No comments:
Post a Comment